Read Tarifit 1 Ayṯ-Kurinṯ 14 Bible Online

1 Ayṯ-Kurinṯ 14 - Tarifit bible

1 Ayṯ-Kurinṯ 14

¹Ḏfareṯ abriḏ n ȓemḥibbeṯ, rzuṯ mliḥ x lqudraṯ ruḥiyaṯ xaṣṣatan ṯenni n wawaȓ itwaƹeȓmen zi Arebbi.

²Cuf, wenni issawaȓen s lluɣa ruḥiya, ma issawaȓ ak yiwḏan? Lla, issawaȓ ak Arebbi. War ḏinni ḥadd iy ḏas ifehhmen, iqqar ṯimesȓayin s Arruḥ iqeddsen ḏaysent ȓmaƹnaṯ inuffaren.

³Walakin wenni issawaȓen ak yiwḏan s min iƹȓem zi Arebbi ataf issawaḍ-asen ijjen n wawaȓ bac aḏ twajehhḏen aḏ twacejjƹen aḏ twaṣebbaren.

⁴Wenni issawaȓen s lluɣa ruḥiya istenfaƹ ixef nnes. Wenni issawaȓen s min iƹȓem zi Arebbi istenfaƹ jmaƹeṯ n ȓmuminin.

⁵Iwa xseɣ marra kenniw aḏ tessiwȓem s lluɣaṯ ruḥiyaṯ, walakin mliḥ ƹaḏ aḏ tessiwȓem s wawaȓen iy ṯƹeȓmem zi Arebbi. Wenni issawaȓen s wawaȓ ig iƹȓem zi Arebbi netta imɣar x wenni issawaȓen s lluɣaṯ ruḥiyaṯ, illa meȓa can yijjen aḏ istarjem ḥima aḏ istenfeƹ jmaƹeṯ n ȓmuminin.

⁶Fa ȓexxu ay ayṯma, meȓa usiɣ-d ɣarwem ssawaȓeɣ nec s lluɣaṯ ruḥiyaṯ, man nnfaƹ iy zi kenniw ɣa nefƹeɣ illa meȓa uwiɣ-awem-d can lwaḥi niɣ can ṯusna niɣ can wawaȓ iy ƹeȓmeɣ zi Arebbi niɣ can n ttaƹlim?

⁷Amenni uȓa ḏ lʼalaṯ n lmusiqa war ḏaysent bu buḥbeȓ am ṯemja niɣ am ṯgambrit. Meȓa war ṯṣuḍeḏ nican war ṯneqṭeḏ war ḏac ticcen bu nneɣma, war ṯzemmareḏ aḏ tessneḏ lmusiqa nni min ṯeƹna.

⁸Ƹaweḏ amecnaw zzammar, meȓa war ḏayes ṯṣuḍeḏ ca s yijjen n ṯmijja ṯeṣfa, wi ɣa iswejḏen i ȓḥarb?

⁹Ammu ƹaweḏ uȓa ḏ kenniw, meȓa twejwijem waha s wawaȓ nwem, wi ḏawem ɣa ifehmen min ṯeqqarem? Ataf awaȓ nwem kenniw am wenni issawaȓen ḏi ȓehwa!

¹⁰Bȓa ccekk ǧan aṭṭas n lʼanwaƹ n lluɣaṯ ḏi ddunect-a, walakin kur ict s ȓmaƹna nnes.

¹¹Iwa meȓa nec war ssineɣ ca ȓmaƹna n lluɣa nni, ataf nec aḏ iȓiɣ am yijjen ḏ abarrani ak wenni issawaȓen ataf netta ƹaweḏ akiḏi yiȓi am yij ubarrani.

¹²Iwa kenniw, wami ṯrezzum aṭṭas x lqudraṯ ruḥiyaṯ, ggeṯ lmejhud nwem ḥima aḏ tarnum ḏi ṯinni iy zi istenfaƹen jmaƹeṯ n ȓmuminin.

¹³S manayenni, wenni issawaȓen s lluɣaṯ ruḥiyaṯ itxeṣṣa-yas aḏ iẓẓaǧ ḥima aḏ istarjem min iqqar.

¹⁴Liʼanna meȓa ẓẓuǧeɣ s lluɣa ruḥiya, arruḥ inu itẓaǧa walakin ȓaƹqeȓ inu war istenfiƹ ca.

¹⁵Iwa min ɣa ggeɣ? Aḏ ẓẓaǧeɣ s arruḥ inu, aḏ ẓẓaǧeɣ ƹaweḏ s ȓaƹqeȓ inu. Aḏ ɣennjeɣ s arruḥ inu, aḏ ɣennjeɣ ƹaweḏ s ȓaƹqeȓ inu.

¹⁶Meȓa ṯcekkareḏ Arebbi s arruḥ waha, wenni iy ɣarwem d yusin s zziyara war izemmar aḏ yini amin x ccuker nnec liʼanna war issin ca min ṯeqqareḏ.

¹⁷Wah, imken cek ṯcekkareḏ Arebbi walakin wenni nneɣni war ṯ ineffeƹ ca.

¹⁸Tcekkareɣ Arebbi nec ssawaȓeɣ s lluɣaṯ ruḥiyaṯ ktar zzaywem marra.

¹⁹Innama, meȓa ssiwȓeɣ ak jmaƹeṯ n ȓmuminin ɣir s xemsa n wawaȓen ataf aḏayi fehhmen ḥsen zi meȓa ssiwȓeɣ s ƹecraȓaf n wawaȓen s yijjen n lluɣa ruḥiya.

