Read Tarifit 1 Ayṯ-Kurinṯ 13 Bible Online

1 Ayṯ-Kurinṯ 13 - Tarifit bible

1 Ayṯ-Kurinṯ 13

¹Maƹlik ssawaȓeɣ s yiȓesawen n iṯarrasen s lluɣa, maƹlik ssawaȓeɣ s lluɣa n lmalaʼikaṯ iƹni ruḥiya, maca ȓemḥibbeṯ war ḏayi tiȓi ca, iȓi tseddaƹeɣ am yij n darbuga, temqerqabeɣ am ȓeqraqeb[14] waha.

²Nec maƹlik ɣari lqudra aḏ ssiwȓeɣ am lʼanbiya, maƹlik fehmeɣ marra min inuffaren ḏ marra ṯusna, maƹlik sxeddameɣ lʼiman aḏ smuttiɣ iḏurar-a, iȓi ḏ walu iy ǧiɣ nec meȓa war tḥibbiɣ ca.

³Nec maƹlik ṣeddqeɣ marra min ɣari ḏ agȓa, maƹlik sellmeɣ ixef inu aḏ sḥerqen ddat-a, iȓi nec war rebḥeɣ walu meȓa war tḥibbiɣ ca.

⁴Ȓemḥibbeṯ ḏayes ttisaƹ n ȓxaḍar, ḏayes ij n lḥanana. Nettaṯ war teftaxar war ṯḥesseḏ ca. War ḏayes ttakebbur,

⁵aqa nettaṯ tseḏḥa. War ṯrezzu ca x min ṯenwa nettaṯ waha. War ishiȓ aḏ tƹeṣṣeb, meȓa ƹṣan-t tettu ḏeɣya.

⁶War ṯfarreḥ ca zi ccarr, ṯfarreḥ zi lḥaqiqa.

⁷War ṯfeṭṭaḥ ƹemmarṣ. Tamen cḥaȓ ma ṯekka. Ṯṣebbar x min ma iǧan. S lʼamal ȓebda tmenna.

⁸Ȓemḥibbeṯ-a nettaṯ ƹemmarṣ aḏ teqḍa, maca aḏ ntahan wawaȓen n lʼanbiya, iȓesawen n iṯarrasen war tɣimin ca ḏ lluɣa, lmaƹrifa aḏ twakemmeȓ iƹni ṯusna.

⁹Aqa min nessen maci ikmaȓ manaya, min nessawaȓ neccin lʼanbiya ḏ aneqṣi ig iǧa.

¹⁰Min iǧan qaƹ ikmaȓ aḏ d iban ḏanita, ssenni min iǧan ḏ aneqṣi aḏ iweddar netta.

¹¹Wami nec tuɣayi ḏ aseymi waha, amecnaw aseymi ssiwȓeɣ am netta, amecnaw aseymi tfekkareɣ am wanita, amecnaw aseymi war tmeyyizeɣ s lfikra. Nec wami ḏewȓeɣ ḏ aryaz baƹda, semḥeɣ ḏeg ibriḏen n useymi-ya.

¹²Aqa ȓexxu nxezzar ḏeg yijjen n ṯisiṯ war ṯeṣfi ca, maca menbaƹd a nemẓer mliḥ qara ḏi qara. Ȓexxu min ssneɣ ḏ aneqṣi ig iǧa, menbaƹd aḏ ssneɣ nec ṯimesȓayin marra, kif-kif mammec twassneɣ nec ḏanita.

¹³Aqaṯen ȓexxu qqimen ṯȓaṯa-ya: lʼiman ḏ lʼamal ḏ ȓemḥibbeṯ yina. Maca zi yina ȓemḥibbeṯ ṯuƹȓa.