Read Tarifit Ȓexḏayem 9 Bible Online

Ȓexḏayem 9 - Tarifit bible

Ȓexḏayem 9

¹Cawul ƹaḏ itheddaḏ s ȓmewṯ imeḥḍaren n Siḏiṯneɣ. Ikkar iruḥ ɣar arrayes n ȓfuqaha,

²ittar zzayes arruxṣaṯ aṯent iysi ɣar ṯemziḏawin n Ayṯ-Israʼil ḏi Dimaceq bac yinni ɣa yaf ḏeffaren abriḏ n Ƹisa s ṯemɣarin ḏ iryazen aṯen yawi ḏ imeḥbas ɣar Lquds.

³Wami iggur ɣar Dimaceq iqqim-as cwayt aḏ yaweḍ, ƹlaɣafla inneḍ-as-d ijjen n nnur itceƹciƹ-d xas zeg ujenna.

⁴Iwḍa ɣar ṯmurṯ, itesȓa i yijjen n ṯmijja ṯeqqar-as-d: "A Cawul a Cawul, mayemmi ḏayi tƹeddabeḏ?"

⁵Yarra xas Cawul inna-as: "Min ṯeƹniḏ cek a Siḏi?" Ṯenna-as ṯmijja nni: "Nec ḏ Ƹisa wenni iy tƹeddabeḏ."

⁶Inna-as: "Kkar aḏef ɣar ṯendint, aḏac itwanna ḏinni min itxeṣṣa aḏ teggeḏ."

⁷Iryazen nni isafaren ak Cawul bedden ḏinni ḏewȓen war ssiwiȓen ca. Sȓin i ṯmijja walakin war twiȓin ḥadd.

⁸Ikkar Cawul zi ṯmurṯ irzem ṯiṭṭawin nnes iḏweȓ war itwiȓi walu. Ṭṭfen-ṯ zeg ufus nnes uwin-ṯ ɣar Dimaceq.

⁹Iqqim ḏinni ṯeȓtiyyam war itett ca, war isess ca, war itwiȓi ca.

¹⁰Ḏinni ḏi Dimaceq ijjen n umeḥḍar qqaren-as Anas. Imeḍhar-as-d Siḏiṯneɣ ḏi lwaḥi inna-as: "Ay Anas." Yarra xas inna-as: "Aqayi a Siḏi."

¹¹Inna-as Siḏiṯneɣ: "Kkar ruḥ ɣar zzenqeṯ nni umi qqaren <Abriḏ Iseggḏen>, rzu ḏinni ḏi ṯeddarṯ n Yahuḏa x yijjen n uryaz zi ṯendint n Ṭarsus, isem nnes Cawul. Netta itẓaǧa ḏinni.

¹²Tuɣa iẓra ḏi lwaḥi ijjen n uryaz qqaren-as Anas aḏ d yas axas isers ifassen nnes bac aḏ iḏweȓ itwaȓa."

¹³Yarra xas Anas inna-as: "A Siḏi, nec xebbaren-ayi aṭṭas n yiwḏan x bnaḏem-a Cawul, mecḥaȓ iƹeddeb netta ȓmuminin nnec ṣṣaliḥin ḏi Lquds.

¹⁴Ȓexxu aqaṯ ḏa, ucin-as arruxṣa arruyas n ȓfuqaha ḥima aḏ iṭṭef marra yinni iƹebbḏen s yisem nnec."

¹⁵Inna-as Siḏiṯneɣ: "Lla ruḥ, qa aryaz-a ḏ nec iy ṯ ixḍaren aṯ ssekkeɣ ḥima aḏ issiweḍ isem inu i yinni war iǧin ca zi Ayṯ-Israʼil, ḏ izeǧiḏen nsen, ḏ israʼiliyen.

¹⁶Nec aḏas d seḍhareɣ mecḥaȓ iy ɣa itwaƹeddeb u labud x ssabab n yisem inu nec."

¹⁷Iruḥ Anas yuḏef ṯaddarṯ nni isers ifassen nnes x Cawul inna-as: "Ay uma Cawul, nec qa issekk-ayi-d Siḏiṯneɣ Ƹisa, wenni iy ḏac d imeḍharen ḏeg ubriḏ nni iy d ṯuwiḏ. Issekk-ayi-d ɣarek ḥima aḏ tḏewȓeḏ twaȓiḏ aḏ teccareḏ s Arruḥ iqeddsen."

¹⁸Ȓexddenni ṯewḍa-yas-d ijjen n ȓḥajeṯ zi ṯiṭṭawin nnes am ṯeqcurṯ, iḏweȓ itwaȓa. Ikkar itwaṭehhar s waman.

¹⁹Wami icca, iḏweȓ-d ɣares jjheḏ nnes. Iqqim Cawul ȓebƹaḍ n wussan ak imeḥḍaren ḏi Dimaceq.

²⁰Ȓexddenni ibḏa itḥeddaṯ ḏi ṯemziḏawin n Ayṯ-Israʼil iqqar-asen qa Ƹisa ḏ Mmis n Arebbi.

²¹Tƹejjben marra yinni itesȓan qqaren: Ma war iǧi ḏ wanita irzun aḏ iqḍa x yinni itȓaɣan x yisem-a n Ƹisa ḏi Lquds? Ma war iǧi ɣarsen iy d yusa ḏanita bac aṯen iṭṭef aṯen yawi ɣar arruyas n ȓfuqaha?

