Read Tarifit Ȓexḏayem 23 Bible Online

Ȓexḏayem 23 - Tarifit bible

Ȓexḏayem 23

¹Ixzar mliḥ Bulus ɣar Jmaƹeṯ n lḥukkam n Ayṯ-Israʼil inna-asen: "Ay ayṯma, qa nec ggiɣ lwajib nican ak Arebbi, zi qbeȓ ḥetta nhara nec ḍḍamir inu mertaḥ."

²Ikkar Anas arrayes n ȓfuqaha yumar yinni ibedden ak Bulus aṯ uwṯen ɣar uqemmum.

³Ȓexddenni inna-as Bulus: "Cek ṯeggiḏ am ȓḥiḍ ircan ijjiyaren s jjir, ac yuweṯ Arebbi! Ṯeqqimeḏ cek ḏinni axafi ṯḥekmeḏ ƹlaḥsab ccariƹa, walakin ȓexxu txalafeḏ ccariƹa wami ṯen ṯumareḏ aḏayi uwṯen."

⁴Nnan-as i Bulus yinni ḏinni iḥḍaren: "Ma tukkareḏ cek arrayes n ȓfuqaha n Arebbi?!"

⁵Inna-asen Bulus: "Ay ayṯma, qa nec war ṯ ssineɣ ca tuɣaṯ ḏ arrayes n ȓfuqaha minzi Lkitab iqqar: <Arrayes n ccaƹb, war ḏayes qqar bu ȓƹib.>"

⁶Wami issen Bulus qa ca zzaysen zi ȓḥizeb n iṣadduqiyen ca nneɣni zi ȓḥizeb n ifarrisiyen, ikkar iȓaɣa-d s jjheḏ ḏi Jmaƹeṯ nni n lḥukkam jarasen inna-asen: "Ay ayṯma, qa nec ḏ afarrisi mmis n ifarrisiyen! Aqa tḥakamem xafi wami nec ɣari lʼamal aḏ d kkaren yiwḏan zi ȓmewṯ ḏi Lqiyama."

⁷Wami inna manaya iwqeƹ ijjen n lxilaf jar ifarrisiyen ḏ iṣadduqiyen, Jmaƹeṯ nni n lḥukkam mesfraqen jarasen.

⁸(Minzi iṣadduqiyen qqaren qa war ḏinni lla Lqiyama, lla lmalaʼikaṯ, lla jnun, walakin ifarrisiyen qqaren marra manaya iǧa.)

⁹Iwqeƹ ijjen n ssdaƹ imɣar, kkaren ȓebƹaḍ zeg imseȓmaḏen n ccariƹa niṯni ḏ ifarrisiyen temnaqaren s jjheḏ qqaren: "Neccin war ḏas ntif bu can lɣaleṭ ḏi bnaḏem-a, imken issiweȓ akiḏes can n jjenn niɣ ḏ can n lmalaʼika."

¹⁰Wami bḏan tmenɣan s jjheḏ ƹlaḥsab lxilaf nni, iggweḏ arrayes n ȓƹaskar aḏ mezqen Bulus. Yumar ȓƹaskar nnes aḏ hwan aḏ d xeḍfen Bulus zi ȓwesṭ nsen, aṯ siȓin ɣar lqecla.

¹¹Ǧiȓeṯ nni ibedd-d Siḏiṯneɣ ɣar Bulus inna-as: "Egg zƹameṯ! Mammec iy zzayi ṯcehḏeḏ ḏi ṯendint n Lquds, u labud ƹaweḏ azzayi ṯcehḏeḏ ḏi ṯendint n Ruma."

¹²Wami d iṣbeḥ ȓḥaȓ ciṭṭnen Ayṯ-Israʼil, weƹḏen Arebbi ḥarrmen ixef nsen war tetten war sessen aȓ ɣa nɣen Bulus.

¹³Ktar zi arbeƹin iḏsen ig iciṭṭnen ḏi manaya.

¹⁴Ruḥen ɣar arruyas n ȓfuqaha ḏ imeqqranen n Ayṯ-Israʼil nnan-asen: "Neccin newƹeḏ Arebbi nḥarrem ixef nneɣ war ntett walu aȓ ɣa nneɣ Bulus neccin.

¹⁵Ȓexxu Jmaƹeṯ n lḥukkam ḏ kenniw ttarem zi arrayes n ȓƹaskar n arrumanus bac aɣarwem d issekk Bulus. Ggeṯ ixef nwem ṯexsem akiḏes ṯeggem lʼistijwab mliḥ. Neccin aqaneɣ mujud bac aṯ nneɣ qbeȓ iy d ɣa yaweḍ."

¹⁶Mmis n učmas n Bulus yarra-d ȓexbar x min ciṭṭinen yiwḏan nni, iruḥ ɣar lqecla yuḏef ḏinni iƹaweḏ-as manayenni i Bulus.

