Read Tarifit Ȓexḏayem 19 Bible Online

Ȓexḏayem 19 - Tarifit bible

Ȓexḏayem 19

¹Apulus wami iǧa ḏi ṯendint n Kurinṯ ḏi lʼiqlim n Uxaya, ikkar arrasul Bulus ikka x ubriḏ n iḏurar yuweḍ ɣar ṯendint n Ufasus. Yufa ḏinni can imeḥḍaren

²inna-asen: "Ma ihwa-d xawem Arruḥ iqeddsen wami ṯumnem?" Nnan-as: "Lla, neccin ƹemmarṣ war xas nesȓi ca x Arruḥ iqeddsen."

³Inna-asen: "Mammec ṯeggim wami ṯetwaṭehharem s waman?" Nnan-as: "Neccin netwaṭehhar s waman ƹlaḥsab mammec ixeddem nnabi Yaḥya."

⁴Inna-asen Bulus: "Qa Yaḥya itṭehhar s waman i yinni ituben, iqqar-asen amneṯ zeg wenni iy d ɣa yasen menbaƹd i nec, iƹni Ƹisa."

⁵Sȓin i manaya ruḥen twaṭehharen s waman ƹlaḥsab isem n Siḏiṯneɣ Ƹisa.

⁶Wami xasen isers Bulus ifassen nnes, ihwa-d xasen Arruḥ iqeddsen. Bḏan ssawaȓen s lluɣaṯ war iǧin bu nsen, ssawaȓen s minzi ƹeȓmen zi Arebbi.

⁷Iryazen nni niṯni can ṯenƹac iḏsen.

⁸Ssenni Bulus yuḏef ɣar ṯemziḏa n Ayṯ-Israʼil, issawaȓ ḏinni s zƹameṯ can n ṯeȓt-chur. Itemnaqac akiḏsen bac aṯen iseqneƹ x ȓmulk n Arebbi.

⁹Ȓebƹaḍ zzaysen ṭṭfen akiḏes ṯaɣennant ugin aḏ amnen, tukkaren ḏi ttaƹlim n Siḏiṯneɣ zzaṯ i yiwḏan. Ssenni iffeɣ-d Bulus zi ṯemziḏa nni yuwi akiḏes imeḥḍaren nnes, kuȓ nhar iseȓmaḏ-iṯen ḏi lmarkez n Tirannus.

¹⁰Iqqim Bulus itegg manayenni ƹamayen. Marra imezḏaɣ n lʼiqlim n Asya sȓin i wawaȓ n Siḏi Arebbi, Ayṯ-Israʼil ḏ iyunaniyen s ṯnayen iḏsen.

¹¹Arebbi itegg lmuƹjizaṯ ḏ ṯimeqqranin x ufus n Bulus.

¹²Iwḏan kessin ȓezyuf ḏ ṯibantiwin tḥaḏan zzaysent Bulus srusan-ṯent x imehȓac. Ȓexddenni ȓehȓacaṯ nni tgenfan, ƹaweḏ teffɣen zzaysen jnun nni iƹeffanen iy ḏaysen.

¹³Ḏinni can israʼiliyen niṯni ḏ iseḥḥaren traḥen zeg umcan ɣar umcan. Tjarraben aḏ sxeḏmen isem n Siḏiṯneɣ Ƹisa bac aḏ sufɣen jnun iƹeffanen zeg yiwḏan. Nnan-asen qa tʼamareɣ-kenniw ƹlaḥsab isem n Ƹisa iy zi itḥeddaṯ Bulus, ffɣeṯ!

¹⁴Amenni iy teggen ijjen n sebƹa n ṯarwa n yijjen n uʼisraʼili qqaren-as Skiba, netta zi arruyas n ȓfuqaha.

¹⁵Ijjen n nhar indeq-d jjenn nni aƹeffan inna-asen qa nec ssneɣ Ƹisa min iƹna, ssneɣ Bulus min iƹna, kenniw min ṯeƹnam?

¹⁶Ȓexddenni inḍew xasen uryaz nni iy ḏi iǧa jjenn aƹeffan iɣeȓb-iṯen marra ijheḏ xasen. Arewȓen zi ṯeddarṯ nni ḏ iƹaryanen jarrḥen.

¹⁷Arrin-asen-d ȓexbar marra imezḏaɣ n Ufasus, iƹni Ayṯ-Israʼil ḏ iyunaniyen s ṯnayen iḏsen. Ṯeȓqef-iṯen ṯiggwḏi uca itwasemɣar isem n Siḏiṯneɣ Ƹisa aṭṭas.

¹⁸Usin-d aṭṭas zeg yinni iy yumnen ȓexxu, ȓexḏayem nsen iy tuɣa ggin ṯiƹeffanin ƹtarfen zzaysent.

¹⁹Aṭṭas n yiwḏan tuɣa ggin ssḥur uwin-d lkutub nsen sḥarrqen-ṯen ɣar barra zzaṯ i kuȓci. Wami ḥesben ttaman n lkutub nni, ufin xemsin aȓaf n dinar.

²⁰Amenni awaȓ n Siḏi Arebbi itentacer yarenni ɣares jjheḏ aṭṭas.

²¹Menbaƹd i manaya, iƹewweȓ Bulus aḏ isafer ɣar Lquds, aḏ ikk x lʼiqlim n Masidunya ḏ lʼiqlim n Uxaya. Inna: Xmi ɣa awḍeɣ ḏinni, itxeṣṣa-ayi ƹaweḏ aḏ raḥeɣ ɣar ṯendint n Ruma!

²²Issekk ɣar Masidunya ṯnayen zeg yinni iy ṯ itƹawanen ijjen qqaren-as Timutawus ijjen qqaren-as Arisṭus, netta Bulus iqqim ijjen n ȓweqṯ ḏi lʼiqlim n Asya.

