Read Tarifit Ȓexḏayem 24 Bible Online

Ȓexḏayem 24 - Tarifit bible

Ȓexḏayem 24

¹Menbƹad i xemsiyyam ihwa-d ɣar Qayṣaria arrayes n ȓfuqaha Anas akiḏes ȓebƹaḍ n imeqqranen n Ayṯ-Israʼil ḏ ijjen n lmuḥami qqaren-as Tartulus, tahhamen Bulus ɣar Lwali.

²Ȓaɣan-d x Bulus, ibḏa Tartulus itaham-iṯ iqqar: "A si Lwali Filikes, neccin zi ssabab nnec netƹic ḏeg yijjen n ȓehna ḏ ameqqran, u s uƹḏeȓ nnec ṯṣeȓḥeḏ mliḥ ṯuḏarṯ nneɣ ḏi ṯmurṯ-a. Neccin nqebbeȓ manaya, ncekkar-icek aṭṭas ḏi kuȓ ȓweqṯ ḏ kuȓ amcan.

⁴Walakin war xseɣ ca ac sƹeṭṭaȓeɣ aṭṭas, tettareɣ zzayek ƹlaḥsab ȓxaḍar nnec aɣarneɣ ṯesȓeḏ cwayt.

⁵Aryaz-a wanita nufi-ṯ itxarwaḍ waha itegg lfitna jar marra israʼiliyen iy ǧan ḏi marra ddunect. Netta ḏ ijjen n arrayes n lbidƹa n nnaṣara.

⁶Ƹaweḏ irezzu aḏ isexnez ḥetta ṯamziḏa ṯameqqrant. Neccin neṭṭef-iṯ {nexs axas neḥkem ƹlaḥsab ccariƹa nneɣ.

⁷Walakin yusa-d arrayes n ȓƹaskar Lisyas ikkes-aneɣ-ṯ zeg ufus nneɣ s lquwwa.

⁸Yumar yinni iteggen ttuhmaṯ bac aɣarek d asen.} Axmi ḏas ɣa ṯeggeḏ cek s yixef nnec lʼistijwab aḏ tessneḏ minxef ṯ ntaham neccin."

⁹Tafqen israʼiliyen x ttuhmaṯ nni, qqaren qa manayenni iggi-ṯ ḏ ṣṣaḥ.

¹⁰Iceyyar-as Lwali i Bulus bac aḏ issiweȓ. Indeq-d Bulus inna-as: "Nec ssneɣ mecḥaȓ zeg wami cek ṯḥekkmeḏ x ṯmurṯ-a. X manaya farrḥeɣ bac aḏ ḏafƹeɣ x yixef inu.

¹¹Ṯzemmareḏ aḏ tesseqsiḏ nec yallah ṯenƹacar yum zeg wami gaƹƹḏeɣ ɣar Lquds maci ktar, bac aḏ ƹebḏeɣ Arebbi.

¹²War ḏayi ufin ca tmenɣiɣ ak can ḥadd ḏi ṯemziḏa ṯameqqrant niɣ tsamareɣ ȓɣaci ȓa ḏi ṯemziḏawin uȓa ḏi ṯendint.

¹³War ɣarsen bu ddalil x ttuhmaṯ-a iy xafi tqeddamen ȓexxu.

¹⁴Walakin qqareɣ-ac nec taƹtarafeɣ zzaṯec ƹebbḏeɣ Arebbi n ȓejḏuḏ nneɣ ƹlaḥsab abriḏ-a iy ḥessben niṯni zaƹma ḏ lbidƹa. Tamneɣ s marra min itafaqen ak ccariƹa ḏ min d yurin ḏi Lkutub n lʼanbiya.

¹⁵Ɣari lʼamal zi Arebbi mamc ɣarsen iǧa ɣar iryazen-a, iƹni aḏ d kkaren zi ȓmewṯ ṣṣaliḥin ḏ ḍḍalimin.

¹⁶Falihaḏa teggeɣ marra jjheḏ inu bac aḏ ƹiceɣ s yijjen n ḍḍamir mertaḥ zzaṯ i Arebbi ḏ yiwḏan.

¹⁷Menbaƹd i waṭṭas n iseggwusa ƹeqbeɣ-d ɣar ṯendint n Lquds uwiɣ-d can n ṣṣaḏaqa i lʼumma inu, qeddmeɣ ca n dbiḥaṯ.

¹⁸Wami ḏayi ufin ḏi ṯemziḏa ṯameqqrant teggeɣ ȓuḍu. War ufin akiḏi bu ȓɣaci, war teggeɣ bu ssdaƹ. Walakin ḏinni can n israʼiliyen zi lʼiqlim n Asya,

¹⁹itxeṣṣa niṯni aɣarek d asen s yixef nsen ḏanita bac aḏ inin ttuhmaṯ iy ɣarsen ḍed inu.

²⁰Niɣ aḏac inin yina iy ḏa ibedden man ljarima iy xafi ufin wami beddeɣ zzaṯ i Jmaƹeṯ n lḥukkam nsen.

²¹Wac imken x wawaȓ nni iy nniɣ s uȓaɣi jarasen wami beddeɣ ḏinni? Nniɣ-asen aqa kenniw ṯḥakamem xafi nhara minzi tamneɣ belli iwḏan aḏ d kkaren zi ȓmewṯ ḏi Lqiyama."

²²Filikes netta issen mliḥ x ubriḏ-a n Ƹisa, walakin iʼejjel lḥukem nnes inna-asen: "Ḥetta aḏ d yas arrayes n ȓƹaskar Lisyas ƹaḏ iy ɣa ḥekmeɣ x manaya."

²³Yumar ijjen n umeqqran n ȓƹaskar inna-as: "Ƹess x Bulus ḏi ȓeḥbes." Inna-as: "Walakin uc-as cwayt n lḥurriya, ejj imeddukaȓ nnes aɣares d asen bac aḏayes thillan."

²⁴Ƹḏun can wussan, yusa-d Filikes akiḏes ṯamɣarṯ nnes Drusila, nettaṯ ḏ ṯaʼisraʼiliṯ. Iȓaɣa-d x Bulus iṣenneṭ-as wami issawaȓ x lʼiman zi Ƹisa Lmasiḥ.

²⁵Wami issiweȓ Bulus x min iǧan nican, ḏ mammec ɣa iḥkem bnaḏem x yixef nnes, ḏ Yum Lḥisab ḏ Lƹiqab iy d ɣa yasen uca inexȓeƹ Filikes inna-as: "Ṣafi ȓexxu, ƹqeb. Xmi ɣari ɣa ṯiȓi lfurṣa axak d ȓaɣiɣ."

²⁶Netta ƹaweḏ Filikes irezzu zi Bulus arrecweṯ. S manaya itȓaɣa-d xas aṭṭas n ṯwaȓaṯin issawaȓ akiḏes.

²⁷Ƹḏun ṯnayen n iseggwusa, iḏweȓ-d Burkyus Fastus ḏeg umcan n Lwali Filikes. Walakin Filikes igga-asen ȓxaḍar i israʼiliyen, ijja Bulus ḏi ȓeḥbes.