Read Tarifit Yuḥanna 9 Bible Online

Yuḥanna 9 - Tarifit bible

Yuḥanna 9

¹Wami tuɣa Ƹisa iggur ḏeg ubriḏ yufa ijjen n uryaz ḏ aḍarɣaȓ ixȓeq-d amenni.

²Nnan-as imeḥḍaren nnes: "A Lmuƹallim, ug iy iƹṣan? Ma ḏ wanita ma ḏ lwalidin nnes wami d ixȓeq ḏ aḍarɣaȓ?"

³Inna-asen Ƹisa: "War iƹṣi wanita uȓa ḏ lwalidin nnes. Ixȓeq-d ḏ aḍarɣaȓ bac marra aḏ ẓren min izemmar Arebbi aḏayes ixḏem.

⁴Xmi itiȓi ḏ nhar, itxeṣṣa-yaneɣ a nexḏem ȓexḏayem n wenni iy ḏayi d issekken. Xmi d taweḍ ǧiȓeṯ, war izemmar uȓa ḏ ijjen aḏ ixḏem.

⁵Madama ƹaḏ ǧiɣ ḏi ddunect, nec ḏ nnur n ddunect."

⁶Wami inna ammu, issusef ḏeg ucaȓ igga zzayes abeǧaƹ s ikuffan nni isers-iṯ x ṯiṭṭawin n uḍarɣaȓ.

⁷Inna-as Ƹisa: "Ruḥ aḏ tessirḏeḏ ḏi ṣṣarij n Silwam." (Awaȓ-a Silwam ixes aḏ yini <Wenni iy d itwassekken.>) Iruḥ isireḏ, irewweḥ itwaȓa.

⁸Ssiwȓen jarasen jjiran ḏ yiwḏan iy ṯ issnen zi qbeȓ nnan, Maci ḏ wanita itɣiman itettar?

⁹Ȓebƹaḍ zzaysen nnan: "Qa ḏ netta." Nnan inneɣni: "Lla, itawi-d ḏayes waha." Walakin netta inna: "Qa ḏ nec."

¹⁰Nnan-as: "Mammec genfant ṯiṭṭawin nnec?"

¹¹Inna-asen: "Bnaḏem nni umi qqaren Ƹisa iysi-d abeǧaƹ isers-ayi-ṯ x ṯiṭṭawin inu. Inna-ayi ruḥ ɣar Silwam aḏ tessirḏeḏ. Ruḥeɣ ssirḏeɣ, rewwḥeɣ twaȓiɣ."

¹²Nnan-as: "Mani iǧa?" Inna-asen: "War ssineɣ."

¹³Uwin aryaz nni iḏewȓen itwaȓa ɣar ifarrisiyen.

¹⁴Tuɣa nhar nni ḏ ssebṯ n lƹibada wami ḏas isers Ƹisa abeǧaƹ x ṯiṭṭawin nnes isgenfa-ṯ.

¹⁵Nnan-as uȓa ḏ ifarrisiyen, Min ḏac iweqƹen wami cek twaȓiḏ? Inna-asen: "Isers-ayi abeǧaƹ x ṯiṭṭawin inu, ssirḏeɣ ḏewȓeɣ twaȓiɣ."

¹⁶Nnan ȓebƹaḍ n ifarrisiyen nni: "Bnaḏem nni war iǧi ca zi Arebbi minzi war iweqqar ca nhar n lƹibada." Walakin ȓebƹaḍ nneɣni nnan: "Lla, mammec bnaḏem ḏ lƹaṣi zaƹma aḏ igg lmuƹjizaṯ-a?" X manaya iwqeƹ lxilaf jarasen.

¹⁷Nnan-as ƹaweḏ i uḍarɣaȓ nni: "Mammec twaȓiḏ cek wenni iy c isgenfan ṯiṭṭawin nnec?" Inna-asen: "Netta ḏ nnabi."

¹⁸Walakin ƹaḏ war uminen ca israʼiliyen nni belli netta tuɣaṯ ḏ aḍarɣaȓ iḏweȓ itwaȓa ḥetta wami d ȓaɣan i lwalidin nnes.

¹⁹Nnan-asen: "Ma ḏ wanita ḏ mmiṯwem iy ṯeqqarem ixȓeq-d ḏ aḍarɣaȓ? Mammec igga ȓexxu netta itwaȓa?"

²⁰Nnan-asen lwalidin nnes: "Neccin nessen belli wanita ḏ mmiṯneɣ ixȓeq-d ḏ aḍarɣaȓ.

