Read Tarifit Ayṯ-Ruma 9 Bible Online

Ayṯ-Ruma 9 - Tarifit bible

Ayṯ-Ruma 9

¹Ssawaȓeɣ ȓḥaqq ḏi Lmasiḥ war iǧi bu ḏ ixarriqen. Ȓaƹqeȓ inu u ḏ Arruḥ iqeddsen aḏayi ṣaḥḥen min ɣa iniɣ.

²Iƹni, isḥerreq-ayi ijjen n ȓeḥriq aṭṭas ḏeg wuȓ inu war itkemmiȓ ca x ssabab n ȓqum inu, iƹni yinni iǧan zi lʼumma inu. Maƹlik zemmareɣ nec, aḏ twaneƹȓeɣ aḏ twaḥarrmeɣ zi Lmasiḥ bac niṯni war twaneƹƹiȓen ca war twaḥarrimen ca zi Lmasiḥ.

⁴Niṯni ḏ Ayṯ-Israʼil, itbenna-ṯen Siḏi Arebbi. Ismeḍhar-asen-d lƹaḍama nnes, iƹaheḏ-iṯen, yuca-asen ccariƹa n Musa ḏ lƹibada, iwƹeḏ-iṯen.

⁵Usin-d zi ssalaf ṣṣaliḥin, u zeg uẓwer nsen iy d yusa Lmasiḥ ḏ ddat ḏ bnaḏem. Arebbi itwaḥmeḏ i ȓebda, wenni iḥekkmen x marra. Amin.

⁶Walakin, awaȓ n Arebbi ma war injiḥ ca? Lla, injeḥ! Fa maci Ayṯ-Israʼil qaƹ ig iǧan ḏ israʼiliyen ḏ ṣṣaḥ.

⁷Ƹaweḏ war iǧi marra ṯarwa iy d ikkin zi Brahim ḏ ṯarwa nnes n ṣṣaḥ. Inna-as Arebbi: <Ḏ ṯarwa nnec iy d ɣa iffɣen zi mmic Isḥaq iy ɣa itwaḥessben.>

⁸Manaya ixes aḏ yini ṯarwa n Arebbi ḏ ṣṣaḥ twaḥessben zi ṯarwa n ȓƹaheḏ, maci zi ṯarwa n bnaḏem.

⁹Liʼanna ȓƹaheḏ-a iy ḏas yuca Arebbi i Brahim ḏ wanita, inna: <Aḏ d ƹeqbeɣ aseggwas iy d ɣa yasen am ȓweqṯ-a, aḏ afeɣ ij uḥenjir ɣar Sara.>

¹⁰War iǧi bu manayenni waha. Rafiqa ṯeysi aƹeddis ɣares acniwen, babaṯsen netta ḏ jeddiṯneɣ Isḥaq.

¹¹Ṯumma ikkar Arebbi inna-as i Rafiqa qa ameqqran aḏ yiȓi ḏ axeddam ɣar umezyan. Iȓaɣa-yas-d Arebbi i netta waha, niṯni war ggin walu. Tuɣa ƹaḏ war d xȓiqen ca ƹaḏ war ggin ȓxir war ggin ccarr, walakin Siḏi Arebbi ixḍar ijjen zzaysen ismeḍhar-d ȓxaḍar nnes iy ɣa yiȓin.

¹³Mammec iqqar Lkitab: <Ḥibbeɣ Yaƹqub, seḥqareɣ Ƹasu.>

¹⁴Min ɣa nini x manaya? Ma Arebbi iḍeǧem? Lla, ƹemmarṣ!

¹⁵Qa Arebbi inna-as i Musa: <Aḏ reḥmeɣ wenni xseɣ, aḏ ḥinneɣ x wenni xseɣ.>

¹⁶Manaya war iǧi ca zi ȓxeḏmeṯ n bnaḏem niɣ zi min itexs, manaya aqaṯ zi Arebbi wenni ireḥḥmen.

¹⁷Aqa iqqar-as Lkitab i Firƹun: <Ggiɣ-ac ḏ azeǧiḏ ḥima aḏayek d smeḍhareɣ jjheḏ inu, ḥima aḏ itwassen yisem inu ḏi marra ddunect.>

¹⁸Falihaḏa Arebbi ireḥḥem wenni ixes, isɣannan wenni ixes.

