Read Tarifit Ȓexḏayem 5 Bible Online

Ȓexḏayem 5 - Tarifit bible

Ȓexḏayem 5

¹Ikkar ijjen n uryaz qqaren-as Anas ṯamɣarṯ nnes qqaren-as Safura, iruḥ izzenz ijjen n ṯmurṯ nnes.

²Yuwi-d tmenyaṯ, ca isnuffar-iṯent ɣares, ca yuwi-ṯent isers-iṯent ɣar iḍaren n arrusul. Ṯamɣarṯ nnes ṯargeb qaƹ x manayenni.

³Inna-as Buṭrus: "Ay Anas, mayemmi ṯejjiḏ Cciṭan ac iɣarr yuḏef ḏeg wuȓ nnec ṯesxerrqeḏ x Arruḥ iqeddsen ṯesnuffareḏ can n tmenyaṯ i yixef nnec zi tmenyaṯ n ṯmurṯ nni?

⁴Ṯamurṯ nni tuɣa ṯeǧa nnec marra qbeȓ iy t ɣa ṯezzenzeḏ. Wami ṯezzenzeḏ ṯamurṯ nni, tmenyaṯ nni marra ǧant nnec kulci." Inna-as: "Mayemmi ṯenwiḏ ḏeg wuȓ nnec manaya? Qa war iǧi ṯesxerrqeḏ x yiwḏan, qa ṯesxerrqeḏ x Arebbi."

⁵Wami isȓa Anas i wawaȓ nni, iwḍa ɣar ṯmurṯ immuṯ ḏinni. Iwḏan marra iy d yarrin ȓexbar-a ggwḏen aṭṭas.

⁶Usin-d ccabab keffnen Anas s ȓecfen uwin-ṯ neḍȓen-ṯ.

⁷Ƹḏunt can ṯȓaṯa n ṯsaƹƹaṯin ṯusa-d ṯemɣarṯ n Anas war d ṯarri bu ȓexbar x min iweqƹen.

⁸Indeq-d Buṭrus inna-as: "In-ayi, ma anictuya waha iy zi ṯezzenzem ṯamurṯ nni?" Ṯenna-as nettaṯ: "Wah, anictuya wah."

⁹Inna-as Buṭrus: "Mayemmi ṯtafqem aḏ tzaƹmem aḏ teẓrem Arruḥ n Siḏi Arebbi min ɣa igg?" Inna-as: "Yinni inḍȓen aryaz nnem ḏewȓen-d aqaṯen ɣar ṯewwarṯ, acem ysin uȓa ḏ cem."

¹⁰Ṣafi ṯewḍa ȓexddenni, ṯemmuṯ ḏinni ɣar iḍaren n Buṭrus. Uḏfen ccabab nni ufin-t ṯemmuṯ, ysin-t neḍȓen-t ag uɣezḏis n uryaz nnes.

¹¹Marra jmaƹeṯ n ȓmuminin ḏ marra yinni isȓin x manaya ggwḏen aṭṭas.

¹²Arrusul teggen aṭṭas n lmuƹjizaṯ ḏ lburhanaṯ jar yiwḏan, tmunen marra ḏeg Useqqif n Suliman ḏi Ṯemziḏa ṯameqqrant.

¹³Zeg yiwḏan nni iy war yuminen ca war izƹim ḥadd akiḏsen yiȓi ak ȓmuminin walakin waxxa amenni teḥtaramen-ṯen aṭṭas.

¹⁴Marnin-d aṭṭas n yiwḏan iy yumnen zi Siḏiṯneɣ, zzaysen ijjen n lƹadad n iryazen uȓa ḏ ṯemɣarin.

¹⁵Iwḏan sufuɣen-d imehȓac nsen ɣar znaqi, srusan-ṯen x ṯassuṯ ḏ ijarṯiȓen ḥima axmi ssenni d ɣa iƹḏu Buṭrus, imken aḏ iȓqef ȓebƹaḍ zzaysen s ṯiȓi nnes.

¹⁶Tasen-d aṭṭas n yiwḏan zi ȓeḏcuraṯ iy yuḏsen ɣar Lquds, tawin-d imehȓac nsen ḏ yinni itƹeddaben jnun iƹeffanen niṯni tgenfan marra.

¹⁷Ikkar arrayes n ȓfuqaha ḏ marra yinni kis iǧan niṯni zi ȓḥizeb n iṣadduqiyen, ḥesḏen arrusul aṭṭas.

¹⁸Ṭṭfen-ṯen ggin-ṯen ḏi ȓeḥbes.

¹⁹Walakin s ǧiȓeṯ ijjen n lmalaʼika n Siḏi Arebbi ṯerzem-asen ṯiwwura n ȓeḥbes, ṯsufeɣ-iṯen ṯenna-asen:

²⁰"Ruḥem beddeṯ ḏi ṯemziḏa ṯameqqrant, ḥeddṯem i yiwḏan s marra awaȓen n ṯuḏarṯ-a n jḏiḏ."

²¹Ḏ manayenni iy ggin, uḏfen ɣar ȓefjar ɣar ṯemziḏa ṯameqqrant bḏan seȓmaḏen. Menbaƹd iruḥ arrayes n ȓfuqaha ḏ marra yinni kis iǧan smunen-d Jmaƹeṯ n lḥukkam n Ayṯ-Israʼil iƹni marra imeqqranen nsen, ssenni ssekken iƹessasen n ṯemziḏa aḏ d awin arrusul zi ȓeḥbes.

