Read Tarifit 1 Ayṯ-Kurinṯ 2 Bible Online

1 Ayṯ-Kurinṯ 2 - Tarifit bible

1 Ayṯ-Kurinṯ 2

¹Ay ayṯma, nec wami d usiɣ ɣarwem, usiɣ-d aḏ beccareɣ s ȓmaƹna inuffaren n Arebbi, maci usiɣ-d aḏ beccareɣ s wawaȓen izewwqen niɣ s ȓefhameṯ nni n bnaḏem.

²Wami tuɣa ǧiɣ akiḏwem, ggiɣ aḏ scenƹeɣ ɣir Ƹisa Lmasiḥ u ḏ netta itwaṣellben ḏi ṣṣalib.

³Tuɣa aqayi akiḏwem s yijjen n ḍḍuƹef ḏ yijjen n ṯiggwḏi, terjijiɣ aṭṭas.

⁴Min qqareɣ ḏ min tḥeddaṯeɣ war iǧi ca s wawaȓen n ȓefhameṯ bac akenniw sqenƹen ḏeɣya; Lla, sxeddameɣ jjheḏ n Arruḥ n Arebbi

⁵ḥima lʼiman nwem war itbeddi ca s ȓefhameṯ n bnaḏem, aḏ ibbed s ṯzemmar n Arebbi.

⁶Innama, neccin nessawaḍ ijjen n wawaȓ n ȓefhameṯ ɣar yinni war iqqimen ca ḏ imezyanen ḏi lʼiman nsen. Walakin ȓefhameṯ-a war d tis ca zi ȓweqṯ-a niɣ zi lḥukkam n ȓweqṯ-a ig igguren aḏ fnan.

⁷Lla, neccin nessawaḍ ijjen n ȓefhameṯ ḏayes ȓmaƹna inuffaren n Arebbi ḏ min itwasnuffaren. Izemmem-it Arebbi qbeȓ ma aḏ d ṯexȓeq ȓweqṯ qaƹ ḥima neccin a netwasemɣar.

⁸Ȓefhameṯ-a war t ifhim uȓa ḏ ijjen zi lḥukkam n ȓweqṯ-a. Lla, liʼanna maƹlik tuɣa t fehmen, iȓi war ṣelliben ca Siḏiṯneɣ ɣar ṯeǧa lƹaḍama.

⁹Mamc iqqar Lkitab: <Manayenni war ḏinni bu ṯiṭṭ iy ṯ itwaȓan, niɣ ḏ amejjun iy ḏas itsȓan, niɣ ḏ ȓaƹqeȓ iy ṯ itxayaȓen, min isewjeḏ Arebbi i yinni iy ṯ itḥibban.>

¹⁰Ṯimesȓayin nni ismeḍhar-aneɣ-ṯent-id Arebbi s Arruḥ nnes. Liʼanna Arruḥ n Arebbi ixezzar ḏi ṯmesȓayin marra, waxxa ḏ min yuǧɣen n Arebbi.

¹¹Cuf, min iƹna wenni ig issnen lʼafkar n bnaḏem ɣar ḏaxeȓ? Issen-iṯent arruḥ n bnaḏem nni s yixef nnes. Kif-kif Arebbi, war ḏinni ḥadd issen lʼafkar n Arebbi illa Arruḥ n Arebbi waḥḏes.

¹²War ḏaneɣ d yuci ca arruḥ n ddunect-a, yuca-aneɣ-d Arruḥ iy d yusin zi Arebbi ḥima a nefhem ṯimesȓayin nni iy ḏaneɣ d yuca Arebbi baṭeȓ.

¹³Nsawaḍ manaya s wawaȓen iy war ṯen ṯseȓmiḏ ca ȓefhameṯ n bnaḏem; Lla, nessawaḍ-iṯ s wawaȓen ig iseȓmaḏ Arruḥ n Arebbi. Awaȓen-a tcarraḥen lḥaqiqaṯ ruḥiyaṯ i yinni umi ɣar iǧa Arruḥ n Arebbi.

¹⁴Bnaḏem ƹadi itagi aḏ iqbeȓ ṯimesȓayin n Arruḥ n Arebbi, ɣares manaya ḏ ṯubbuhȓiya waha. War izemmar ca aṯent ifhem, liʼanna s Arruḥ n Arebbi waḥḏes iy ṯent ɣa imeyyez.

¹⁵Amma bnaