Read Tarifit 1 Ayṯ-Kurinṯ 12 Bible Online

1 Ayṯ-Kurinṯ 12 - Tarifit bible

1 Ayṯ-Kurinṯ 12

¹Fa amma lqudraṯ ruḥiyaṯ. Ay ayṯma, war xseɣ ca axasent tqefaȓem ixef nwem.

²Qa ṯessnem belli wami tuɣa kenniw ḏ lkuffar twasufɣem zeg ubriḏ ɣar lʼaṣnam izeynunen.

³S manayenni xseɣ aḏ tfehhmem mliḥ belli war ḏinni ḥadd aḏ yini s Arruḥ n Arebbi <qa Ƹisa itwanƹeȓ>! Ƹaweḏ war ḏinni ḥadd aḏ yini <qa Ƹisa ḏ Mawlana> illa s Arruḥ iqeddsen.

⁴Fa ḏinni lʼanwaƹ n lqudraṯ, walakin Arruḥ ḏ ijjen.

⁵Ḏinni lʼanwaƹ n lmesʼuliyaṯ, walakin Siḏiṯneɣ ḏ ijjen.

⁶Ḏinni lʼanwaƹ n ȓexḏayem, walakin Arebbi ḏ ijjen ḏ netta iy ṯent isxeddamen marra ḏi kuȓ bnaḏem.

⁷Immuc-as i kuȓ ijjen iy zi ɣa ismeḍhar ȓxeḏmeṯ n Arruḥ iqeddsen bac aḏ infeƹ marra iwḏan.

⁸Ijjen immuc-as s ufus n Arruḥ iqeddsen bac aḏ issiweȓ s lḥikma. Ijjen immuc-as awaȓ n ṯusna[13] s ufus n Arruḥ-a wanita.

⁹Ijjen immuc-as lʼiman ijheḏ s ufus n Arruḥ-a wanita. Ijjen mmucent-as can lqudraṯ bac aḏ isgenfa s ufus n Arruḥ-a wanita.

¹⁰Ijjen immuc-as aḏ igg lmuƹjizaṯ. Ijjen immuc-as aḏ issiweȓ s min iƹȓem zi Arebbi. Ijjen mmucent-as ṯizemmar aḏ imeyyez jar n arruḥaṯ. Ijjen immuc-as aḏ issiweȓ s ȓebƹaḍ n lluɣaṯ ruḥiyaṯ. Ijjen immuc-as aḏ istarjem lluɣaṯ nni.

¹¹Marra ṯimesȓayin-a ṯina twasxeddament s ufus n yijjen n Arruḥ wanita. Ifareq-iṯent i kuȓ ijjen waḥḏes mammec ixes netta.

¹²Cuf, ddat nneɣ nettaṯ ḏ icten ɣares aṭṭas n ṭrufaṯ, waxxa ṭrufaṯ-a aṭṭas iy iǧan niṯni ḏ ijjen. Ammu iǧa Lmasiḥ.

¹³Liʼanna neccin marra netwaṭehhar s waman s yijjen n Arruḥ bac a niȓi ḏ ijjen n jmaƹeṯ, iƹni Ayṯ-Israʼil niɣ ḏ iyunaniyen, ḏ yinni ɣar iǧa bab nsen niɣ ḏ yinni ɣar ṯeǧa lḥurriya nsen. Neccin marra iḏneɣ yuca-aneɣ a nsew iƹni a ncarec ḏeg yijjen n Arruḥ.

¹⁴Ȓexxu cuf, ddat war ɣares ca ijjen n ṭṭarf waha; Lla, ɣares aṭṭas n ṭrufaṯ.

¹⁵Meȓa inna uḍar nnes qa nec war ǧiɣ ca ḏ fus nec war ǧiɣ ca zi ddat-a, maci s wawaȓ-a iy ɣa iffeɣ zi ddat-a.

¹⁶Meȓa inna umejjun nnes qa nec war ǧiɣ ca ḏ ṯiṭṭ nec war ǧiɣ ca zi ddat-a, maci s wawaȓ-a iy ɣa iffeɣ zi ddat-a.

¹⁷Meȓa ddat ṯekmaȓ nettaṯ ḏ ijjen n ṯiṭṭ, manis iy ɣa ṯṣenneṭ? Meȓa ddat ṯekmaȓ nettaṯ ḏ ijjen n umejjun, manis iy ɣa ṯcumm?

¹⁸Walakin ȓexxu Arebbi isettef ṭrufaṯ n ddat issen kuȓ icten mammec ixes at igg.

¹⁹Iwa maƹlik ṭrufaṯ-a marra tuɣa ḏ ijjen, mani ṯeǧa ddat?

²⁰Ȓexxu ḏinni aṭṭas n ṭrufaṯ walakin ḏinni ijjen n ddat waha.

²¹Fa ṯiṭṭ war ṯzemmar aḏas ṯini i ufus qa ṣafi nec war c teḥḏijiɣ ca. Niɣ ƹaweḏ azeǧif aḏasen yini i iḍaren qa ṣafi nec war kenniw teḥḏijiɣ ca.

²²Lla, ṭrufaṯ nni n ddat iy ḏaneɣ tɣiȓ ḍeƹfent ataf niṯenti twaḥḏajant ktar.

²³Ṭrufaṯ nni n ddat iy ḏaneɣ tɣiȓ war ɣarsent bu lqima, ataf aḏasent negg lqima ktar. Ƹaweḏ ṭrufaṯ nneɣ iy war d tbinent ca, ataf netseḏḥa zzaysent ktar.

²⁴Walakin ṭrufaṯ nneɣ iy d tbanent war teḥḏijint ca azzaysent nseḏḥa. Iƹni Arebbi igga lƹaks, isettef ṭrufaṯ n ddat bac aḏ yuc lqima i ṭṭarf nni iteḥḏajan lqima.

²⁵Ammu war iǧi bu lxilaf ḏi ddat, thellant ḏeg waywaya kif-kif.

²⁶Meȓa can yijjen itwaƹeddab, aḏ twaƹeddaben kuȓci. Meȓa can yijjen ṯemmuc-as lqima, akiḏes farḥen marra.

²⁷Fa kenniw ḏ ddat-a iƹni ḏ jmaƹeṯ n Lmasiḥ, kuȓ ijjen zzaywem ḏ ijjen ṭṭarf zzayes.

²⁸Ḏi jmaƹeṯ-a n ȓmuminin iretteb Arebbi ḏ amezwaru arrusul, wis ṯnayen lʼanbiya, wis ṯȓaṯa imseȓmaḏen, menbaƹd yinni isxeddamen lmuƹjizaṯ ḏ yinni ɣar ǧant lqudraṯ bac aḏ sgenfan iwḏan, ḏ yinni itƹawanen, ḏ yinni itkellafen s ȓxeḏmeṯ, ḏ yinni issawaȓen s ȓebƹaḍ n lluɣaṯ ruḥiyaṯ.

²⁹Ma zaƹma marra iḏsen ḏ arrusul? Ma marra iḏsen ḏ lʼanbiya? Ma marra iḏsen ḏ imseȓmaḏen? Ma marra iḏsen sxeddamen lmuƹjizaṯ?

³⁰Ma marra iḏsen ɣarsen lqudraṯ aḏ sgenfan? Ma marra iḏsen ssawaȓen s lluɣaṯ ruḥiyaṯ? Ma marra iḏsen starjamen?

³¹Fa kenniw ṯrezzum aṭṭas x lqudraṯ yuƹȓan, nec aḏawem cerrḥeɣ ijjen n ubriḏ yuƹȓan x marra ibriḏen.