Read Tarifit Ȓexḏayem 15 Bible Online

Ȓexḏayem 15 - Tarifit bible

Ȓexḏayem 15

¹Usin-d ca n iryazen zi Yahuḏiya seȓmaḏen ayṯmaṯneɣ ḏeg Wanṭakya nnan-asen: "War ṯzemmarem ca aḏ tnejmem illa meȓa ṯeggim ṭṭahareṯ ƹlaḥsab Ccariƹa n Musa."

²Iruḥ Bulus ḏ Barnaba temnaqaren ak yinni iy d yusin zi Yahuḏiya, iwqeƹ jarasen ijjen n lxilaf ḏ ameqqran. Kkaren jmaƹeṯ nni n ȓmuminin ḏeg Wanṭakya ixḍaren Bulus ḏ Barnaba bac aṯen ssekken ak ȓebƹaḍ n ȓmuminin nsen ɣar ṯendint n Lquds bac aḏ sseqsan arrusul ḏ imeqqranen n jmaƹeṯ n ȓmuminin x lxilaf-a ig iweqƹen. Wami ssekken Bulus ḏ Barnaba ɣar Lquds x ubriḏ nsen ƹḏun x Finiqya ḏ Samarya. Xebbaren ayṯmaṯneɣ iǧan ḏinni x mammec ig umnen uȓa ḏ yinni war iǧin ca zi Ayṯ-Israʼil. Ȓexbar nni isfareḥ-iṯen aṭṭas marra.

⁴Wami uwḍen ɣar Lquds, reḥḥben zzaysen jmaƹeṯ n ȓmuminin ḏ imeqqranen n jmaƹeṯ-a ḏ arrusul. Ḏinni Bulus ḏ Barnaba ƹawḏen-asen i niṯni marra min igga Arebbi x ufus nsen.

⁵Walakin kkaren can n ȓmuminin ȓḥizeb nsen zeg ifarrisiyen nnan: Itxeṣṣa wa labud aḏ ṭehharen yinni war iǧin ca zi Ayṯ-Israʼil, aṯen ṯweṣṣam aḏ ṭaƹen i Ccariƹa n Musa.

⁶Munen arrusul ḏ imeqqranen n jmaƹeṯ n ȓmuminin ḥima aḏ xzaren ḏi lxilaf-a.

⁷Wami mnaqacen aṭṭas, ikkar Buṭrus ibedd inna-asen: "Ay ayṯma, aqa kenniw ṯessnem mecḥaȓ zeg wami iy ḏayi ixḍar Arebbi zzaywem bac yinni war iǧin ca zi Ayṯ-Israʼil aḏ sȓen zeg uqemmum inu awaȓ n Lʼinjil aḏ amnen.

⁸Arebbi ḏ netta ig issnen uȓ n bnaḏem, iseḍhar-d netta belli iqbeȓ-iṯen iƹni yuca-asen Arruḥ iqeddsen mammec ḏaneɣ ṯ yuca i neccin.

⁹War iggi bu s wuḏemawen jaraneɣ, isireḏ-asen uȓawen nsen wami umnen.

¹⁰Ȓexxu kenniw mayemmi ṯzaƹmem aḏ teẓrem Arebbi min ɣa igg, teggem dqeȓ n ṯzayȓut[27] x yiri n imeḥḍaren? Dqeȓ nni tuɣa war nzemmar aṯ neysi lla neccin uȓa ḏ ȓejḏuḏ nneɣ.

¹¹Neccin min ntamen? Ntamen belli neccin a nenjem s arḍa n Siḏiṯneɣ Ƹisa mammec ɣa nejmen uȓa ḏ yinni war iǧin ca zi Ayṯ-Israʼil."

¹²Marra jmaƹeṯ nni ḏinni iy qqimen war nnin walu, tesȓan i Barnaba ḏ Bulus ssawaȓen x lmuƹjizaṯ ḏ lburhanaṯ igga Arebbi x ufus nsen jar yinni war iǧin ca zi Ayṯ-Israʼil.

¹³Wami kemmȓen awaȓ nsen, indeq-d Yaƹqub inna-asen: "Ay ayṯma, ṣennṭem ɣari mliḥ!

¹⁴Iƹaweḏ-aneɣ Simƹan x mammec ḏeg umezwaru ifqeḏ Arebbi yinni war iǧin ca zi Ayṯ-Israʼil ixḍar ca zzaysen aḏ iȓin ḏ ccaƹb nnes.

¹⁵Manaya yusa-d ak lʼanbiya min nnan ḏi zman, mammec iqqar Lkitab:

¹⁶Menbaƹd i manaya nec aḏ d ḏewȓeɣ, aqiḍun n Dawed iy iwḍan aṯ sbeddeɣ, min zzayes inheḏmen aṯ sgaƹƹḏeɣ aṯ ƹeḏȓeɣ.

¹⁷Bac yinni iqqimen zeg yiwḏan aḏ rzun x Siḏi Arebbi, bac marra yinni war iǧin ca zi Ayṯ-Israʼil yinni iy iysin isem inu axas rzun. Ammu iqqar Siḏi Arebbi ṯimesȓayin-a iy ǧant zi zman, ȓexxu ismeḍhar-iṯent-id."