²³Ḏi ȓweqṯ nni ṯewqeƹ ijjen n ȓfawḍa ṯemɣar x ssabab n ubriḏ n Siḏiṯneɣ.

²⁴Ḏinni ijjen n uryaz qqaren-as Dimitriyus. Netta iḍebbaƹ nnuqarṯ, itṣennaƹ munikuṯ s nnuqarṯ itemcabbahen ḏi zzawyiṯ n lʼaṣnam umi qqaren Ṯarṭamist. Dimitriyus-a isrebbaḥ aṭṭas yina itṣennaƹen munikuṯ-a.

²⁵Iȓaɣa-d x yinni ixeddmen ḏi manayenni ḏ yinni itṣennaƹen ṯimesȓayin nneɣni amenni. Inna-asen: "Ay iryazen, ṯessnem belli nrebbeḥ aṭṭas n tmenyaṯ ḏi ṣṣenƹaṯ-a.

²⁶Aqa twaȓam tesȓam Bulus-a isqenneƹ aṭṭas n yiwḏan ḏi ṯendint-a n Ufasus ƹȓayen uȓa ḏi marra lʼiqlim n Asya, isufuɣ-iṯen zeg ubriḏ nneɣ. Iqqar-aneɣ qa l'aṣnam-a itwaṣenƹen s ifassen qa war ǧin ca ḏ arebbiṯen.

²⁷Xaṭar manaya x ṣṣenƹaṯ nneɣ ataf war ɣares bu lqima. Xaṭar ƹaweḏ uȓa x zzawyiṯ ṯameqqrant n arebbi nneɣ Ṯarṭamist ataf aḏ tneqḍeƹ. Ataf nettaṯ ƹaweḏ imken war ḏayes tɣimi lƹaḍama nnes qaƹ, ṯanita iy ƹebbḏen imezḏaɣ n lʼiqlim-a n Asya marra ḏ ddunect amen-ṯekmaȓ."

²⁸Wami sȓin i wawaȓ-a, ɣeḍben aṭṭas snekkaren ṯɣuyyeṯ qqaren Ṯarṭamist n Ayṯ-Ufasus mecḥaȓ ṯemɣar!

²⁹Ṯewqeƹ ijjen n ȓfawḍa ḏ ṯameqqrant ḏi ṯendint nni amen-ṯekmaȓ. Munen yiwḏan-a uzzȓen ɣar furbu jarren akiḏsen ṯnayen n imeddukaȓ n Bulus iy kiḏes itsafaren, ijjen qqaren-as Ɣayus ijjen qqaren-as Aristarxus, niṯni zi Ayṯ-Masidunya.

³⁰Irezzu Bulus aḏ iḥḍar zzaṯ i ȓɣaci nni, war ṯ jjin ca imeḥḍaren nnes.

³¹Ḥetta can n imxazniyen ḏ imeqqranen zi lʼiqlim nni n Asya iy ǧan ḏ imeddukaȓ n Bulus ssekken ɣares ttaren zzayes nnan-as war traḥ ca ɣar furbu nni.

³²Mxarwaḍen marra iwḏan iy ḏinni imunen, snekkaren ṯɣuyyeṯ kuȓ ijjen min iqqar. Azyen ameqqran war issin mixef ḏin munen.

³³Ḏinni jar ȓɣaci nni ijjen n bnaḏem qqaren-as Iskander. Ƹanen-ṯ israʼiliyen ɣar zzaṯ, ȓaɣan-as-d ȓebƹaḍ zzaysen ḥima aḏ issiweȓ. Itceyyar-asen i ȓɣaci nni s ifassen irezzu aṯen isbedd bac aḏ iḏafeƹ s yijjen n wawaȓ.

³⁴Wami ẓrin ȓɣaci nni netta ḏ aʼisraʼili, munen marra iḏsen can ṯnayen n ṯsaƹƹaṯin snekkaren ṯɣuyyeṯ nnan Ṯarṭamist n Ayṯ-Ufasus mecḥaȓ ṯemɣar!

³⁵Yusa-d naʼib n lḥakem n ṯendint ihedden ȓɣaci nni inna-asen: "Ay iryazen n Ufasus, ma ḏinni ca ḥadd iy war issinen ca belli ṯandint-a n Ufasus ḏ nettaṯ iy iḥeṭṭan zzawyiṯ n Ṯarṭamist ṯameqqrant ḏ uzru nnes amqeddes iy d iwḍan zeg ujenna?

³⁶Manaya war ḏayes bu ccekk. Iḏen itxeṣṣa kenniw aḏ theddnem, war xeddmeṯ ca bȓa ȓaƹqeȓ.

³⁷Ṯuwim-d ḏanita iryazen-a, war xewwnen ca zzawyaṯ war nnin bu ȓƹib ḏi arebbi nneɣ.

³⁸Meȓa ixes Dimitriyus ḏ yinni iy kiḏes itṣennaƹen nnuqarṯ aḏ ceṯcan x can yijjen, aqa lmaḥkama mujud u lƹamil mujud aḏ raḥen aḏ ceṯcan s ȓqanun.

³⁹Meȓa ɣarwem ca uceṯci nneɣni, axas ḥekmen ḏi lmajlis n ṯendint.

⁴⁰Ȓexxu aqaneɣ ḏi lxaṭar a netwaḥkem marra iḏneɣ x ȓfawḍa itewqiƹen nhara, neccin war ɣarneɣ bu can n ssabab x ssdaƹ-a."

⁴¹Wami inna awaȓ-a issekk yinni imunen aḏ rewwḥen.