Read Tarifit 1 Ayṯ-Kurinṯ 16 Bible Online

1 Ayṯ-Kurinṯ 16 - Tarifit bible

1 Ayṯ-Kurinṯ 16

¹Ƹlaḥsab ṣṣaḏaqa i ȓmuminin ṣṣaliḥin, swejḏeṯ kenniw mammec ṯent weṣṣiɣ i ṯjumaƹ n ȓmuminin ḏi lʼiqlim n Galaṭya.

²Ḏi nhar amezwaru n kuȓ simana, kur ijjen zzaywem itxeṣṣa-yas aḏ ikkes ca n tmenyaṯ ƹlaḥsab lmanḍa nnes aṯent ixemmeȓ. Maci aȓ d ɣa aseɣ nec ƹaḏ aḏ tebḏam aḏ tesmunem tmenyaṯ-a.

³Menbaƹd, iƹni xmi iy d ɣa awḍeɣ nec, ataf aḏ d ssekkeɣ yinni iy ɣa ṯsejjlem ḏi ṯebraṯin belli ḏaysen ttiqeṯ aḏ raḥen aḏ awin ṣṣaḏaqa-ya iy ṯesmunem ɣar ṯendint n Lquds.

⁴Meȓa u labud aḏ raḥeɣ uȓa ḏ nec, akiḏi raḥen.

⁵Fa xmi ɣa ƹḏuɣ Masidunya aɣarwem d aseɣ, qa nec ƹaḏ aḏ d kkeɣ ssenni x Masidunya.

⁶Imken akiḏwem qqimeɣ ijjen n ȓweqṯ niɣ akiḏwem seƹḏuɣ ȓmecta bac aḏayi ṯƹawnem ḏeg usafar inu mani ma ruḥeɣ.

⁷Ȓexxu war xseɣ ca akenniw ẓreɣ minzi axawem d kkeɣ waha; Lla, tmenniɣ ƹaḏ akiḏwem qqimeɣ ijjen n lmudda iƹni meȓa ixes Arebbi.

⁸Nec aḏ qqimeɣ ḏi ṯendint n Ufasus aȓ ɣa d yaweḍ Ȓƹiḏ n nhar wis xemsin.[18]

⁹Aqa ṯnurzem-ayi-d ijjen n ṯewwarṯ ḏ ṯameqqrant i ȓxeḏmeṯ walakin yinni ig itƹarraḍen aqaṯen mujudin.

¹⁰Meȓa yusa-d Timutawus thellam ḏayes mliḥ bac war ḏayes itiȓi ca umnus ȓaḥeqqac netta itegg ȓxeḏmeṯ n Siḏiṯneɣ amecnaw nec.

¹¹Itxeṣṣa uȓa ḏ ijjen war aṯ iseḥqar ca. Ƹawnem-ṯ ḏeg usafar nnes bac aɣari d iƹqeb ḏi ȓehna ȓaḥeqqac nec trajiɣ-ṯ ak ayṯmaṯneɣ.

¹²U ƹlaḥsab umaṯneɣ Apullus, ttareɣ zzayes aṭṭas ḥima aɣarwem d yas ak ayṯmaṯneɣ nneɣni walakin netta yugi aɣarwem d yas ȓexxu. Aɣarwem d yas axmi aɣares ṯiȓi ijjen n lfurṣa.

¹³Iȓiṯ ƹlalbal, beddeṯ nican ḏi lʼiman, iȓiṯ ḏ iryazen, iȓiṯ ṯjehḏem.

¹⁴Marra min ɣa ṯeggem kenniw teggem-ṯ s ȓemḥibbeṯ.

¹⁵Aqa ṯessnem Stifanus ḏ ȓeḥbab nnes ḏ niṯni iy yumnen zi Lmasiḥ ḏ imezwura ḏi lʼiqlim n Uxaya, ṭewwƹen ixef nsen aḏ sexxaren i ȓmuminin ṣṣaliḥin. Ay ayṯma, tettareɣ zzaywem aḏ tṭaƹem i yiwḏan-a am yina u ḏ yinni marra icarrcen ḏi ȓxeḏmeṯ-a tamaran ḏayes aṭṭas.

¹⁷Nec farḥeɣ wami d usin Stifanus ḏ Furtunaws ḏ Axeykus ȓaḥeqqac ƹemmaren imucan nwem.

¹⁸Niṯni sreyyaḥen uȓ inu ḏ wuȓ nwem. Iwa weqqareṯ iwḏan am yina.

¹⁹Ṯijumaƹ n ȓmuminin ḏi lʼiqlim n Asya tseǧament-id xawem. Akilas ḏ Priskila ḏ yinni iǧan ḏi jmaƹeṯ n ȓmuminin ḏi ṯeddarṯ nsen tseǧamen-d xawem aṭṭas ḏi Siḏiṯneɣ.

²⁰Tseǧamen-d xawem marra aymaṯneɣ. Seǧamem x wayawya s yijjen n sȓam iṣfa.

²¹Sȓam-a uriɣ-ṯ nec Bulus s ufus inu.

²²Wenni war ixsen ca Siḏiṯneɣ aḏ itwaḥarrem. Araḥ-d a Mawlana!

²³Arḍa n Siḏiṯneɣ Ƹisa akiḏwem yiȓi.

²⁴Ȓemḥibbeṯ inu akiḏwem ṯiȓi kenniw marra ḏi Ƹisa Lmasiḥ. Amin.