¹⁷Iȓaɣa-d Bulus x yijjen n uƹaskari ḏ ameqqran n arrumanus inna-as: "Awi aḥenjir-a ɣar arrayes nwem aqa ɣares can wawaȓ aḏas ṯ yini."

¹⁸Yuwi-ṯ ɣar arrayes n ȓƹaskar inna-as qa iȓaɣa-d xafi Bulus ameḥbus nni ittar zzayi inna-ayi aḏac d awiɣ aḥenjir-a aqa ɣares can wawaȓ aḏac ṯ yini.

¹⁹Arrayes nni n ȓƹaskar iṭṭef aḥenjir nni ḏeg ufus, yuwi-ṯ ɣar can ṯɣemmarṯ waḥḏes inna-as: "Min texseḏ aḏayi ṯiniḏ?"

²⁰Inna-as uḥenjir nni: "Israʼiliyen ttafaqen jarasen bac azzayek ttaren aḏ d tessekkeḏ ṯiwecca Bulus ɣar Jmaƹeṯ n lḥukkam nsen. Ggin ixef nsen axmi xsen aḏas ggen lʼistijwab mliḥ.

²¹War ṯen tejja ca ac sqenƹen qa ḏinni ktar zi arbeƹin n iryazen wejjḏen i Bulus, weƹḏen Arebbi ḥarrmen ixef nsen war tetten war sessen aȓ ṯ ɣa nɣen. Aqa niṯni wejjḏen, ɣir trajan aḏ twafqeḏ x ṭṭaleb nsen."

²²Issekk arrayes-a n ȓƹaskar aḥenjir nni inna-as: "War tƹawaḏ i ḥadd belli cek ṯenniḏ-ayi i nec ȓexbar-a."

²³Ȓexddenni iȓaɣa-d arrayes nni n ȓƹaskar i ṯnayen n imeqqranen nnes inna-asen: "Swejḏeṯ miyytayen n ȓƹaskar ḏ sebƹin n yinni iy inyin x yiysan ḏ miyytayen zeg yinni ikessin ikeccuḍen ɣarsen ṯicceṭ n wuzzeȓ, aḏ traḥem ɣar tesƹa n ǧiȓeṯ ɣar ṯendint n Qayṣariya.

²⁴Swejḏeṯ i Bulus minxef ɣa iney bac aṯ tsiwḍem ḏi lʼaman u ḍaman ɣar Lwali Filikes."

²⁵Uca yura ijjen n ṯebrat i Lwali Filikes inna-as ḏayes:

²⁶"A si Lwali Filikes, nec Kludyus Lisyas tseǧameɣ xak.

²⁷Aryaz-a ṭṭfen-ṯ Ayṯ-Israʼil tuɣa ƹȓayen aṯ nɣen. Wami d arriɣ ȓexbar qa netta ɣares ljinsiya n arrumanus, ruḥeɣ nec ḏ ȓƹaskar inu nsenjem-iṯ-iḏ.

²⁸Rezzuɣ aḏ ssneɣ nec ttuhmaṯ iy xas ggin, uwiɣ-ṯ ɣar Jmaƹeṯ n lḥukkam nsen.

²⁹Ufiɣ ttuhmaṯ nni niṯenti ḏ can ṯmesȓayin x ccariƹa nsen waha. War xas ufiɣ bu can ttuhma isḏaheǧ xas ȓmewṯ niɣ ḏ ȓeḥbes.

³⁰Wami d arriɣ ȓexbar ciṭṭnen xas, ssekkeɣ-ṯ-iḏ ɣarek ḏeɣya. Umareɣ yinni xas iy ggin ttuhmaṯ aḏac ƹawḏen min ɣarsen ḍed nnes."

³¹Ssenni nefḏen ȓƹaskar ƹlaḥsab min zi ṯen yumar. Uwin Bulus s ǧiȓeṯ ɣar ṯendint n Antipatris. Ṯiwecca nnes ḏewȓen-d ȓebƹaḍ n ȓƹaskar ɣar lqecla nsen, yinni iy inyin x yiysan kemmȓen x ubriḏ nsen ak Bulus uwḍen ɣar Qayṣariya. Kellfen ḏinni Lwali x Bulus sellmen-as ṯabrat nni.

³⁴Wami t iɣra Lwali inna-as i Bulus man lʼiqlim iy ɣar twaḥsabeḏ cek? Wami ḏas inna Bulus nec zi lʼiqlim n Kilikya inna-as Lwali: "Nec aḏ iȓiɣ x ljelsa nnec xmi d ɣa awḍen yinni iy xak ɣa inin ttuhma." Ssenni yumar axas ƹesssen ḏi ȓeqṣar n Hirudus.