Read Tarifit Ayṯ-Ruma 16 Bible Online

Ayṯ-Ruma 16 - Tarifit bible

Ayṯ-Ruma 16

¹Fa tweṣṣiɣ-kenniw x učmaṯneɣ Fifi ig ixeddmen i jmaƹṯ n ȓmuminin ḏi ṯendint n Kanxarya.

²Reḥḥbeṯ zzayes ƹlaḥsab Siḏiṯneɣ, iƹni ijjen n ureḥḥeb iy sḏaheǧen ȓmuminin ṣṣaliḥin. Ƹawnem-t ḏi marra min teḥḏaj zzaywem ȓaḥeqqac nettaṯ tƹawan aṭṭas n yiwḏan, tƹawan-ayi uȓa ḏ nec.

³Siwḍem-asen sȓam i Priskila ḏ Wakilas, yinni akiḏi ixeddmen ḏi Ƹisa Lmasiḥ.

⁴Ɣamaren s ṯuḏarṯ nsen x ssabab inu. War iǧi ɣir nec iy ṯen itcekkaren, walakin tcekkarent-ṯen marra ṯijumaƹ n ȓmuminin war iǧin ca zi Ayṯ-Israʼil.

⁵Siwḍem-asen sȓam ƹaweḏ i jmaƹṯ n ȓmuminin itmunan ḏi ṯeddarṯ n ṯnayen-a. Siwḍem-as sȓam i umƹizz inu Ipantus wenni iy yumnen ḏ amezwaru s Lmasiḥ ḏi lʼiqlim n Asya.

⁶Siwḍem-as sȓam i Maryam ig ixeddmen aṭṭas xawem.

⁷Siwḍem-asen sȓam i Andruni ḏ Yunyas ȓeḥbab inu, yinni tuɣa akiḏi ḏi ȓeḥbes. Niṯni maƹrufin jar arrusul, umnen zi Lmasiḥ qbeȓ ma aḏ amneɣ nec.

⁸Siwḍem-as sȓam i Amfilawus, amƹizzi inu ḏi Siḏiṯneɣ.

⁹Siwḍem-asen sȓam i Urban wenni ixeddmen akiḏi ḏi Lmasiḥ ḏ umƹizz inu Staxis.

¹⁰Siwḍem-as sȓam i Apilas wenni itwamellken ḏi Lmasiḥ. Siwḍem-asen sȓam ƹaweḏ i lƹaʼila n Aristubus.

¹¹Siwḍem-as sȓam i Ḥarudi wenni iǧan zi ȓeḥbab inu. Siwḍem-asen sȓam i lƹaʼila n Narqis yinni itamnen s Siḏiṯneɣ.

¹²Siwḍem-asent sȓam i Ḍrifuna ḏ Ḍrifisa ṯinni ixeddmen aṭṭas ḏi Siḏiṯneɣ. Siwḍem-as sȓam i Ṯafersist iy xaneɣ iƹizzen, ṯxeddem aṭṭas ḏi Siḏiṯneɣ.

¹³Siwḍem-asen sȓam i Arufus wenni itwaxḍaren ḏi Siḏiṯneɣ uȓa ḏ yemmas iy ḥessbeɣ am yemma.

¹⁴Siwḍem-asen sȓam i Sinkritus ḏ Filgun ḏ Harmas ḏ Patrubas ḏ Hirmis ḏ ayṯmaṯsen iy kisen iǧan.

¹⁵Siwḍem-asen sȓam i Filuɣi ḏ Julya ḏ Lumbas ḏ Niryus ak učmas ḏ marra ȓmuminin ṣṣaliḥin iy kiḏsen iǧan.

¹⁶Seǧmeṯ x wayawya s yijjen n sȓam iṣfa. Qa marra ṯijumaƹ n Lmasiḥ tseǧament xawem.

¹⁷Ay ayṯma, tettareɣ zzaywem aḏ teḥḍam ixef nwem zeg yinni iferrqen ȓmuminin x wayawya teggen-awem min isefciȓen, iƹni ḍed ṯɣuri nni iy ṯȓemḏem kenniw. Beƹƹḏeṯ xasen x yina.

¹⁸Liʼanna yina war xeddmen ca i Siḏiṯneɣ Ƹisa Lmasiḥ, xeddmen ɣir i uƹeddis nsen waha. S wawaȓ yiziḍen ḏ lmuhawaḍa izewwqen xeddƹen uȓawen n yinni iy ḏi ṯeǧa nniyyeṯ.

¹⁹Kenniw, sȓin xawem iwḏan marra x ṭṭaƹa nwem, nec farḥeɣ zzaywem x manayenni. Walakin xseɣ kenniw aḏ tiȓim ḏ ifṭanen x min iǧan ḏ aṣebḥan, aḏ tɣefȓem x min iǧan ḏ ccarr.

²⁰Arebbi n ȓehna netta ƹȓayen aḏ iȓbeẓ Cciṭan swadday i iḍaren nwem. Akiḏwem yiȓi arḍa n Siḏiṯneɣ Ƹisa Lmasiḥ.

²¹Issiweḍ-awem-d sȓam Timutawus wenni ixeddmen akiḏi, ḏ ȓeḥbab inu iƹni Luqyus ḏ Yasin ḏ Sibatru.

²²Nec Tartyus ssiwḍeɣ-awem-d ijjen n sȓam ḏi Siḏiṯneɣ, nec ig yurin ṯabrat-a.

²³Issiweḍ-awem-d sȓam Ɣayus, ḏ netta iy zzayi ireḥḥben ɣar ṯeddarṯ nnes irzem-it i marra jmaƹṯ n ȓmuminin. Issiweḍ-awem-d sȓam Arisṭus lʼamin n ṣṣenduq n ṯendint,[23] ḏ umaṯneɣ Qartus.

²⁴{Axawem yiȓi marra iḏwem arḍa n Siḏiṯneɣ Ƹisa Lmasiḥ. Amin.}

²⁵Itwabarak Arebbi! Netta ḏ wenni izemmaren aḏawem yuc jjheḏ s Lʼinjil-a iy tbeccareɣ u ƹaweḏ s uḥeddeṯ n Ƹisa Lmasiḥ ƹlaḥsab min d ibanen tuɣaṯ manayenni zi zman inuffar.

²⁶Ȓexxu iban-d manaya i yiwḏan itwassen s Lkutub n lʼanbiya. Arebbi iƹni wenni itduman i ȓebda yumar azzayes amnen marra ȓegnus aḏas ṭaƹen.

²⁷Arebbi waḥḏes iy ɣar ṯeǧa lḥikma, aɣares ṯiȓi lƹaḍama i netta i ȓebda n ȓebdaṯ s Ƹisa Lmasiḥ! Amin.