¹⁹Inna-asen Yaƹqub: "X manaya nec twaȓiɣ war nseqsaḥ ca x yinni war iǧin ca zi Ayṯ-Israʼil ig itamnen ȓexxu zi Arebbi.

²⁰Walakin aḏasen nari ṯabrat-a ḥima aḏ beƹƹḏen x lmakla itwaqeddmen i lʼaṣnam ḏ lfasad ḏ min itwajeyyfen ḏ iḏammen.

²¹Liʼanna zi zman tḥeddaṯen i yiwḏan s Ccariƹa n Musa ḏi mkuȓ ṯendint, qqaren-t zi ssebṯ ɣar ssebṯ ḏi ṯemziḏawin n Ayṯ-Israʼil."

²²X manaya arrusul ḏ imeqqranen n jmaƹeṯ n ȓmuminin ḏ marra jmaƹeṯ n ȓmuminin ggin aḏ ixḍaren can n iryazen nsen, aṯen ssekken ak Bulus ḏ Barnaba ɣar ṯendint n Wanṭakya. Ixḍaren ijjen umi qqaren Silas ḏ yijjen qqaren-as Yahuḏa iƹni wenni umi qqaren Barsaba, ɣarsen ijjen n umcan ḏ ameqqran jar ȓmuminin.

²³Ssekken akiḏsen ṯabrat-a nnan-asen: "Ay ayṯmaṯneɣ war iǧin ca zi Ayṯ-Israʼil ig izeddɣen ḏi Wanṭakya ḏ Surya ḏ lʼiqlim n Kilikya, netseǧam xawem neccin iy iǧan ḏ arrusul ḏ imeqqranen n jmaƹeṯ n ȓmuminin.

²⁴Netsȓa belli can yiwḏan zzayneɣ usin-d ɣarwem bȓa lʼiḏen nneɣ, seddƹen-kenniw siḏfen ḏaywem ccekk s wawaȓ nsen.

²⁵Neccin marra ntafeq, nixḍar can n iryazen aṯen d nessekk ɣarwem ak imƹizzen nneɣ Barnaba ḏ Bulus.

²⁶Iryazen-a ɣamaren s ṯuḏarṯ nsen x yisem n Siḏiṯneɣ Ƹisa Lmasiḥ.

²⁷X manaya nessekk-awem-d uȓa ḏ Yahuḏa-ya ḏ Silas-a bac aḏawem inin s uqemmum nsen min ḏawem d nura ḏi ṯebrat-a.

²⁸Neccin ḏ Arruḥ iqeddsen netwaȓa mliḥ war xawem ntegg bu dqeȓ aṭṭas illa min iǧan wa labud.

²⁹Iƹni aḏ tbeƹƹḏem x lmakla itwaqeddmen i lʼaṣnam, ḏ iḏammen, ḏ min itwajeyyfen, ḏ lfasad. Meȓa ṯbeƹƹḏem x ṯmesȓayin-a wa ataf ṯeggim mliḥ. Akenniw iƹawen Arebbi."

³⁰Yina itwassekken ɣar Wanṭakya ṣafi uwḍen ḏinni, smunen jmaƹeṯ n ȓmuminin ucin-asen ṯabrat nni.

³¹Wami t ɣrin jmaƹeṯ nni farḥen aṭṭas liʼanna ṯcejjeƹ-iṯen.

³²Yahuḏa ḏ Silas niṯni ḏ l'anbiya, tcejjaƹen ȓmuminin s waṭṭas n wawaȓen, ggin ḏaysen uȓ.

³³Qqimen dinni ijjen n lmudda, menbaƹd ssekken-ṯen ȓmuminin nni ḏi ȓehna ɣar yinni iy ṯen d issekken.

³⁴{Walakin Silas igga aḏ iqqim ḏinni.}

³⁵Bulus ḏ Barnaba qqimen ḏi ṯendint n Wanṭakya, seȓmaḏen tbeccaren s wawaȓ n Siḏi Arebbi, niṯni ḏ waṭṭas n yiwḏan.

³⁶Ṯeƹḏu ijjen n ȓweqṯ, inna-as Bulus i Barnaba: Yallah, a neḏweȓ ɣar ayṯmaṯneɣ ḏi kuȓ ṯendint mani nbeccar s wawaȓ n Siḏi Arebbi a nẓer mammec ǧan.

³⁷Barnaba ixes akiḏsen yawi Yuḥanna wenni umi qqaren Marqus.

³⁸Walakin Bulus war ḏas iƹjib ca aṯ awin akiḏsen minzi Marqus tuɣa ismeḥ ḏaysen ḏi Pamfilya war kisen iqqim ca ḏi ȓxeḏmeṯ nni.

³⁹War tafqen qaƹ ḏi ṯmesȓayṯ-a, kuȓ ijjen manis ikka. Barnaba isafar ak Marqus ḏeg uɣarrabu ɣar Qubruṣ.

⁴⁰Bulus netta ixḍar Silas, ffɣen niṯni kellfen-ṯen ȓmuminin x ȓxeḏmeṯ nni nnan axawem yarḍa Siḏiṯneɣ.

⁴¹Iruḥ ɣar Surya ḏ lʼiqlim n Kilikya itegg uȓ ḏi ṯjumaƹ n ȓmuminin.