Read Tarifit Ȓexḏayem 26 Bible Online

Ȓexḏayem 26 - Tarifit bible

Ȓexḏayem 26

¹Inna-as uzeǧiḏ Aɣribas i Bulus: "Qa neccin nesmeḥ-ac aḏ tdafƹeḏ x yixef nnec." Iceyyar Bulus s ufus nnes ibḏa itḏafaƹ x yixef nnes inna-as:

²"A ssaƹḏ inu nec a si azeǧiḏ Aɣribas wami ḏayi ṯejjiḏ aḏ ḏafƹeɣ x yixef inu nhara zzaṯec cek x marra ttuhmaṯ iy zzayi tahamen Ayṯ-Israʼil.

³Xaṣṣatan minzi cek ṯessneḏ marra lƹadaṯ n Ayṯ-Israʼil ḏ lxilafaṯ nsen. S manaya tettareɣ zzayek aḏ teṣbareḏ aḏayi ṯṣennṭeḏ.

⁴Qa marra Ayṯ-Israʼil ssnen mammec tuɣa ṯeǧa ṯuḏarṯ inu zi ṯemẓi inu iy ƹiceɣ ḏi ṯmurṯ inu, ƹaweḏ uȓa ḏi ṯendint n Lquds.

⁵Niṯni ssnen-ayi aṭṭas zeg wami. Meȓa xsen axafi cehḏen nec ƹiceɣ ḏ afarrisi, ȓḥizeb nni iqesḥen aṭṭas ḏi ddin nneɣ.

⁶Cuf, mayemmi iy ǧiɣ nec nhara ḏi lmaḥkama-ya? Liʼanna ɣari lʼamal zi ȓƹaheḏ nni iy ḏaneɣ yuca Arebbi zi ȓejḏuḏ nneɣ.

⁷Ǧiȓeṯ ḏ nhar ṯenƹac n ṯqebbaȓ n Ayṯ-Israʼil ƹebbḏen Arebbi minzi ɣarsen lʼamal ȓƹaheḏ nni aḏ yiȓi. Cuf, a si azeǧiḏ, lʼamal-a netta ḏ ttuhma iy xafi nnan Ayṯ-Israʼil!

⁸Mayemmi ṯenwim qa Arebbi war itemkin ca aḏ d isnekkar yinni immuṯen zi ȓmewṯ?

⁹Nec qenƹeɣ s yixef inu tuɣa ḍaruri aḏ ggeɣ marra min zemmareɣ bac aḏ ƹarrḍeɣ i yisem n Ƹisa zi Naṣira.

¹⁰Amenni iy ggiɣ ḏi ṯendint n Lquds. S arruxṣa n arruyas n ȓfuqaha tḥebbaseɣ aṭṭas n ȓmuminin ṣṣaliḥin. Xmi xasen taḥkamen s ȓmewṯ, nec tafaqeɣ x manayenni.

¹¹Mecḥaȓ n ṯwaȓaṯin traḥeɣ zi ṯemziḏa ɣar ṯemziḏa tƹeddabeɣ-ṯen, rezzuɣ aḏ ssiwȓen s bezzez ȓƹib ḏi Arebbi. S uɣḍab nni inu traḥeɣ ḥetta ɣar ṯneddam ḏi lxarij bac aṯen ƹeddbeɣ ḏinni.

¹²S manaya iy ruḥeɣ ijjen n nhar ɣar ṯendint n Dimaceq, ysiɣ-d arruxṣa n arruyas n ȓfuqaha ḏ ttesriḥ nsen.

¹³A si azeǧiḏ, wami ggureɣ ɣar uzyen n nhar ẓriɣ ijjen n nnur ḏeg ujenna ṯfawṯ nnes tseqsiq ktar zi ṯfuct, inneḍ-ayi-d itceƹciƹ xafi nec ḏ yinni iy kiḏi igguren.

¹⁴Newḍa marra ɣar ṯmurṯ, sȓiɣ i yijjen n ṯmijja ṯessawaȓ s lluɣa lƹibriya ṯeqqar-ayi-d: A Cawul a Cawul, mayemmi ḏayi tƹeddabeḏ? Teggeḏ am wenni iy ḏi ṯeǧa ṯɣennant isuggur-iṯ Arebbi s ṯsennant.[35]

¹⁵Nniɣ-as: Min ṯeƹniḏ cek a Siḏi? Inna-ayi qa Nec ḏ Ƹisa wenni iy tƹeddabeḏ.

