Read Tarifit Ayṯ-Ruma 7 Bible Online

Ayṯ-Ruma 7 - Tarifit bible

Ayṯ-Ruma 7

¹Ay ayṯma, ssawaȓeɣ akiḏwem ṯessnem ccariƹa. Ma war ṯessinem illa ccariƹa ṯḥekkem x bnaḏem iy iddaren waha?

²Maṯalan ḏi ccariƹa, ṯamɣarṯ ṯemȓec meȓa aryaz nnes aqaṯ ƹaḏ iddar, aqat x yiri nnes. Meȓa aryaz nnes immuṯ aqa twafekk zi lqanun n ȓemȓac.

³S manaya, meȓa ṯruḥ ɣar can yijjen nneɣni, aryaz nnes aqaṯ ƹaḏ iddar, ataf twaḥsab ṯezna. Walakin meȓa immuṯ uryaz nnes, ataf twafekk zi lqanun-a. Ȓexddenni meȓa ṯemȓec ak can uryaz nneɣni ataf war twiḥisib ca ṯezna.

⁴Ay ayṯma, amenni iy ṯeǧam uȓa ḏ kenniw. Iƹni twafekkem zi ccariƹa n Musa wami ṯemmuṯ ddat n Lmasiḥ, aqawem x yiri n yijjen nneɣni netta ḏ yiri n Lmasiḥ iy d ikkaren zi ȓmewṯ, ḥima a narew ȓexḏayem ḏ ṯiṣebḥanin i Arebbi.

⁵Liʼanna qbeȓ wami tuɣa ntegg array i ṭṭabiƹa ṯaƹeffant nneɣ, arnint ḏayneɣ ccehawaṯ ḏ ṯiƹeffanin ƹlaḥsab min ḏaneɣ ṯenna ccariƹa, xeddment ccehawaṯ nni ḏi ddat nneɣ uca ntarew ȓexḏayem itawin ɣar ȓmewṯ.

⁶Walakin ȓexxu neccin netwafekk zi ccariƹa-ya iy ḏaneɣ iqqnen, nemmuṯ-as i manayenni. Neccin nƹebbeḏ s yijjen n ubriḏ ḏ jḏiḏ n Arruḥ n Arebbi, maci s nniḍam nni aqḏim iy yurin ḏi Lkitab.

⁷Iwa min ɣa nini? Ma ccariƹa n Musa nettaṯ s yixef nnes ḏ ijjen n ȓmuƹṣiyeṯ? Lla, ƹemmarṣ! Maƹlik ccariƹa war ṯeǧi, ataf war ssineɣ min ṯeƹna ȓmuƹṣiyeṯ. Maƹlik war ḏayes ȓuṣiyeṯ nni <War ƹecceq>, ataf war ssineɣ min iƹna uƹeccaq.

⁸Ṯumma ȓmuƹṣiyeṯ ṯufa ḏayi lfurṣa s ȓuṣiyeṯ-a, ṯarni ḏayi zi kuȓ nnuƹ n uƹeccaq iy iǧan liʼanna ȓmuƹṣiyeṯ bȓa ccariƹa axmi ṯemmuṯ.

⁹Nec qbeȓ ma aḏ ssneɣ ccariƹa, tuɣayi ddareɣ. Walakin wami d ṯusa ȓuṣiyeṯ n Arebbi, ȓmuƹṣiyeṯ axmi ṯekkar-d zi ȓmewṯ uca nec axmi mmuṯeɣ.

¹⁰Ṯumma ufiɣ ȓuṣiyeṯ nni iy d yusin aḏayi ṯuc ṯuḏarṯ, lla, qa nec ṯuwi-yayi ɣar ȓmewṯ.

¹¹Liʼanna ȓmuƹṣiyeṯ ṯufa ḏayi lfurṣa s ȓuṣiyeṯ-a ṯecmeṯ-ayi u ƹaweḏ zzayes zi ȓuṣiyeṯ-a ṯneɣ-ayi.

