Read Tarifit Ayṯ-Ruma 2 Bible Online

Ayṯ-Ruma 2 - Tarifit bible

Ayṯ-Ruma 2

¹Iḏen ay aryaz, cek meȓa tƹeyyabeḏ x yiwḏan, ataf war ɣarek bu ȓḥaqq min ma ṯeƹniḏ. Liʼanna xmi tƹeyyabeḏ x can yijjen, tƹeyyabeḏ x yixef nnec, mayemmi? Liʼanna cek teggeḏ kif-kif mammec teggen niṯni!

²Wah, neccin nessen qa lƹiqab n Arebbi ihewwa nican x yinni iteggen ṯimesȓayin-a.

³Ay aryaz, iwa min tfekkareḏ? Ma aḏ tnejmeḏ zi lƹiqab n Arebbi wami tƹeyyabeḏ x yina u cek teggeḏ ṯmesȓayin-a kif-kif am niṯni?

⁴Niɣ ṯseḥqareḏ lḥanana imɣaren n Arebbi ḏ ṣṣbar nnes ḏ ȓxaḍar iy ɣares? Ma war ṯessineḏ Arebbi s lḥanana nnes irezzu ac d isbeyyen abriḏ bac aḏ tubeḏ?

⁵Walakin cek s ṯɣennant-a iy ḏayek ḏ wuȓ nnec war ituben ca tesmuniḏ aɣḍab i yixef nnec aȓ Yum Lḥisab ḏ Lƹiqab, nhar iy ḏi d ɣa imeḍhar ȓḥukem n Arebbi s ȓḥaqq.

⁶Ṯumma aḏ ixeǧes Arebbi mkuȓ ijjen x ȓexḏayem nnes.

⁷Aḏasen yuc ṯuḏarṯ war ifennin ca i yinni iṣebbaren teggen lḥasanaṯ, liʼanna rezzun x lhimma ḏ uweqqar ḏ ṯuḏarṯ nni itduman.

⁸Walakin aɣarsen yiȓi lḥisab ḏ lƹiqab ɣar yinni iy irezzun i yixef nsen waha ḏ yinni war itṭiƹin ca i lḥaqiqa ḏeffaren min war iǧin ca nican.

⁹Aḏ yiȓi uziyyar ḏ tamara x kuȓ bnaḏem iteggen ssayyiʼaṯ, x yinni zi Ayṯ-Israʼil ḏ imezwura ƹaḏ ḏ yinni war iǧin ca zi Ayṯ-Israʼil.

¹⁰Walakin aḏ tiȓi lhimma ḏ uweqqar ḏ ȓehna i marra yinni iteggen lḥasanaṯ, Ayṯ-Israʼil ḏ imezwura ƹaḏ ḏ yinni war iǧin ca zi Ayṯ-Israʼil.

¹¹Liʼanna Arebbi war itegg ca s wuḏemawen.

¹²Cuf, marra yinni iƹeṣṣan niṯni war ɣarsen tiȓi bu ccariƹa, ataf aḏ fnan bȓa ccariƹa. Walakin yinni iƹeṣṣan ataf ɣarsen ccariƹa, aḏ twaḥakmen ƹlaḥsab ccariƹa nni.

¹³Liʼanna iwḏan war tmeṣȓiḥen ca ag Arebbi meȓa tṣennaṭen waha i wawaȓ n ccariƹa; Lla, yinni iteggen array s min ḏayes ḏi ccariƹa, ataf ḏ yinni iy itmeṣȓaḥen ag Arebbi.

¹⁴U ḏ ṣṣaḥ, yinni war iǧin ca zi Ayṯ-Israʼil war ɣarsen ca ccariƹa, maƹlik teggen array s nniyyeṯ nsen min ḏayes ḏi ccariƹa n Musa, ataf niṯni aḏ iȓin ḏ ccariƹa s yixef nsen waxxa war ɣarsen ca ccariƹa n Musa.

¹⁵Yina seḍharen-d belli min yurin ḏi ccariƹa aqaṯ ɣarsen yura ḏeg wuȓawen nsen. Ȓaƹquȓaṯ nsen iy zi ṣaḥḥen manaya, ḍḍamir nsen iƹeǧem-asen xmi teggen min iǧan ḏ aṣebḥan niɣ ḏ min iǧan war iḥȓin.