¹⁹Iwa a bnaḏem, ma aḏayi ṯiniḏ mayemmi ƹaḏ iy ḏaneɣ itḥasab Arebbi? Ma aḏayi ṯiniḏ ug izemmaren aḏ imɣannen ak min ixes netta?

²⁰Cuf a bnaḏem, min ṯeƹniḏ cek bac ṯzemmareḏ aḏ tarreḏ awaȓ x Arebbi? Ma zemmaren aḏ inin iɣerrafen i wenni iy ṯen iṣenƹen, Mayemmi ḏaneɣ ṯeggiḏ ammu?

²¹Ma war ɣares bu ȓḥaqq ɣar lemƹallem aḏ isexḏem ṯȓaxṯ[14] mammec ixes, iƹni aḏ igg zeg yijjen n ȓƹajneṯ iḏeqqi ijjen n uɣerraf i min iṣebḥan, aḏ igg ijjen i min iƹuffnen?

²²Amenni ig igga Arebbi. Wami ixes aḏ d ismeḍhar aɣḍab nnes aḏ d isbeyyen jjheḏ iy ɣares, iṣebbar aṭṭas x yinni iy xef iɣḍeb iƹni iɣerrafen nni wejḏen aḏ twarzen.

²³Igga amenni liʼanna ixes aḏ ismeḍhar lƹaḍama nnes imɣaren x yina ig irḥem iƹni iɣerrafen-a ig isewjeḏ zi qbeȓ i lƹaḍama, iƹni ḏ neccin. Iȓaɣa-yaneɣ-d i neccin iy d yusin zi Ayṯ-Israʼil uȓa ḏ yinni war iǧin ca zi Ayṯ-Israʼil.

²⁵Mammec iqqar Arebbi ḏi Lkitab n nnabi Hucaƹ: <Yinni tuɣa war iǧin ca ḏ ccaƹb inu, asen ȓaɣiɣ a ccaƹb inu. Ṯenni tuɣa war iƹizzen, as ȓaɣiɣ a ṯamƹizzit inu.>

²⁶U ḏeg umcan nni wenni mani ḏasen inna Arebbi: Kenniw war ṯeǧim ca ḏ ccaƹb inu, ḏinni iy ḏasen ɣa ȓaɣan a ṯarwa n Arebbi iddaren.

²⁷Fa nnabi Icaƹya iȓaɣa netta x Ayṯ-Israʼil inna: <Waxxa lƹadad n Ayṯ-Israʼil igga am yijḏi n ȓebḥar, ḏrus zzaysen iy ɣa inejmen.

²⁸Aqa Siḏi Arebbi war itƹeṭṭiȓ ca aḏ ixḏem ḏi ddunect-a awaȓ ig inna.>

²⁹Ammu ig inna nnabi Icaƹya zi qbeȓ: <Maƹlik war iǧi ḏ Siḏi Arebbi Lƹalamin iy iḥefḍen can ddurriṯ nneɣ, iȓi iwqeƹ-aneɣ amecnaw min iweqƹen i ṯendint n Sadum ḏ ṯendint n Ƹamura.>

³⁰Iwa, min ɣa nini? Yinni war iǧin ca zi Ayṯ-Israʼil tuɣa war rezzun ca ṣṣulḥ ak Arebbi, walakin ufin-ṯ wami umnen.

³¹Ayṯ-Israʼil wami rezzun ijjen n ccariƹa iticcen ṣṣulḥ ak Arebbi, war ufin ca ccariƹa nni.

³²Mayemmi? Liʼanna tuɣa rezzun ṣṣulḥ nni s ȓexḏayem nsen waha bȓa ma aḏ amnen. Nqeȓḍen ḏeg uzru nni iy ḏi tneqȓaḍen yiwḏan.

³³Mammec iqqar Lkitab: <Aqa ggiɣ ḏi ṯendint n Lquds ij n ttirceṯ iy ḏi tenqȓaḍen yiwḏan, ḏ yijjen n uzru iy ṯen iɣeṭṭȓen. Wenni iy zzayes ɣa yamnen, ƹemmarṣ aṯ xeyybeɣ.>