²²Wami uwḍen iƹessasen nni ɣar ȓeḥbes war ṯen ufin ca ḏinni. Ḏewȓen-d ssiwḍen ȓexbar,

²³nnan-asen: "Nufa ṯiwwura n ȓeḥbes bellƹent mliḥ, ḏ iƹessasen n ȓeḥbes bedden zzaṯ i ṯewwura nni. Neccin wami nuḏef ɣar ḏaxeȓ war ḏinni nufi ḥadd."

²⁴Wami sȓin i wawaȓ-a arruyas n ȓfuqaha ḏ umeqqran n iƹessasen n ṯemziḏa ṯameqqrant ismeḍ-asen ȓaƹjeb ḏeg wuȓ fekkaren mani ɣa yaweḍ manaya?

²⁵Yusa-d ɣarsen ijjen inna-asen: "Iryazen nni iy ṯeggim ḏi ȓeḥbes aqaṯen ḏi ṯemziḏa ṯameqqrant seȓmaḏen iwḏan!"

²⁶Ȓexddenni iruḥ umeqqran nni n iƹessasen ak imxazniyen nnes uwin-d arrusul bȓa lƹunf minzi ggwḏen zi ccaƹb aṯen rejmen s uzru.

²⁷Wami d siḏfen arrusul, sbedden-ṯen zzaṯ i Jmaƹeṯ n lḥukkam n Ayṯ-Israʼil. Inna-asen arrayes n ȓfuqaha:

²⁸"Neccin numar-ikenniw war ṯseȓmaḏem ca ƹlaḥsab isem nni n Ƹisa. Walakin kenniw ṯƹemmarem Lquds s ttaƹlim nwem. Ṯexsem aḏ teggem ȓmewṯ n uryaz-a x yiri nneɣ."

²⁹Indeq-d arrasul Buṭrus ḏ arrusul nneɣni nnan-asen: "Itxeṣṣa-yaneɣ a nṭaƹ i Arebbi maci i yiwḏan!

³⁰Arebbi n ȓejḏuḏ nneɣ isekkar-d Ƹisa wenni iy ṯenɣim kenniw ṯrefƹem-ṯ x ṯeḥnact.

³¹Irfeƹ-iṯ Arebbi aɣares iggi-ṯ x ufusi nnes bac aḏ iḥkem aḏ isenjem, aḏ yuc ttuba i Ayṯ-Israʼil aḏ iɣfar ȓmuƹṣiyaṯ nsen.

³²X ṯmesȓayin-a ncehheḏ xasent neccin ḏ Arruḥ iqeddsen, Arruḥ-a yuci-ṯ Arebbi i yinni ḏas itṭaƹan."

³³Wami sȓin i wawaȓ-a xeyyqen ɣeḍben rezzun aṯen nɣen.

³⁴Ikkar-d ijjen n ufarrisi, netta ḏ amseȓmaḏ n ccariƹa qqaren-as Gamlil iteḥtaram-iṯ ccaƹb marra. Ibedd ḏi ȓwesṭ n Jmaƹeṯ n lḥukkam n Ayṯ-Israʼil, ittar-asen aḏ sufɣen arrusul cwayt n ȓweqṯ ɣar barra.

³⁵Inna-asen: "Ay iryazen n Ayṯ-Israʼil, ḥḍam ixef nwem zi min ṯexsem aḏ teggem i yiwḏan-a!

³⁶Qbeȓ i wussan-a, ikkar-d ijjen n uryaz qqaren-as Aṯuddas. Yarra ixef nnes ḏ ameqqran, ḏfaren-ṯ can arbeƹa miyya n iryazen. Walakin nɣin-ṯ, marra yinni iy ṯ iḏfaren msefraqen ḏewȓen ḏ walu.

³⁷Menbaƹd i uryaz-a Aṯuddas, ikkar-d ijjen nneɣni qqaren-as Yahuḏa zi ṯmurṯ n Ljalil ḏi ȓiyyam n lʼiḥṣaʼ n imezḏaɣ n Ayṯ-Israʼil. Ijmeƹ akiḏes ijjen n lƹadad n yiwḏan, walakin nɣin-ṯ uȓa ḏ netta, yinni iy ṯ iḏfaren kuȓ ijjen manis ikka.

³⁸Ȓexxu akenniw neṣḥeɣ aḏ tbeƹƹḏem i yiwḏan-a, aṯen ṯejjem. Min newwan niɣ ḏ min xeddmen, meȓa zzaysen waha aḏ iqḍa.

³⁹Meȓa manaya zi Arebbi war ṯzemmarem ca axasen ṯeqḍam. Ɣarwem aḏ tafem ixef nwem tmenɣam ak Arebbi!"

⁴⁰Sȓin yiwḏan nni ɣar Gamlil. Uwin-d arrusul ƹannen-asen aƹmuḏ nnan-asen: "Qa ƹemmarṣ aḏ tƹawḏem aḏ tessiwȓem ƹlaḥsab isem n Ƹisa." Ȓexddenni ḍeȓqen-asen.

⁴¹Farḥen arrusul wami ffɣen zi Jmaƹeṯ nni n lḥukkam n Ayṯ-Israʼil, ḥessben belli ɣarsen lhimma x lʼihana nni iy ḏasen iweqƹen x yisem n Ƹisa.

⁴²Qqimen mkuȓ nhar traḥen ɣar ṯemziḏa ṯameqqrant, traḥen zi ṯeddarṯ aȓ ṯeddarṯ seȓmaḏen tbeccaren s Ƹisa belli netta ḏ Lmasiḥ.