²⁰Lla ay ayṯma, war tfekkareṯ ca am iḥenjiren imezyanen. Iȓiṯ am iseyman ḏi ccarr; iȓiṯ am imeqqranen ƹlaḥsab ȓaƹqeȓ.

²¹Iqqar ḏi Ccariƹa n Musa: "Nec aḏ ssiwȓeɣ aȓ yiwḏan-a s lluɣaṯ n iṯarrasen s iyencicen n ibarraniyen, waxxa amenni war ḏayi tṣenniṭen ca. Manaya iqqar-iṯ Siḏi Arebbi."

²²S wawaȓ-a, lluɣaṯ ruḥiyaṯ niṯenti ḏ ijjen n lƹalama war ṯeǧi bu i yinni yumnen; Lla, aqat i yinni war yuminen ca. Walakin awaȓ nni itwaƹeȓmen zi Arebbi istenfaƹ yinni yumnen maci i yinni war yuminen ca.

²³Iḏen, meȓa ṯmunem jmaƹeṯ ṯekmaȓ n ȓmuminin ṯessawaȓem marra s lluɣaṯ ruḥiyaṯ uḏfen-d jarawem yiwḏan n barra niɣ ḏ lkuffar, ataf qqaren xawem qa iwḏan-a ḏ ibuhaȓiyen.

²⁴Walakin, meȓa ṯessawaȓem marra kenniw s wawaȓen iy ṯƹeȓmem zi Arebbi yuḏef-d jarawem ḥadd zi barra niɣ ḏ ijjen n lkafir, ataf aḏ iḥess ḏeg yixef nnes qa aḏ itwaḥaseb aḏ iqneƹ zzaywem marra netta ḏ lƹaṣi, ataf azzayes twasufɣen marra lʼasrar n wuȓ nnes. Ṯumma aḏ isejjeḏ aḏ iƹbeḏ Arebbi aḏ yini qa Arebbi ḏ ṣṣaḥ aqaṯ jarawem!

²⁶Iḏen fa ay ayṯma, xmi ɣa ṯmunem ijjen aɣares yiȓi ijjen n uɣennij, ijjen aɣares yiȓi ijjen n wawaȓ n useȓmeḏ, ijjen aɣares yiȓi lwaḥi, ijjen aɣares ṯiȓi lluɣa ruḥiya, ijjen aɣares ṯiȓi ttarjama. Marra ṯimesȓayin-a aḏ iȓint ḥima aḏ tjehḏem.

²⁷Meȓa ṯessiwȓem s yijjen n lluɣa ruḥiya, labud aḏ tessiwȓem ṯnayen niɣ ṯȓaṯa u ṣafi. Aḏ tessiwȓem ij-ij, u labud aḏ iqqim ijjen zzaywem aḏ istarjem.

²⁸Meȓa war ḏinni ḥadd aḏ istarjem, wenni issawaȓen aḏ istuk aḏ issiweȓ ḏeg wuȓ nnes ḏ Arebbi.

²⁹Fa lʼanbiya u labud aḏ ssiwȓen ṯnayen niɣ ṯȓaṯa. Inneɣni aḏ meyyzen awaȓen nni.

³⁰Meȓa ihwa-d ca n wawaȓ n lwaḥi x can yijjen jar n yinni iqqimen jarawem, ataf wenni issawaȓen ḏ amezwaru aḏ istuk.

³¹Liʼanna ṯzemmarem marra aḏ tessiwȓem s min ṯƹeȓmem zi Arebbi ij-ij ḥima marra ȓmuminin aḏ ȓemḏen aḏ twacejjƹen.

³²Wa lqudraṯ ruḥiyaṯ n lʼanbiya aqaṯent x yiri nsen s yixef nsen.

³³Liʼanna Arebbi war iǧi bu n ȓfawḍa walakin n ȓehna. Ḏ ṯanita ḏ lƹada iy ḏaysent ḏi marra ṯijumaƹ n ȓmuminin.

³⁴Ṯimɣarin ḏi ṯjumaƹ n ȓmuminin labud aḏ qqiment stukant. War ḏasent itwasmiḥ ca aḏ ssiwȓent. Labud aḏ tseḏḥant mammec ṯeqqar Ccariƹa n Musa.

³⁵Meȓa rezzunt aḏ ssnent can ṯmesȓayṯ, labud aḏ sseqsant iryazen nsent ḏi ṯeddarṯ. Liʼanna ṯamɣarṯ ḏ ȓƹib aḏ tessiweȓ ḏi ȓwesṭ n jmaƹeṯ n ȓmuminin.

³⁶Awaȓ n Arebbi, ma iffeɣ-d zzaywem kenniw? Ma yuweḍ-d ɣarwem kenniw waha?

³⁷Meȓa ijjen iḥesseb ixef nnes nican ḏ nnabi niɣ ḏ ijjen n bnaḏem ruḥiya ataf u labud aḏ iqbeȓ min ḏawem d tariɣ ḏi ṯebrat-a nettaṯ ḏ ȓuṣiyeṯ n Siḏiṯneɣ.

³⁸Meȓa war iqbiȓ ca manaya, war itwaqebbiȓ ca netta.

³⁹S manaya ay ayṯma, rzuṯ aṭṭas ḥima aḏ tessiwȓem s wawaȓ itwaƹeȓmen zi Arebbi, u ƹaweḏ war mennaƹṯ ca iwḏan aḏ ssiwȓen s lluɣaṯ ruḥiyaṯ.

⁴⁰Walakin itxeṣṣa-kenniw aḏ teggem kuȓci maƹqul s yijjen n nniḍam nican.