¹⁶Iqqar Lʼinjil iy zi tḥeddaṯeɣ: Manaya aḏ yiȓi ḏi Nhar nni xmi ɣa iḥaseb Arebbi x ufus n Ƹisa Lmasiḥ marra min inuffaren ḏeg wuȓawen n yiwḏan.

¹⁷Iwa cek, meȓa ṯḥessbeḏ ixef nnec ḏ aʼisraʼili, trajiḏ zi ccariƹa, teftaxareḏ s lƹalaqa nnec ak Arebbi.

¹⁸Meȓa cek ṯessneḏ min ixes Arebbi, ṯessneḏ ƹaweḏ aḏ tixḍareḏ min iǧan nican liʼanna ccariƹa n Musa ṯesfehham-ic.

¹⁹Meȓa cek aqac metʼakked ṯzemmareḏ aḏ tsuyureḏ iḍarɣaȓen, cek ƹaweḏ aqac ḏ nnur i yinni iǧan ḏi ṯaǧest,

²⁰ṯneṣṣḥeḏ yinni war issinen, ṯseȓmaḏeḏ imezyanen, liʼanna ɣarek ḏi ccariƹa n Musa marra ṯusna[1] ḏ lḥaqiqa.

²¹Iwa cek iy iseȓmaḏen yinni, mayemmi war ṯseȓmiḏeḏ ca ixef nnec? Cek tḥeddaṯeḏ ṯeqqareḏ: "War tacar ca." Y cek, ma tacareḏ?

²²Ṯeqqareḏ: "War zenna ca." Y cek, ma ṯzenniḏ? Cek tƹiffiḏ lʼaṣnam. Y cek, ma tacareḏ zi ṯemziḏawin?

²³Cek iteftaxaren zi ccariƹa, ma war tweqqareḏ ca Arebbi xmi ṯƹeṣṣiḏ min ḏayes ḏi ccariƹa n Musa?

²⁴Aqa mammec iqqar Lkitab: <Ay Ayṯ-Israʼil, x ssabab nwem minzi qqaren awaȓen war iḥȓin x yisem n Arebbi yinni war iǧin ca zi Ayṯ-Israʼil.>

²⁵Cek meȓa ṯxeddmeḏ s min ḏayes ḏi ccariƹa, ataf ṭṭahareṯ[2] nnec aḏ tiȓi ɣares arbeḥ. Walakin meȓa ṯƹeṣṣiḏ ccariƹa, ataf aḏ tiȓiḏ axmi war ṯeggiḏ ca ṭṭahareṯ.

²⁶Innama, meȓa ḏinni can yijjen war iggi ca ṭṭahareṯ, netta ixeddem s min ḏayes ḏi ccariƹa n Musa, ataf wanita itwaḥsab axmi igga ṭṭahareṯ.

²⁷Iƹni wenni ixeddmen s min ḏayes ḏi ccariƹa n Musa, waxxa war iggi ca ṭṭahareṯ ḏi ddat, axac iḥkem cek iy ɣar iǧa Lkitab nni ḏ ṭṭahareṯ. Mayemmi? Liʼanna cek ṯƹeṣṣiḏ ccariƹa.

²⁸Liʼanna wenni iǧan ḏ aʼisraʼili ḏ ṣṣaḥ, war iǧi am wenni d itbanen am israʼiliyen ḏi ddat waha. Ƹaweḏ ṭṭahareṯ n ṣṣaḥ war ṯeǧi ca ḏ ṯenni d itbanen ɣar barra waha x ddat.

²⁹Walakin aʼisraʼili iǧan ḏ ṣṣaḥ itiȓi ɣares manaya ɣar ḏaxeȓ. U ḏ ṭṭahareṯ n ṣṣaḥ tiȓi ḏeg wuȓ s Arruḥ n Arebbi, war iǧi bu s ccariƹa. Bnaḏem-a war ṯ tcekkaren ca yiwḏan, itcekkar-iṯ Arebbi.