¹²S manaya ccariƹa n Musa ṯeṣfa, ȓuṣiyeṯ n Arebbi ṯeṣfa, ṯeṣȓaḥ, ṯeṣbaḥ.

¹³Iwa, ma iḏweȓ min iṣebḥan ḏ ssabab iy zi ɣa mmṯeɣ nec? Lla, ƹemmarṣ! Lƹaks, ḏ ȓmuƹṣiyeṯ iy iggin manayenni, ṯesxeddam min iṣebḥan ḥima aḏayi ṯneɣ. Mayemmi? Ḥima aḏ tesmeḍhar ixef nnes nettaṯ ḏ ȓmuƹṣiyeṯ. Ṯumma s lfurṣa n ȓuṣiyeṯ-a ȓmuƹṣiyeṯ ṯesmeḍhar-d bȓa ȓaḥedd mecḥaȓ iqbeḥ ccarr nnes.

¹⁴Fa neccin nessen ccariƹa n Musa zi Arebbi, walakin nec ḏ bnaḏem twammenzeɣ i ȓmuƹṣiyeṯ.

¹⁵War sent tefhimeɣ ca i ȓexḏayem inu liʼanna nec war teggeɣ min xseɣ aṯ ggeɣ, teggeɣ min tƹiffiɣ.

¹⁶U xmi teggeɣ min war xseɣ ca aḏ ggeɣ, ataf wafqeɣ belli ccariƹa n Musa ṯeṣbaḥ.

¹⁷Ṯumma zi ssa aȓ ṯsawent ataf maci ḏ nec iteggen manaya, ḏ ȓmuƹṣiyeṯ nni iy ḏayi izeddɣen.

¹⁸Nec ṭṭabiƹa ṯaƹeffant inu ssneɣ war ḏayes ṯezḏiɣ uȓa ḏ ijjen n ṯmesȓayṯ ḏ ṯaṣebḥant. Liʼanna rezzuɣ aḏ ggeɣ ṯimesȓayin ṯiṣebḥanin, walakin war zemmareɣ aṯent ggeɣ.

¹⁹Ṯimesȓayin nni ṯiṣebḥanin iy texseɣ aṯent ggeɣ war ṯent teggeɣ ca; Lla, ccarr nni iy war texseɣ aṯ ggeɣ teggeɣ-ṯ.

²⁰Meȓa teggeɣ min war texseɣ, ataf nettaṯ ḏ ȓmuƹṣiyeṯ nni iy ḏayi izeddɣen; maci ḏ nec iteggen manayenni.

²¹Falihaḏa nec ufiɣ ḏeg yixef inu ijjen n ṭṭabiƹa, iƹni xmi texseɣ aḏ ggeɣ can ṯmesȓayṯ ḏ ṯaṣebḥant, ufiɣ ḏinni ccarr yuḏes.

²²Liʼanna ḏi nnefs inu nec farḥeɣ s ccariƹa n Arebbi,

²³walakin tafeɣ ijjen n ṭṭabiƹa nneɣni ḏeg yixef inu ig itmenɣan ak min ɣari ḏi ȓaƹqeȓ inu. S ṭṭabiƹa-ya teqqen-ayi ȓmuƹṣiyeṯ nni iy ḏayi izeddɣen ḏeg yixef inu.

²⁴Ya ȓefḍiḥeṯ inu nec! Wi ḏayi ɣa isnejmen zi ddat-a ṯanita n ȓmewṯ?

²⁵Tcekkareɣ Arebbi ƹlaḥsab Siḏiṯneɣ Ƹisa Lmasiḥ! S manaya ḏi ȓaƹqeȓ inu nec ḏ ismeɣ[11] n ccariƹa n Arebbi, nec ḏi ddat inu ḏ ismeɣ n ṭṭabiƹa n ȓmuƹṣiyeṯ.