Read Tarifit Ayṯ-Ruma 15 Bible Online

Ayṯ-Ruma 15 - Tarifit bible

Ayṯ-Ruma 15

¹Fa neccin ig ijehḏen itxeṣṣa-yaneɣ a narbu ḍḍuƹef n yinni war ijhiḏen ca, maci a negg min ḏaneɣ iteƹjiben i yixef nneɣ u ṣafi.

²Mkuȓ ijjen zzayneɣ itxeṣṣa-yas axas yarḍa wajjar nnes akiḏes igg ȓxir ḥima aḏ ijheḏ.

³Liʼanna Lmasiḥ war iggi ca min ḏas iteƹjiben i yixef nnes, igga mammec iqqar Lkitab: <Ȓbaṭeȓ iy xac nnan ifḍeḥ-ayi.>

⁴Cuf, marra min yurin ḏi Lkutub ḏi zman urin-ṯ bac azzayes neȓmeḏ neccin. Awaȓ n Arebbi itcejjaƹ-aneɣ, itawi-yaneɣ-d ṣṣbar ḥima aɣarneɣ yiȓi lʼamal.

⁵Arebbi iƹni wenni iticcen ṣṣbar itcejjaƹ-ikenniw, ataf akenniw ismun ḥima aḏ tiȓim ḏ ijjen xmi ṯḏeffarem Ƹisa Lmasiḥ,

⁶bac aḏ tḥemḏem Arebbi Babas n Siḏiṯneɣ Ƹisa Lmasiḥ s yijjen n array ḏ yijjen n uqemmum.

⁷S manaya qebȓeṯ ayawya mammec iy kenniw iqbeȓ Lmasiḥ ḥima aḏ tsemɣarem Arebbi.

⁸Cuf, nec qqareɣ-awem Lmasiḥ yusa-d ḥima aḏ yiȓi ḏ axeddam n Ayṯ-Israʼil bac aḏ d ismeḍhar lḥaqiqa n Arebbi aḏ igg min iwƹeḏ ssalaf ṣṣaliḥin.

⁹Ƹaweḏ bac yinni war iǧin ca zi Ayṯ-Israʼil aḏ ḥemḏen Arebbi x arraḥmeṯ nnes. Mammec iqqar Lkitab: <S manaya iy cek ɣa ḥemḏeɣ jar ȓegnus, aḏ ɣennjeɣ izȓan i yisem nnec.>

¹⁰Iqqar Lkitab ƹaweḏ: <Farḥeṯ ya ȓegnus ak ccaƹb nnes!>

¹¹Iqqar ƹaweḏ: <Ḥemḏeṯ Siḏi Arebbi, ya ȓegnus marra iḏwem! Ḥemḏem-ṯ, marra iḏwem ya ccuƹub!>

¹²Iqqar ƹaweḏ nnabi Icaƹya: <Aḏ iɣmi uẓwer n Yassa,[20] netta iy ɣa ikkaren aḏ iḥkem x ȓegnus, aḏayes ggen ȓegnus lʼamal.>

¹³Arebbi wenni iticcen lʼamal, akenniw iccur s ȓefraḥeṯ ḏ ȓehna wami zzayes ṯumnem bac aḏ tenfeyyḍem s lʼamal s jjheḏ n Arruḥ iqeddsen.

¹⁴Ay ayṯma, nec mteyyqen belli kenniw ṯeccurem s ȓxir ḏ marra ṯusna,[21] ṯzemmarem aḏ tesȓemḏem ayawya.

¹⁵Walakin zeƹmeɣ uriɣ ṯabrat-a ɣarwem x ȓebƹaḍ n ṯmesȓayin ḥima war ṯent tettum ca. Liʼanna nec teggeɣ ȓxeḏmeṯ n ȓefqi tbeccareɣ s wawaȓ n Arebbi s lbaraka nni iy ḏayi yuca bac aḏ iȓiɣ ḏ axeddam n Ƹisa Lmasiḥ i kenniw war iǧin ca zi Ayṯ-Israʼil. Ḥima akenniw qeddmeɣ am yijjen n ṣṣeḏqeṯ ṯeṣfa s Arruḥ iqeddsen ḥima at iqbeȓ Arebbi.

