Read Tarifit 1 Ayṯ-Kurinṯ 10 Bible Online

1 Ayṯ-Kurinṯ 10 - Tarifit bible

1 Ayṯ-Kurinṯ 10

¹Cuf ay ayṯma, war xseɣ ca aḏ tettum belli ȓejḏuḏ nneɣ tuɣaṯen qaƹin swadday i useynu[7] nni iḥeṭṭa-ṯen. Marra niṯni ẓwan ɣar ujemmaḍ-in n Ȓebḥar Azeggwaɣ.[8]

²Marra niṯni twaṭehharen s waman ƹlaḥsab Musa wami ƹḏun ḏeg useynu nni ḏ ȓebḥar nni.

³Marra niṯni ccin zeg yijjen n lmakla ruḥiya.

⁴Marra niṯni swin zeg yijjen n ṯsessi ruḥiya. Liʼanna niṯni swin zeg uɣbaȓ nni n uzru[9] ruḥiya iy ṯen iḏeffaren, aɣbaȓ nni n uzru tuɣaṯ netta ḏ Lmasiḥ.

⁵Waxxa amenni ȓebƹaḏ zzaysen waha mixef yarḍa Arebbi, inneɣni menḍaren ḏinni ḏ immurḍas ḏi ȓexȓa nni.

⁶Ṯimesȓayin-a weqƹent ḏ ijjen n lƹibra i neccin. Mayemmi? Bac war ḏayneɣ itiȓi mezȓi x ccarr mammec tuɣa cehhan niṯni.

⁷War ƹebbḏeṯ ca lʼaṣnam mammec ggin ȓebƹaḍ zzaysen. Mammec iqqar Lkitab: <Iwḏan nni qqimen aḏ swen aḏ ccen, uca kkaren aḏ zhun.>

⁸Itxeṣṣa war nfesseḏ ca mammec ggin ȓebƹaḍ zzaysen, mmuṯen wḍan ɣar ṯmurṯ can ṯȓaṯa u ƹicrin aȓaf zzaysen ḏeg yijjen n nhar.

⁹Itxeṣṣa war nzeƹƹem ca a nẓer min ɣa igg Lmasiḥ, mammec ggin ȓebƹaḍ zzaysen uca twanɣen s ifiɣeran.

¹⁰Itxeṣṣa war netceṯca ca mammec ggin ȓebƹaḍ zzaysen wami xasen iqḍa Ƹazȓayen.

¹¹Weqƹent-asen ṯimesȓayin-a ḏ ijjen n lƹibra i neccin. Zemmmen-ṯent ḥima azzaysent neȓmeḏ neccin, iƹni xeḍȓent-id xaneɣ aȓ uneggaru-ya n zmanaṯ.

¹²S manaya wenni umi itɣiȓ-as qa ibedd war iweṭṭi ca, itxeṣṣa-yas aḏ d yarr ȓbaȓ nnes.

¹³Ṯimesȓayin nni ṯinni ig itiȓin ȓebda ak bnaḏem ḏ ṯinni iy kenniw itɣarran. U Arebbi netta ḏayes ttiqeṯ, war kenniw itejji ca aḏ twaɣarram s min war ṯzemmarem aḏ teṣbarem; Lla, aḏawem iḏebbar ijjen n ṯewwarṯ ḥima aḏ teṣbarem i manayenni.

¹⁴S manayenni ay imƹizzen inu, arewȓeṯ zi lʼaṣnam.

¹⁵Ssawaȓeɣ akiḏwem ɣarwem ȓaƹqeȓ nwem, meyyzeṯ min qqareɣ ma ḏ ṣṣaḥ ma lla.

¹⁶Ȓkas nni n lbaraka iy zi netbarak neccin, zzayes iy ncarrec ḏeg iḏammen n Lmasiḥ. Aɣrum nni iy netrezza, zzayes iy ncarrec ḏi ddat n Lmasiḥ.