²²Cawul netta yarni itḥeddaṯ s jjheḏ, iseḏhac Ayṯ-Israʼil ig izeddɣen ḏi Dimaceq, isbeyyen-asen-d s wawaȓ nnes qa Ƹisa ḏ Lmasiḥ.

²³Wami ƹḏun aṭṭas n wussan, mcawaren Ayṯ-Israʼil jarasen ḥima aḏ nɣen Cawul, netta yarra-d ȓexbar. Ǧiȓeṯ ḏ nhar ḥeṭṭan ṯiwwura n ṯendint ḥima aṯ nɣen.

²⁵Ijjen n ǧiȓeṯ imeḥḍaren nnes serwȓen-ṯ, sehwan-ṯ-iḏ s iseɣwan ḏeg yijjen n uqbub[20] zeg yijjen n ṯburjat n ṣṣur n ṯendint.

²⁶Wami d yuweḍ Cawul ɣar Lquds irezzu aḏ imun ak imeḥḍaren, walakin ggwḏen zzayes marra war ḏayes ttiqen ca netta ḏ ameḥḍar n ṣṣaḥ.

²⁷Barnaba ikkar ikellef zzayes yuwi-ṯ ɣar arrusul. Iƹaweḏ-asen xas mammec ḏas d imeḍhar Siḏiṯneɣ i Cawul ḏeg ubriḏ nni ḏ mammec iy kis issiweȓ ḏ mammec itḥeddaṯ s zƹameṯ ƹlaḥsab isem n Ƹisa ḏi Dimaceq.

²⁸Ssenni ṣafi, itraḥ itas-d Cawul akiḏsen ḏi Lquds, itḥeddaṯ s yijjen n zƹameṯ ƹlaḥsab isem n Siḏiṯneɣ.

²⁹Issawaȓ ak israʼiliyen yinni issawaȓen s lluɣa ṯayunaniṯ itemnaqar akiḏsen, ssenni niṯni rezzun aṯ nɣen.

³⁰Wami d arrin ȓexbar ayṯmaṯneɣ, uwin-ṯ ɣar Qayṣariya ssenni ssekken-ṯ ɣar ṯendint n Ṭarsus.

³¹Ḏi ȓweqṯ nni jmaƹeṯ n ȓmuminin ḏi marra jwayeh n Yahuḏiya ḏ Ljalil ḏ Samarya hnan. Twajehḏen, teggwḏen zi Siḏi Arebbi, twacejjaƹen s Arruḥ iqeddsen, tmarnin ḏi lƹadad.

³²Buṭrus itraḥ zeg umcan ɣar umcan, iruḥ iẓra ȓmuminin ṣṣaliḥin iy zeddɣen ḏeg ubilaj n Ludda.

³³Yufa ḏinni ijjen n uryaz qqaren-as Ƹinyas, netta izzeȓ ṯmenya iseggwusa ḏi ṯassuṯ mmuṯen-as iḍaren.

³⁴Inna-as Buṭrus: "A Ƹinyas, qa cek isgenfa-cek Ƹisa Lmasiḥ! Kkar jmeƹ ṯassuṯ nnec." Ȓexddenni ikkar ibedd x iḍaren.

³⁵Marra iwḏan iy zeddɣen ḏeg ubilaj n Ludda ḏ ȓewḍa n Carun ẓrin-ṯ tuben ɣar Siḏi Arebbi.

³⁶Ḏi ṯendint n Yafa ḏinni ijjen n ṯmeḥḍarṯ qqaren-as Ṭabita (ȓmaƹna n yisem-a, <ṯiɣit n uzɣar>). Tegg ȓxir aṭṭas tƹawan imesƹan.

³⁷Ḏi ȓweqṯ nni ṯehȓec ṯemmuṯ, ysint-teṯ sirḏent-teṯ sgaƹƹḏen-teṯ ɣar yijjen n ṯɣurfat.

³⁸Sȓin imeḥḍaren ḏi ṯendint n Yafa belli Buṭrus aqaṯ ḏeg ubilaj n Ludda. Ludda ṯuḏes-d i Yafa, ssekken ɣares ṯnayen n yiwḏan ḥecmen-ṯ nnan-as: "Ƹafek arwaḥ akiḏneɣ ḏeɣya!"

³⁹Ikkar Buṭrus iruḥ akiḏsen. Wami yuweḍ sgaƹƹḏen-ṯ ɣar ṯɣurfat nni. Nnḍent-as-d i netta marra ṯajjaȓin, trunt seḍharent-as ičammiren ḏ izeǧuba tuɣa ṯxeyyeḍ Ṭabita wami tuɣa ṯeǧa akiḏsent.

⁴⁰Ssenni isufeɣ-iṯen Buṭrus marra zi ṯɣurfat, iwḍa x ifadden ibḏa itẓaǧa. Ixzar ɣar ddat nnes inna-as: "Ya Ṭabita, kkar!" Uca nettaṯ ṯerzem ṯiṭṭawin nnes, wami ṯeẓra Buṭrus ṯekkar ṯeqqim.

⁴¹Isiɣ-as fus nnes, isekkar-it-id. Iȓaɣa-d i ȓmuminin ṣṣaliḥin ḏ ṯajjaȓin inna-asen aqa ṯeddar.

⁴²Iffeɣ ȓexbar ḏi ṯendint n Yafa marra, umnen zi Siḏiṯneɣ aṭṭas n yiwḏan.

⁴³Iqqim Buṭrus ḏi Yafa aṭṭas n wussan ak yijjen n bu-yiȓemawen[21] qqaren-as Simƹan.