Read Tarifit Ȓexḏayem 6 Bible Online

Ȓexḏayem 6 - Tarifit bible

Ȓexḏayem 6

¹Ḏeg wussan nni lƹadad n imeḥḍaren imarni. Ȓmuminin iy ssawaȓen s lluɣa ṯayunaniṯ tceṯcan zeg yinni issawaȓen lƹibriya, qqaren qa neccin ṯajjaȓin nneɣ war ḏasent ticcen bu ȓḥaqq nsent xmi ferrqen lmuƹawana mkuȓ nhar.

²Kkaren ṯenƹac nni n arrusul smunen marra imeḥḍaren nnan-asen: "Neccin arrusul maci maƹqul a nesmeḥ ḏeg wawaȓ n Arebbi bac a nefreq lmuƹawana.

³Ay ayṯma, kkarem awim-d sebƹa n iryazen zzaywem aḏ tiȓi ṯessnem-ṯen aqaṯen mliḥ, aḏ iȓin ccuren s Arruḥ iqeddsen ḏ ȓefhameṯ. Neccin aṯen nkellef s lmuhimma-ya

⁴bac neccin arrusul a nuc ȓweqṯ nneɣ i ṯẓaǧiṯ ḏ uḥeddeṯ."

⁵Iƹjeb-asen ȓḥaȓ i marra jmaƹeṯ. Kkaren ixḍaren ijjen n uryaz qqaren-as Stifan, netta iccur s lʼiman ḏ Arruḥ iqeddsen. Ixḍaren Filippas ḏ Brukurus ḏ Nikanur ḏ Timun ḏ Parminas ḏ Nikulas zeg Wanṭakya, tuɣa isȓem netta ḏi ddin n Ayṯ-Israʼil.

⁶Sebƹa-ya n ṣṣaḥaba qeddmen-ṯen ɣar arrusul, ẓẓuǧen xasen sersen xasen ifassen nsen baraken-ṯen.[10]

⁷Intacar wawaȓ n Arebbi, marnin-d aṭṭas n imeḥḍaren ḏi Lquds, umnen aṭṭas n ȓfuqaha n Ayṯ-Israʼil zi Lʼinjil.

⁸Stifan nni netta iccur s lbaraka n Arebbi ḏ jjheḏ, ixeddem jar yiwḏan lburhanaṯ ḏ lmuƹjizaṯ ḏ ṯimeqqranin.

⁹Kkaren ȓebƹaḍ zi temziḏa umi qqaren <Lbartinun.>[11] Niṯni ḏ israʼiliyen n ṯendint n Lqurina ḏ ṯendint n Iskandariya ḏ inneɣni zi lʼiqlim n Kilikya ḏ lʼiqlim n Asya. Bḏan temnaqaren ak Stifan,

¹⁰walakin war zemmaren aḏ qawwmen ȓefhameṯ ḏ Arruḥ iy zi issawaȓ.

¹¹Kkaren ucin arrecweṯ i can iryazen bac aḏ inin qa neccin nesȓa i Stifan netta iqqar awaȓ war iḥȓin x Musa ḏ Arebbi!

¹²Wami sƹeṣṣben iwḏan uȓa ḏ imeqqranen n Ayṯ-Israʼil ḏ imseȓmaḏen n ccariƹa, ṭṭfen Stifan uwin-ṯ ɣar Jmaƹeṯ n lḥukkam n Ayṯ-Israʼil.

¹³Uwin-d iwḏan axas cehḏen ẓẓur qqaren "Qa bnaḏem-a iqqar awaȓ war iḥȓin x umcan-a amqeddes ḏ Ccariƹa n Musa!

¹⁴Nesȓa-yas iqqar belli Ƹisa zi Naṣira aḏ ihḏem amcan-a aḏ ibeddeȓ lƹadaṯ nni iy ḏaneɣ d ijja Musa."

¹⁵Xezzaren ḏayes ḏi Stifan marra yinni iy ḏinni iǧan ḏi Jmaƹeṯ n lḥukkam n Ayṯ-Israʼil, ufin aɣembub nnes am uɣembub n lmalaʼika.