¹⁷Ḏinni ijjen n ṯxebbast n uɣrum waḥḏes, s ssabab-a neccin ḏ ijjen, waxxa ḏinni aṭṭas iy iḏneɣ. Minzi neccin marra iḏneɣ ncarrec ḏeg yijjen n ṯxebbast.

¹⁸Fekkareṯ ḏi Ayṯ-Israʼil, yak yinni itetten dbiḥaṯ niṯni carrcen ḏi ȓmeḏbaḥ nni, niɣ lla?

¹⁹Min xseɣ nec aḏ iniɣ? Ma qqareɣ belli lmakla nni itqeddamen i lʼaṣnam nettaṯ ḏ ca n ȓḥajeṯ? Niɣ qqareɣ belli lʼaṣnam niṯni ḏ ca n ȓḥajeṯ?

²⁰Lla, walakin qqareɣ belli min ɣarrṣen lkuffar ḏ dbiḥaṯ tqeddamen-ṯent i ccayaṭin maci i Arebbi. Nec war xseɣ ca akiḏsen ṯcarcem ak ccayaṭin.

²¹War ṯzemmarem ca aḏ teswem zi ȓkas n Siḏiṯneɣ niɣ zi ȓkas n ccayaṭin s ṯnayen iḏsen. War ṯzemmarem ca aḏ tcarcem ḏi missa n Siḏiṯneɣ ḏ missa n ccayaṭin s ṯnayen iḏsent.

²²Ma nrezzu a nesƹeṣṣeb Siḏiṯneɣ s lɣira? Niɣ ma nejheḏ xas neccin?

²³Marra ṯimesȓayin ḥeǧȓent, walakin maci marra ṯimesȓayin testenfaƹent. Marra ṯimesȓayin ḥeǧȓent, walakin maci marra ṯimesȓayin aḏaneɣ sjehḏent.

²⁴War rezzuṯ ca ȓxir i yixef nwem, rzum-ṯ i wajjar nwem.

²⁵Cceṯ min ma ṯufim itmenza ḏi ssuq n igezzaren, war tseqsam ca jjeṯ ḍḍamir nwem mertaḥ.

²⁶Liʼanna iqqar: <Ṯamurṯ-a nettaṯ ḏ marra min ḏayes n Siḏi Arebbi.>

²⁷Meȓa can yijjen maci ḏ ȓmumen iƹareḍ-ikenniw bac aḏ teccem akiḏes u kenniw ṯrezzum aḏ traḥem, cceṯ min ma ṯufim sersen-t zzaṯ nwem war tseqsam ca, jjeṯ ḍḍamir nwem mertaḥ.

²⁸Walakin meȓa inna-awem ḥadd qa manaya qeddmen-ṯ ḏ dbiḥeṯ i lʼaṣnam, war t tettem ca. Manaya ƹlaḥsab wenni iy ḏawem ṯ iqqaren u ƹlaḥsab ḍḍamir.

²⁹Iƹni ḍḍamir n wenni iy kenniw iƹarḍen, maci ḏ ḍḍamir nwem. Ȓaḥeqqac nec mayemmi ḍḍamir n yijjen nneɣni aḏ iḥkem x lḥurriya inu?

³⁰Meȓa cekkareɣ Arebbi x can lmakla, mayemmi iy ḏayi ɣa ḥasben x manayenni iy zi cekkareɣ Arebbi?

³¹Iḏen, meȓa ṯsessem niɣ tettem niɣ min ma teggem, ggeṯ marra manayenni bac aḏ itwasemɣar Arebbi.

³²War ɣeṭṭȓeṯ ḥadd waxxa niṯni ḏ israʼiliyen niɣ ḏ iyunaniyen niɣ ḏ jmaƹeṯ n ȓmuminin n Arebbi.

³³Nec rezzuɣ aḏ sarḍiɣ marra iwḏan ḏi marra min teggeɣ. War rezzuɣ ca ȓxir i yixef inu, rezzuɣ-ṯ i marra iwḏan bac aḏ nejmen.