Read Tarifit Ȓexḏayem 1 Bible Online

Ȓexḏayem 1 - Tarifit bible

Ȓexḏayem 1

¹A si Tawfilus, lkitab amezwaru iy uriɣ nec ḏayes marra min igga Ƹisa ḏ min iseȓmaḏ aȓ nhar nni wami itwarfeƹ. Netta qbeȓ ma aḏ itwarfeƹ, iweṣṣa s Arruḥ iqeddsen arrusul iy tuɣa ixḍar inna-asen min ɣa ggen.

³Wami iƹḏu ȓaƹḏab n ȓmewṯ nnes, itmeḍhar-asen-d x yijjen n arbeƹin yum isefham-iṯen mebȓa ccekk netta aqa iddar. Itas-d ɣarsen issawaȓ akiḏsen x ȓmulk n Arebbi.

⁴Wami tuɣa akiḏsen itett, iweṣṣa-aṯen inna-asen: "War teffɣem ca zi ṯendint n Lquds. Rajam aȓ d ɣa yas min iwƹeḏ Baba iy xef ḏawem tuɣa ssiwȓeɣ.

⁵Iƹni Yaḥya iṭehhar i yiwḏan s waman, kenniw war ḏawem iqqim ca aḏ twaṭehharem s Arruḥ iqeddsen."

⁶Wami munen arrusul ak Ƹisa nnan-as: "A Siḏi, ma ḏeg wussan-a iy d ɣa ṯarreḏ ȓeḥkam ɣar Ayṯ-Israʼil?"

⁷Inna-asen Ƹisa: "War ḏawem itwasmeḥ ca aḏ tessnem lʼawqat niɣ ḏ ttawarix tuɣa igga Baba s ssulṭa nnes.

⁸Walakin axmi xawem d ɣa ihwa Arruḥ iqeddsen, aɣarwem yiȓi jjheḏ. Axafi ṯcehḏem ḏi ṯendint n Lquds ḏ marra ṯimura n Yahuḏiya ḏ Samarya aȓ ṭṭarf uneggaru n ddunect-a."

⁹Ɣir ikemmeȓ Ƹisa awaȓ nnes, itwarfeƹ ɣar ujenna. Qqimen txezzaren ḏayes uca iweddar-asen ḏeg useynu.[1]

¹⁰Qqimen txezzaren mliḥ wami yuȓi ɣar ujenna, ƹlaɣafla ufin akiḏsen ṯnayen n iṯarrasen bedden, ɣarsen arruḍ ḏ acemȓaȓ.[2]

¹¹Nnan-asen: "Ay iryazen n ṯmurṯ n Ljalil, mayemmi ƹaḏ ṯbeddem ḏanita txezzarem ḏeg ujenna? Qa Ƹisa-ya wanita iy ḏawem itwarfƹen ɣar ujenna, mammec ṯ ṯeẓrim igaƹƹeḏ ɣar ujenna amenni iy d ɣa iḏweȓ."

¹²Ssenni ḏewȓen-d arrusul zeg Uḏrar n Zzitun ɣar ṯendint n Lquds ig iggwjen s yijjen n kilumit.

¹³Wami uwḍen, gaƹƹḏen ɣar ṯɣurfat[3] mani tiȓin: Buṭrus ḏ Yuḥanna ḏ Yaƹqub ḏ Andrus, ḏ Filippas ḏ Tuma ḏ Bartulumay ḏ Matta, ḏ Yaƹqub mmis n Ḥalfa ḏ Simƹan Lmunaḍil, ḏ Yahuḏa mmis n Yaƹqub.

¹⁴Yina kuȓ nhar tmunen marra s yijjen n lfikra tẓaǧan, akiḏsen can n ṯemɣarin ḏ Maryam yemmas n Ƹisa ḏ ayṯmas.

¹⁵Ḏeg wussan nni ikkar Buṭrus ibedd ḏi ȓwesṭ n ȓmuminin (ḏinni can miyya u ƹicrin iḏsen) inna-asen:

¹⁶"Ay ayṯma, tuɣa itxeṣṣa aḏ ikemmeȓ wawaȓ n Arruḥ iqeddsen iy d yusin x yiȓes n nnabi Dawed ḏeg yijjen n zman wami issiweȓ x Yahuḏa iƹni wenni izenzen Ƹisa isbeyyen-asen abriḏ yuwi yinni iy ṯ iṭṭfen.

¹⁷Yahuḏa-ya tuɣa itwaḥsab zzayneɣ, yuḏef akiḏneɣ ḏi ȓxeḏmeṯ n Arebbi.

¹⁸S tmenyaṯ nnes ig iṭṭef n lḥaram, iruḥ isɣa zzaysent ijjen n ṯmurṯ. Ḏinni iy iwḍa s jjheḏ x wuḏem nnes, idduqqez-as uƹeddis menḍaren-as-d marra waḏan nnes.

¹⁹Arrin-as-d ȓexbar marra ayṯbab n Lquds. X manayenni semman-as i ṯmurṯ nni s wawaȓ nsen <Ḥaqel Damma> iƹni <Iyar n iḏammen.>[4]

²⁰Iqqar Lkitab n Zzabur: Arebbi aḏ ixȓa ṯaddarṯ n wenni war ḏayes izeddeɣ ḥadd. Iqqar ƹaweḏ: Ȓxeḏmeṯ nnes at iṭṭef ijjen nneɣni.

²¹Iḏen, itxeṣṣa a nexḍar ijjen n uryaz zeg yinni tuɣa iǧan akiḏneɣ marra ȓweqṯ nni wami Siḏiṯneɣ Ƹisa itaḏef iteffeɣ xaneɣ.

²²Iƹni zeg wami iy ṯ iṭehhar Yaḥya s waman aȓ wami iy itwarfeƹ xaneɣ ɣar ujenna. Aryaz-a itxeṣṣa akiḏneɣ icheḏ qa Ƹisa ikkar-d zi ȓmewṯ."

²³Kkaren qeddmen ṯnayen n yiwḏan: ijjen qqaren-as Matyas ijjen qqaren-as Yusef. Yusef nni ƹaweḏ qqaren-as Barsaba niɣ Yustus.

²⁴Ttaren-as i Arebbi nnan-as: "A Siḏi Arebbi qa cek ṯessneḏ min iǧan ḏeg wuȓawen n yiwḏan marra. Seḍhar-aneɣ-d wenni iy ṯixḍareḏ zi ṯnayen-a.

²⁵Akiḏneɣ yiȓi ḏi ȓxeḏmeṯ-a, aḏ iḏweȓ ḏ arrasul ḏeg umcan n Yahuḏa wenni ig isemḥen ḏi ȓxeḏmeṯ-a iruḥ ɣar umcan nnes aƹeffan."

²⁶Uca ggin lqurƹa, lqurƹa nni ṯusa-d ḏi Matyas, arnin-ṯ-iḏ ɣar ḥiṭac nni n arrusul.