Read Tarifit Ȓexḏayem 8 Bible Online

Ȓexḏayem 8 - Tarifit bible

Ȓexḏayem 8

¹Wami nɣin Stifan, ijjen qqaren-as Cawul aqaṯ ḏinni iḥḍar itafeq akiḏsen. Nhar nni bḏan tƹeddaben jmaƹeṯ n ȓmuminin ḏi ṯendint n Lquds. Mesfraqen marra ȓmuminin ruḥen ɣar jwayeh n Yahuḏiya ḏ Samarya kuȓ ijjen mani iruḥ, war iqqim ḥadd ḏi Lquds illa arrusul.

²Can n iryazen iy teggwḏen Arebbi neḍȓen Stifan ḥeznen xas aṭṭas.

³Cawul netta irezzu aḏ iqḍa x jmaƹeṯ n ȓmuminin, itaḏef zi ṯeddarṯ ɣar ṯeddarṯ isufuɣ-d iryazen ḏ ṯemɣarin itegg-iṯen ḏi ȓeḥbes.

⁴Ȓmuminin nni imesfraqen traḥen zeg umcan ɣar umcan tbeccaren s wawaȓ n Arebbi.

⁵Filippas iruḥ ɣar ṯendint n Samarya, itḥeddaṯ i imezḏaɣ nnes s Lmasiḥ.

⁶Ssenni marra ȓɣaci nni wami sȓin i wawaȓ nnes wami ẓrin lmuƹjizaṯ nni igga, qqimen tṣennaṭen-as mliḥ ɣar min iqqar.

⁷Jnun iƹeffanen ffɣen zeg waṭṭas n yiwḏan snekkaren ṯɣuyyeṯ s jjheḏ. Aṭṭas n izeḥḥafen ḏ yinni umi mmuṯen iḍaren genfan.

⁸Farrḥen aṭṭas ḏi ṯendint nni.

⁹Ḏinni ḏi ṯendint nni ijjen n useḥḥar qqaren-as Simƹan mecḥaȓ zeg wami isxeddam ssḥur. Iseḏhac marra iwḏan n Ayṯ-Samarya, yarra ixef nnes ḏ ameqqran.

¹⁰Tesȓan-as marra iwḏan s umezyan ḏ umeqqran nnan xas: "Aryaz-a netta ḏ jjheḏ nni ameqqran n Arebbi iy iǧan Ƹaḍim!"

¹¹Tesȓan-as minzi iseḏhac-iṯen aṭṭas n ȓweqṯ s ssḥur nnes.

¹²Walakin wami ṯen ibeccar Filippas s ȓmulk n Arebbi ḏ yisem n Ƹisa Lmasiḥ ȓexddenni umnen tetwaṭehharen s waman s iryazen ḏ ṯemɣarin.

¹³Simƹan netta s yixef nnes yumen itwaṭehhar s waman. Imun ak Filippas itƹejjeb Simƹan wami iẓra lmuƹjizaṯ ḏ lburhanaṯ ḏ ṯimeqqranin ig itewqiƹen.

¹⁴Wami d arrin ȓexbar arrusul ḏi Lquds qa Ayṯ-Samarya qebȓen awaȓ n Arebbi, kkaren ssekken ɣarsen Buṭrus ḏ Yuḥanna.

¹⁵Wami uwḍen, ttaren-as i Arebbi aḏasen yuc Arruḥ iqeddsen.

¹⁶Ƹaḏ war d ihwi Arruḥ uȓa x yijjen zzaysen minzi tuɣa twaṭehharen s waman ƹlaḥsab isem n Siḏiṯneɣ Ƹisa u ṣafi.

¹⁷Ṯumma Buṭrus ḏ Yuḥanna sersen xafsen ifassen nsen uca immuc-asen Arruḥ iqeddsen.

¹⁸Wami sersen arrusul ifassen nsen x yiwḏan itwaȓa Simƹan belli immuc-asen Arruḥ iqeddsen. Ikkar Simƹan irezzu aḏasen yuc tmenyaṯ i arrusul.

¹⁹Inna-asen: "Ucem-ayi uȓa ḏ nec jjheḏ-a ḥima wenni iy xef ɣa serseɣ ifassen inu aḏas immuc Arruḥ iqeddsen."

²⁰Ikkar Buṭrus inna-as: "Lla, jmeƹ nnuqarṯ nnec qa aḏ tiȓi ḏ ṯimessi akiḏec ḏi ȓefna minzi ṯenwiḏ aḏ tesɣeḏ lhadiya n Arebbi s tmenyaṯ!

²¹War ɣarek itiȓi bu umcan uȓa ḏ ȓḥaqq ḏi ȓxeḏmeṯ-a ȓaḥeqqac uȓ nnec war iǧi ca nican ak Arebbi.

