Read Tarifit Ayṯ-Ruma 4 Bible Online

Ayṯ-Ruma 4 - Tarifit bible

Ayṯ-Ruma 4

¹Iwa min ɣa nini x jeddiṯneɣ Brahim? Min ḏas iweqƹen i netta?

²Maƹlik netta isemṣȓaḥ-iṯ Arebbi akiḏes ƹlaḥsab ȓexḏayem nnes,[5] ataf Brahim ɣares ȓḥaqq iy zi ɣa iftaxer zeg yixef nnes walakin zzaṯ i Arebbi lla.

³Mamc iqqar Lkitab: <Uca yumen Brahim zi Arebbi, ikkar Arebbi isemṣȓaḥ-iṯ akiḏes s lʼiman nni.>

⁴Fa wenni ɣa iggen can ȓxeḏmeṯ, ma isḏaheǧ axas itwaxeǧes niɣ lla? Wah, manaya ḏ texȓiseṯ nnes maci ḏ kadu.

⁵Wenni war itwekkiȓen[6] x ȓexḏayem ig itegg, itwekkiȓ x Arebbi itarran lƹaṣi ɣar ubriḏ, wanita isemṣȓaḥ-iṯ Arebbi akiḏes s lʼiman iy ḏayes.

⁶Nnabi Dawed uȓa ḏ netta, issawaȓ x ssaƹḏ n bnaḏem wami ṯ isemṣȓaḥ Arebbi akiḏes bȓa ȓexḏayem. Iqqar:

⁷<Ssaƹḏ n yinni umi twaɣfarent ssayyiʼaṯ nsen, twamḥant ȓmuƹṣiyaṯ nsen.

⁸Ssaƹḏ n wenni war itḥisib Siḏi Arebbi x ȓmuƹṣiyaṯ nnes.>

⁹U ssaƹḏ-a, ma n yinni waḥeḏsen ig iteggen ṭṭahareṯ niɣ uȓa ḏ yinni war iteggen ca ṭṭahareṯ? Cuf, neccin neqqar: "Arebbi isemṣȓaḥ Brahim akiḏes s lʼiman nnes."

¹⁰Meȓmi iy ṯ isemṣȓaḥ akiḏes Arebbi? Ma qbeȓ ma aḏ igg ṭṭahareṯ nnes niɣ menbaƹd ma t igg? Lla, maci menbaƹd i ṭṭahareṯ nnes walakin qbeȓ.

¹¹Ṯumma ṭṭahareṯ-a ṯusa-as-d ḏ ijjen n lƹalama ḏ ijjen n ddalil belli Arebbi isemṣȓaḥ-iṯ akiḏes s lʼiman nni iy tuɣa ḏayes qbeȓ ma aḏ iṭehhar. Mayemmi manaya? Bac aḏ yiȓi Brahim ḏ jeddiṯsen n yinni marra itamnen waxxa war ggin ca ṭṭahareṯ, bac uȓa ḏ yinni aṯen isemṣȓaḥ Arebbi akiḏes.

¹²U netta ḏ jeddiṯsen ƹaweḏ uȓa n yinni iggin ṭṭahareṯ, walakin maci ggin ṭṭahareṯ u ṣafi. Lla, itxeṣṣa-yasen aḏ ḏeffaren ȓaṯar n lʼiman mamc tuɣa iǧa ɣar jeddiṯneɣ Brahim wami tuɣa ƹaḏ war iggi bu ṭṭahareṯ.

¹³Ȓƹaheḏ iy zi iwƹeḏ Arebbi Brahim ḏ ddurriṯ nnes ḥima aḏ iwareṯ netta ddunect. Ȓƹaheḏ nni war d yusi ca s ccariƹa, yusa-d s lʼiman nni ig isemṣȓaḥen iwḏan ak Arebbi.

¹⁴Maƹlik aḏ warṯen yinni iḏeffaren ccariƹa, ataf lʼiman-a walu, ataf ȓƹaheḏ-a ixwa.

¹⁵Aqa ccariƹa n Musa tawi-d lƹiqab n Arebbi. Walakin mani war tiȓi ca ccariƹa war tiȓi ca ḏinni ȓmuƹṣiyeṯ.

¹⁶S manayenni ȓƹaheḏ-a ibna x lʼiman waḥḏes: Ḥima ȓƹaheḏ-a aḏ d yas zi arḍa nnes, ḥima aṯ iḍmen Arebbi i marra ddurriṯ n Brahim. U maci ɣir wenni iḏeffaren ccariƹa n Musa; Lla, uȓa ḏ wenni icarrcen ḏi lʼiman n Brahim. Netta ḏ jeddiṯneɣ marra.

¹⁷Mammec iqqar Lkitab: <Arriɣ-cek ḏ jeddiṯsen i waṭṭas n ȓegnus.> Ḏinni Brahim zzaṯ i Arebbi iy zi itamen, iƹni wenni d isnekkaren yinni immuṯen, iƹni wenni d ixeȓqen min ƹemmarṣ war iǧin.

¹⁸Waxxa war ḏinni bu lʼamal qaƹ, yumen Brahim igga lʼamal. Amenni iy iḏweȓ ḏ jeddiṯsen i waṭṭas n ȓegnus mammec tuɣa ḏas itwanna zi qbeȓ: <Min iǧan ḏ iṯran ḏeg ujenna amenni iy ɣa ṯiȓi ddurriṯ nnec.>

¹⁹Ṯumma lʼiman nnes war inqiṣ ca waxxa ɣares ƹȓayen miyya n iseggwusa, waxxa issen ixef nnes war izemmar ca ṯamɣarṯ nnes Sara war tirew ca.

²⁰Waxxa amenni war inqiṣ ca lʼiman nnes, war itcekki ca ḏi ȓƹaheḏ nni iy ḏas yuca Arebbi. Walakin yarenni ḏi lʼiman nnes iḥemmeḏ Arebbi,

²¹netta aqaṯ metʼakked aṭṭas Arebbi izemmar aḏ ikemmeȓ x ȓƹaheḏ nnes.

²²S manaya isemṣȓaḥ-iṯ Arebbi akiḏes.

²³Mayemmi iqqar Lkitab qa <Arebbi isemṣȓaḥ-iṯ akiḏes>? Ma iqqar awaȓ-a ƹlaḥsab Brahim waḥḏes?

²⁴Lla, yura ƹaweḏ ƹlaḥsab neccin umi ḏaneɣ isemṣȓaḥ akiḏes wami zzayes numen zi Arebbi wenni iy d isekkaren Siḏiṯneɣ Ƹisa zi ȓmewṯ.

²⁵Itwasellem ḥima aḏ immeṯ x ȓmuƹṣiyaṯ nneɣ, itwasekkar-d ḥima aḏaneɣ isemṣȓaḥ Arebbi akiḏes.