¹⁷Falihaḏa s Ƹisa Lmasiḥ aḏ ftaxareɣ s ȓxeḏmeṯ inu i Arebbi.

¹⁸Cuf, zeƹmeɣ aḏ ssiwȓeɣ ɣir x min ixeddem Lmasiḥ x ufus inu ḥima yinni war iǧin ca zi Ayṯ-Israʼil aḏ ṭaƹen i Arebbi s wawaȓ ḏ ȓexḏayem inu,

¹⁹iƹni s jjheḏ n lmuƹjizaṯ ḏ lburhanaṯ iy d yusin s jjheḏ n Arruḥ n Arebbi. Ammu iy beccareɣ s Lʼinjil n Lmasiḥ ḏi mkuȓ amcan iƹni zi ṯendint n Lquds aȓ jwayeh n Ilirya.

²⁰U nec rezzuɣ aḏ tbeccareɣ ȓebda s Lʼinjil ḏi ṯmura mani war xas tesȓin ca x Lmasiḥ bac war benniɣ ca x ca n dsas ig igga ḥadd nneɣni.

²¹Mammec iqqar Lkitab: <Yinni war xas itwaxebbaren aḏ twaȓan, yinni war xas itsȓin aḏ fehmen.>

²²Ḏ wa ḏ ssabab iy ḏayi iṭṭfen aṭṭas n ṯwaȓaṯin war ɣarwem d usiɣ ca.

²³Walakin ȓexxu war ɣari bu umcan aḏ xeḏmeɣ ḏi jwayeh-a, u nec mecḥaȓ zeg wami iy rezzuɣ aḏ d aseɣ akenniw ẓreɣ.

²⁴Xmi ɣa raḥeɣ ɣar Spanya tmenniɣ axawem d kkeɣ, akiḏwem qqimeɣ akiḏwem farḥeɣ cwayt n ȓweqṯ. Nec tmenniɣ zzaywem aḏayi ṯƹawnem aḏ kemmȓeɣ x ubriḏ inu.

²⁵Walakin ȓexxu aqa ggureɣ ɣar ṯendint n Lquds bac aḏ ƹawneɣ ȓmuminin ṣṣaliḥin iy ḏinni.

²⁶Liʼanna ȓmuminin iy iǧan ḏi jwayeh n Masidunya ḏ Uxaya texsen aḏ ƹawnen ipubriṯen iy iǧan jar ȓmuminin ṣṣaliḥin ḏi ṯendint n Lquds.

²⁷Aqa niṯni texsen ad ggen manaya, manaya ḏ ṣṣaḥ ḏ ijjen n lwajib aqaṯ xasen. Mayemmi? Liʼanna yinni war iǧin ca zi Ayṯ-Israʼil meȓa ysin zi lbaraka ruḥiya n israʼiliyen, itxeṣṣa-yasen labud yinni war iǧin ca zi Ayṯ-Israʼil aḏ ƹawnen israʼiliyen s wagȓa nsen.

²⁸Iḏen xmi ɣa kemmȓeɣ ccɣeȓ-a aḏasen ssiwḍeɣ marra lmuƹawana-ya, axawem d kkeɣ xmi ɣa raḥeɣ ɣar Spanya.

²⁹U nec ssneɣ xmi ɣarwem d ɣa aseɣ, aḏ d aseɣ s yijjen n ȓmudd[22] iccur s lbaraka n Lmasiḥ.

³⁰Fa tettareɣ zzaywem ay ayṯma, s Siḏiṯneɣ Ƹisa Lmasiḥ ḏ ȓemḥibbeṯ n Arruḥ n Arebbi aḏ tbeddem akiḏi s ṯẓaǧiṯ nwem ɣar Arebbi s ssabab inu.

³¹Ẓẓaǧeṯ ḥima nec aḏ nejmeɣ zeg ifassen n yinni war yuminen ca ḏi jwayeh n Yahuḏiya, u ƹaweḏ bac ȓxeḏmeṯ inu ḏi Lquds at qebȓen ȓmuminin ṣṣaliḥin iy ḏinni.

³²Ȓexddenni, meȓa ixes Arebbi aɣarwem d aseɣ s ȓefraḥeṯ a nreyyeḥ ag wayawya.

³³Arebbi n ȓehna akiḏwem yiȓi marra iḏwem. Amin.