Read Tarifit Ȓexḏayem 3 Bible Online

Ȓexḏayem 3 - Tarifit bible

Ȓexḏayem 3

¹Ijjen n nhar ɣar ṯȓaṯa uƹecci ḏi ȓweqṯ n ṯẓaǧiṯ, Buṭrus ḏ Yuḥanna gaƹƹḏen ɣar ṯemziḏa ṯameqqrant n Ayṯ-Israʼil.

²Ufin ḏinni ijjen n uryaz ḏ anecruf ixȓeq-d amenni. Tawin-ṯ-iḏ yiwḏan ɣar ṯewwarṯ n ṯemziḏa umi qqaren <Ṯawwarṯ ṯaṣebḥant>, srusan-ṯ ḏinni mkuȓ nhar aḏ ittar ɣar yinni itaḏfen ɣar ṯemziḏa ṯameqqrant.

³Wami iẓra unecruf nni Buṭrus ḏ Yuḥanna taḏfen ɣar ṯemziḏa ṯameqqrant, ibḏa itettar-asen ṣṣaḏaqa.

⁴Buṭrus ḏ Yuḥanna xezzaren ḏayes mliḥ, inna-as Buṭrus: "Xzar-d ɣarneɣ!"

⁵Ixzar ɣarsen, itɣiȓ-as aḏas ucen can ȓḥajeṯ.

⁶Indeq-d Buṭrus inna-as: "Nec war ɣari nnuqarṯ niɣ ḏ ddheb. Walakin zi min ɣari nec aḏac ṯ uceɣ. Inna-as: Ƹlaḥsab isem n Ƹisa Lmasiḥ zi Naṣira, kkar uyur!"

⁷Yuca-as fus iṭṭef-iṯ zeg ufus nnes afusi isgaƹƹeḏ-iṯ, ȓexddenni ṯicƹebin[8] nnes ḏ iḍaren nnes genfan.

⁸Inexḍef ibedd x iḍaren nnes ibḏa iggur. Yuḏef akiḏsen ɣar ṯemziḏa ṯameqqrant iggur ineṭṭew iḥemmeḏ Arebbi.

⁹Wami ṯ ẓrin marra iwḏan iggur iḥemmeḏ Arebbi,

¹⁰ƹeqȓen-ṯ nnan ḏ wanita tuɣa itɣiman itettar zzaṯ i Ṯemziḏa ṯameqqrant ɣar ṯewwarṯ umi qqaren <Ṯawwarṯ ṯaṣebḥant.> Qqimen tƹejjben aṭṭas, ḏehhcen zi min ḏas iweqƹen.

¹¹Aryaz nni igenfan iṭṭef ḏi Buṭrus ḏ Yuḥanna. Marra iwḏan nni qqimen ḏehhcen, ruḥen ɣarsen tazzȓen ɣar umcan umi qqaren <Asqif n Suliman.>

¹²Wami ṯen iẓra Buṭrus inna-asen: "Ay iryazen n Ayṯ-Israʼil, mayemmi ṯetƹejjbem x manaya? Mayemmi ḏayneɣ txezzarem ammu? Ma tfekkarem s jjheḏ nneɣ niɣ s ṭṭaƹa nneɣ iy zi narra aryaz-a iggur?

¹³Lla, ḏ Arebbi n ȓejḏuḏ nneɣ iƹni Arebbi n Brahim ḏ Arebbi n Isḥaq ḏ Arebbi n Yaƹqub. Liʼanna ḏ netta iy d isbeyynen lƹaḍama nnes ḏeg uxeddam nnes Ƹisa. Walakin ḏ kenniw iy ṯ isellmen i lḥukkam ṯenkarem-ṯ zzaṯ i Bilaṭus wami tuɣa irezzu aḏas iḍȓeq.

¹⁴Wenni iǧan ƹaḍim ḏ ṣṣaliḥ ṯenkarem-ṯ, wenni iǧan ḏ ameḥbus ḏ lmujrim ṯettarem xas i Bilaṭus aḏawem d itwaḍȓeq.[9]

¹⁵Ṯenɣim wenni iǧan ḏ lʼaṣel n ṯuḏarṯ, walakin Arebbi isekkar-iṯ-iḏ zi ȓmewṯ, neccin necheḏ xas.

¹⁶Ḏeg yisem n Ƹisa iƹni ḏ lʼiman s yisem nnes, aqa aryaz-a iy twaȓam iy ṯessnem iḏweȓ ijheḏ. S lʼiman nnes ḏi Ƹisa iy zi igenfa qaƹ mammec twaȓam marra kenniw.

¹⁷Ȓexxu ssneɣ ay ayṯma belli ṯeggim manayenni i Ƹisa s ȓeqfaȓeṯ nwem kenniw ḏ arruyas nwem.

¹⁸Ammu ikemmeȓ wawaȓ nnes iy inna Arebbi i marra lʼanbiya zi qbeȓ, iƹni itxeṣṣa Lmasiḥ nnes aḏ itwaƹeddeb.

¹⁹S manaya tubeṯ, ḏewȓeṯ ɣar Arebbi ḥima aḏ twakksent ȓmuƹṣiyaṯ nwem. Ḥima aḏ d tas ṯsaƹƹat n lfaraj zi Siḏi Arebbi, aḏ d issekk Lmasiḥ iy tuɣa ḏawem itwaxḍaren zi qbeȓ iƹni Ƹisa.

²¹Itxeṣṣa netta aḏ iqqim ḏeg ujenna aȓ ȓweqṯ iy ḏi ɣa itwaƹḏeȓ kuȓci ƹlaḥsab awaȓen n lʼanbiya ṣṣaliḥin iy ḏasen inna Arebbi ḏeg yijjen n zman.

²²Aqa inna Musa: Aḏawem d yuc Siḏi Arebbi nwem ijjen n nnabi zeg ayṯmaṯwem am nec. Itxeṣṣa aḏ tṣennṭem i marra min ḏawem ɣa yini.

²³Qa marra wenni war ḏas itṣenniṭen ca ɣar nnabi nni aḏ itwakkes zi ȓqum aḏ inehḏem.

²⁴Aqa nnabi Ṣamwil ḏ marra lʼanbiya iy ṯiḏ iḏfaren xebbaren x wussan-a yina iy ḏi neǧa.

²⁵Kenniw ḏ ddurriṯ n lʼanbiya. Kenniw ḏ ṯarwa n ȓƹaheḏ nni ig igga Arebbi ak ȓejḏuḏ nwem. Inna-as Arebbi i Brahim: Zi ddurriṯ nnec iy zi ɣa barkeɣ marra ȓegnus n ṯmurṯ-a.

²⁶Wami ḏawem d yuca Arebbi axeddam nnes Ƹisa, ḏ amezwaru issekk-awem-ṯ-iḏ i kenniw bac akenniw ibarek, iƹni aḏ isbeƹƹeḏ mkuȓ ijjen zzaywem x ccarr nnes."