Read Tarifit Ayṯ-Ruma 10 Bible Online

Ayṯ-Ruma 10 - Tarifit bible

Ayṯ-Ruma 10

¹Inna-asen Bulus: Ay ayṯma, mecḥaȓ tmenniɣ s wuȓ inu tẓaǧiɣ i Arebbi aḏ tenjem lʼumma inu.

²Nec cehhḏeɣ xasen rezzun aḏ ggen lwajib ak Arebbi, walakin war ssinen ca aḏ ggen lwajib.

³Wami war ssinen ca mammec igga Arebbi isemṣȓaḥ akiḏes bnaḏem, kkaren niṯni ḏfaren abriḏ nsen nniṯ war qbiȓen ca abriḏ n Arebbi.

⁴Li'anna Lmasiḥ ḏayes ḏi netta iy ṯkemmeȓ ccariƹa ḥima marra wi zzayes ɣa yamnen aḏ imeṣȓaḥ ak Arebbi.

⁵Cuf, mammec iǧa ubriḏ n ṣṣulḥ ƹlaḥsab ccariƹa? Yura xas Musa inna: Marra wi ɣa ixeḏmen s ṯmesȓayin-a ṯina, ataf azzaysent iƹic.

⁶Walakin min iqqar Lkitab x wenni irezzun aḏ imeṣȓaḥ ak Arebbi azzayes yamen? Iqqar: War qqar ca ḏeg wuȓ nnec: Min iƹna wi ɣa igaƹƹḏen ɣar ujenna (iƹni bac aḏ d isehwa Lmasiḥ)?

⁷Niɣ: Min iƹna wi ɣa ihwan ɣar ȓaǧeɣ bȓa ȓaḥedd (iƹni bac aḏ d yarr Lmasiḥ zeg yinni immuṯen)?

⁸Iwa min iqqar Lkitab? Iqqar: <Awaȓ-a yuḏes i cek, aqaṯ ḏeg uqemmum nnec ḏ wuȓ nnec.> Iƹni awaȓ-a netta ḏ lʼiman iy zi netḥeddaṯ.

⁹Qa meȓa ṯcehḏeḏ s uqemmum nnec illa Ƹisa ḏ Siḏic, meȓa ṯumneḏ s wuȓ nnec illa Arebbi isekkar-iṯ-iḏ zi ȓmewṯ, ataf aḏ tnejmeḏ.

¹⁰Liʼanna s wuȓ nnec cek tamneḏ, ac isemṣȓaḥ Arebbi akiḏes. U s uqemmum nnec cek ṯcehhḏeḏ, cek ṯnejmeḏ.

¹¹Aqa Lkitab iqqar: <Marra wenni zzayes ɣa yamnen war ṯ itxiyyib ca.>

¹²Liʼanna war ḏinni bu ȓfarq jar israʼiliyen ḏ yinni war iǧin ca zi Ayṯ-Israʼil minzi Siḏi Arebbi ḏ ijjen, aqaṯ xaneɣ marra. Itenfeyyaḍ-d ȓxir nnes x marra wenni xas itȓaɣan.

¹³Aqa <Marra wenni iy ɣa iȓaɣan s yisem n Siḏi Arebbi ataf aḏ injem.>[15]

¹⁴Iḏen, mammec ɣa ggen aḏ ȓaɣan x wenni iy zi war yuminen ca? Mammec ɣa ggen aḏ amnen zeg wenni umi war xas sȓin ca? Mammec ɣa ggen axas sȓen meȓa war ḏasen itḥeddiṯ ḥadd?

¹⁵U mammec ɣa ggen aḏ ḥeddṯen meȓa war ḏasen d issekk ḥadd? Aqa iqqar Lkitab: <Mecḥaȓ ṣebḥan iḍaren n yinni itbeccaren s Lʼinjil.>

¹⁶Lʼinjil walakin war ṯ qbiȓen ca marra iwḏan. Aqa min iqqar nnabi Icaƹya zi zman: <A Siḏi Arebbi, wi yumnen s minzi netbeccar?>

¹⁷Falihaḏa, lʼiman itas-d zi min netsȓa, u min ntesȓa netta ḏ awaȓ n Lmasiḥ.

¹⁸Walakin nec tseqsiɣ, Ma war sȓin ca? Wah, sȓin. Aqa min iqqar Lkitab: <Ḏi marra ṯamurṯ iffeɣ-d ṣṣut nsen,[16] awaȓen nsen uwḍen aȓ ȓaḥedd n ddunect.>

¹⁹Ƹaweḏ nec tseqsiɣ, Ayṯ-Israʼil ma war fhimen ca? Ḏ amezwaru inna-asen Musa: <Akenniw jjeɣ aḏ tḥesḏem yinni war iǧin ca ḏ lʼumma, akenniw sƹeṣṣbeɣ s yijjen n lʼumma war ifehhmen.>

²⁰Menbaƹd izƹem nnabi Icaƹya inna: <Yinni war xafi irezzun ca ufin-ayi, smeḍhareɣ-d ixef inu i yinni war xafi itseqsin.>

²¹Walakin x Ayṯ-Israʼil iqqar: <Nec ifassen inu ḍeȓqeɣ-ṯen-d nhar ikmaȓ ɣar yij n ccaƹb iƹṣan, ḏaysen ṯaɣennant.>