²²Tub zi ccarr nnec, ttar i Siḏi Arebbi imken aḏac iɣfar min ṯenwiḏ ḏeg wuȓ nnec.

²³Twaȓiɣ cek ṯeccureḏ s ṯarzugi n ȓeḥseḏ, cek ḏ ameḥbus n ccarr."

²⁴Inna-as Simƹan: "Ttareṯ akiḏi ɣar Siḏi Arebbi ḥima war ḏayi tewqiƹ uȓa ḏ ijjen n ȓḥajeṯ zi min ṯennim."

²⁵Wami Buṭrus ḏ Yuḥanna cehḏen x Ƹisa beccaren niṯni s wawaȓ n Siḏi Arebbi, kkaren ḏewȓen ɣar Lquds beccaren s Lʼinjil ḏeg waṭṭas n ȓedcuraṯ ḏi Samarya.

²⁶Ijjen lmalaʼika n Siḏi Arebbi ṯessiweȓ-d ɣar Filippas ṯenna-as: "Kkar, ruḥ ɣar ljanub ekk x ubriḏ nni n ȓexȓa itawin zi Lquds ɣar Ɣazza."

²⁷Ikkar iruḥ, imseȓqa ḏinni ak yijjen n uryaz netta ḏ aḥabaci ḏ axaṣyuni.[19] Netta zeg imeqqranen n lmalika n Lḥabaca qqaren-as nettaṯ Kandaka, netta ig itkellafen x ṣṣenduq n tmenyaṯ n lmalika nni. Tuɣa iruḥ ɣar Lquds aḏ iƹbeḏ Arebbi,

²⁸iḏweȓ-d ɣar Lḥabaca inya x ukarru nnes iqqar ḏi Lkitab n nnabi Icaƹya.

²⁹Inna-as Arruḥ n Arebbi i Filippas: "Yallah, mun ak ukarru-yin."

³⁰Yuzzeȓ Filippas ɣar uḥabaci nni itsȓa-yas iqqar ḏi Lkitab n nnabi Icaƹya. Inna-as: "Ma ṯfehmeḏ min ṯeqqareḏ?"

³¹Inna-as uḥabaci nni: "Nec, mammec ɣa ggeɣ aḏ fehmeɣ meȓa war ḏayi isefhem can yijjen? Yallah ney-d akiḏi ḏeg ukarru-ya."

³²Aqa lʼayaṯ nni iy iqqar uḥabaci ḏi Lkitab: <Netta amecnaw aḥuȓi iy tawin aḏas ɣarṣen, amecnaw izmar iy iḏweȓ ḏ azeyzun zzaṯ i yinni itȓassen ṯaḍufṯ nnes, ammen war irezzem ca netta aqemmum nnes.

³³Ḍeȓmen-ṯ, ksin-as ȓḥaqq nnes. War ɣares ṯeǧi ddurriṯ axas yiȓi wawaȓ. Ṯuḏarṯ nnes twakkes x ṯmurṯ-a.>

³⁴Isseqsa uḥabaci nni Filippas inna-as: "Tettareɣ zzayek aḏayi ṯiniḏ, minxef issawaȓ nnabi-ya? Ma x yixef nnes niɣ x can ḥadd nneɣni?"

³⁵Itcarraḥ-as Filippas ibḏa-yas zi lʼayaṯ-a ḏi Lkitab itbeccar-iṯ s Ƹisa.

³⁶Gguren ḏeg ubriḏ uwḍen ɣar can waman. Inna-as uḥabaci nni: "Aqac aman mujud, min ḏayi yuɣen nec war twaṭehhareɣ ca s waman-a?"

³⁷{Inna-as Filippas: "Cek, meȓa ṯumneḏ s marra uȓ nnec qa ṯzemmareḏ aḏ twaṭehhareḏ s waman-a." Yarra xas inna-as: "Wah, nec tamneɣ belli Ƹisa Lmasiḥ netta ḏ Mmis n Arebbi."}

³⁸Yumar uḥabaci aḏ sbedden akarru nni. Hwan s ṯnayen iḏsen ɣar waman, Filippas iṭehhar-as i uḥabaci nni s waman.

³⁹Wami d gaƹƹḏen zeg waman nni, Arruḥ n Siḏiṯneɣ irfeƹ Filippas ssenni. War iqqim ca uḥabaci nni itwaȓa Filippas ktar ƹaḏ, yuyur x ubriḏ nnes s ȓefraḥeṯ.

⁴⁰Filippas yufa ixef nnes ḏi ṯendint n Wacdud, itraḥ zeg umcan ɣar umcan itbeccar s Lʼinjil ḏi marra ibilajen ḥetta aȓ wami yuweḍ ɣar ṯendint n Qayṣariya.