¹⁶Ȓexxu kkar, bedd x iḍaren nnec. Aqa nec meḍhareɣ-ac-d bac ac d ixḍareɣ aḏ tḏewȓeḏ ḏ axeddam inu aḏ tiȓiḏ ḏ ijjen n ccaheḏ x min zzayi teẓriḏ ḏ min ƹaḏ ḏac d ɣa sbeyyneɣ.

¹⁷Ac snejmeɣ zi lʼumma nnec, ac snejmeɣ ƹaweḏ zeg yinni war iǧin ca zi Ayṯ-Israʼil. Ac ssekkeɣ ɣarsen

¹⁸bac aḏasen ṯrezmeḏ ṯiṭṭawin nsen, aṯen ṯesbeƹƹḏeḏ zi ṯaǧest ɣar nnur, aṯen ṯesbeƹƹḏeḏ zi ssulṭa n Cciṭan ɣar Arebbi. Ammu aḏasen twaɣfarent ȓmuƹṣiyaṯ nsen aɣarsen yiȓi umcan ak ṣṣaliḥin iƹni s lʼiman iy ḏayi iy ggin.

¹⁹Nec a si azeǧiḏ Aɣribas, war ƹṣiɣ ca lwaḥi nni iy xafi d ihwan zeg ujenna.

²⁰Lla, tbeccareɣ ḏ amezwaru imezḏaɣ n tendint n Dimaceq, ƹaḏ ḏ imezḏaɣ n ṯendint n Lquds ḏ marra jwayeh n ṯmurṯ n Yahuḏiya, ḏ aneggaru marra yinni war iǧin ca zi Ayṯ-Israʼil. Tbeccareɣ-ṯen aḏ tuben aḏ ḏewȓen ɣar Arebbi, aḏ xeḏmen ȓexḏayem n ttuba iy iǧan n ṣṣaḥ.

²¹X manaya ṭṭfen-ayi Ayṯ-Israʼil ḏi ṯemziḏa ṯameqqrant, xsen aḏayi nɣen.

²²Walakin Arebbi iƹawen-ayi-d zi qbeȓ ḥetta nhara. Ammu aqayi nec ḏanita beddeɣ, tbeccareɣ s umezyan ḏ umeqqran. Qqareɣ ɣir ṯimesȓayin nni iy nnan lʼanbiya ḏ Musa labud aḏ weqƹent.

²³Iƹni, Lmasiḥ wa labud aḏ itwaƹeddeb aḏ ibeccar lʼumma nneɣ s nnur ḏ marra yinni war iǧin ca zi Ayṯ-Israʼil liʼanna ḏ netta iy d ɣa ikkaren ḏ amezwaru zi ȓmewṯ."

²⁴Bulus netta aqaṯ ƹaḏ issawaȓ itḏafaƹ x yixef nnes, ikkar lwali Fastus inna-as s jjheḏ: "A Bulus, cek ma ṯeflippaḏ? Ṯɣuri nnec ṯemɣar qa ṯesbuheȓi-yic!"

²⁵Inna-as Bulus: "A si lwali Fastus, lla nec war flippaɣ ca. Min qqareɣ ḏ ṣṣaḥ u s ȓaƹqeȓ.

²⁶Azeǧiḏ Aɣribas issen netta mliḥ x manaya, nec rezzuɣ akiḏes ssiwȓeɣ s ṣṣaraḥa marra. Nec mesteqneƹ war ṯeqqim uȓa ḏ ijjen n ȓḥajeṯ zi manaya war t issin ca, liʼanna war ṯewqiƹ ca ḏi can n ṯɣemmarṯ waha.

²⁷A si azeǧiḏ Aɣribas, cek ma tamneḏ s lʼanbiya? Nec ssneɣ illa cek tamneḏ."

²⁸Inna-as uzeǧiḏ Aɣribas: "Ma s cwayt n ȓweqṯ ṯa cek ṯenwiḏ aḏayi ṯarreḏ ḏ amasiḥi?"

²⁹Inna-as Bulus: "S cwayt n ȓweqṯ ṯa niɣ s waṭṭas, nec tettareɣ zi Arebbi i cek ḏ yinni iy ḏayi itesȓan nhara aḏ tḏewȓem am nec walakin bȓa snaseȓ-a."

³⁰Ikkar Uzeǧiḏ ḏ Lwali ḏ Brinka ḏ yinni kiḏsen iqqimen.

³¹Fɣen, nnan i wayawya qa bnaḏem-a war itegg ca minxef isḏaheǧ ȓmewṯ niɣ ḏ ȓeḥbes.

³²Inna-as uzeǧiḏ Aɣribas i lwali Fastus: "Bnaḏem-a maƹlik war istanef ddaƹweṯ nnes ɣar Qayṣar ataf tuɣaṯ itwaḍȓeq."