²¹War nessin ca min ḏas iweqƹen ȓexxu iḏweȓ itwaȓa. War nessin ca wenni iy ṯ isgenfan zi ṯiṭṭawin nnes. Sseqsam-ṯ kenniw, netta qa imɣar aḏ issiweȓ nniṯ x yixef nnes."

²²Nnan lwalidin nnes amenni minzi ggwḏen zeg imeqqranen n Ayṯ-Israʼil. Tuɣa imeqqranen nni tafqen belli wenni ɣa icehḏen Ƹisa ḏ Lmasiḥ, aṯ ṭerden zi ṯemziḏa.

²³X manaya nnan lwalidin nnes sseqsam-ṯ kenniw netta qa imɣar.

²⁴Ȓaɣan-d wis marrṯayen i uryaz nni tuɣa iǧan ḏ aḍarɣaȓ nnan-as: "Iwa ḥmeḏ Arebbi cek! Qa neccin nessen aryaz nni netta ḏ lƹaṣi."

²⁵Inna-asen: "Netta meȓa ḏ lƹaṣi zaƹma nec war ssineɣ ca. Ssneɣ ijjen n ṯmesȓayṯ: tuɣayi ḏ aḍarɣaȓ ȓexxu twaȓiɣ."

²⁶Nnan-as: "Min ḏac igga? Mammec igga isgenfa-c zi ṯiṭṭawin nnec?"

²⁷Inna-asen: "Nniɣ-awem-t war ḏayi ṯṣennṭem ca. Mayemmi ṯexsem aḏ tesȓem ƹaweḏ? Ma ṯexsem uȓa ḏ kenniw aḏ tiȓim ḏ imeḥḍaren nnes?"

²⁸Zawaren-ṯ nnan-as: "Cek iy iǧan ḏ ameḥḍar nnes! Qa neccin ḏ imeḥḍaren n Musa.

²⁹Neccin nessen belli Arebbi issiweȓ ak Musa, walakin wenni war nessin ca manis iy d yusa."

³⁰Inna-asen uryaz nni: "Manaya ḏ ȓƹajeb! Isgenfa ṯiṭṭawin inu, kenniw war tessinem ca manis netta!

³¹Neccin nessen Arebbi war itsȓi ca ɣar yinni iƹeṣṣan; Lla, itsȓa ɣar yinni iy ṯ itweqqaren ḏ yinni ixeddmen s min ixes.

³²Ƹemmarṣ war nesȓi ḏi zman bnaḏem ixȓeq-d ḏ aḍarɣaȓ aḏ d yas can yijjen aḏas isgenfa ṯiṭṭawin.

³³Aryaz-a, maƹlik war iǧi ca zi Arebbi ataf war izemmar aḏ igg walu!"

³⁴Nnan-as: "Cek ḏ lƹaṣi zeg wami d ṯxeȓqeḏ, ma ṯrezzuḏ aḏaneɣ ṯesȓemḏeḏ neccin?" Ȓexddenni ṭerden-ṯ zi ṯemziḏa.

³⁵Isȓa Ƹisa belli wenni ṭerden-ṯ zi ṯemziḏa. Wami ṯ yufa inna-as: "Ma tamneḏ zi Mmis n bnaḏem?"

³⁶Inna-as: "Min iƹna wenni a Siḏi ḥima azzayes amneɣ?"

³⁷Inna-as Ƹisa: "Aqa ṯeẓriḏ-ṯ, ḏ wenni iy kic issawaȓen."

³⁸Inna-as: "Umneɣ zzayec a Siḏi." Ȓexddenni isejjeḏ-as.

³⁹Inna Ƹisa: "Usiɣ-d ɣar ddunect-a aḏ ḥasbeɣ ḥima yinni iǧan ḏ iḍarɣaȓen aḏ twaȓan, yinni itwaȓan aḏ ḍerɣȓen."

⁴⁰Sȓin-as ȓebƹaḍ zeg ifarrisiyen iy iǧan ḏinni nnan-as: "Ma uȓa ḏ neccin ḏ iḍarɣaȓen niɣ?"

⁴¹Inna-asen Ƹisa: "Maƹlik ḏ iḍarɣaȓen iy ṯeǧam, ataf war ḏaywem bu ȓmuƹṣiyeṯ. Walakin kenniw ȓexxu ṯeqqarem neccin netwaȓa. X manayenni ƹaḏ ḏaywem ȓmuƹṣiyeṯ."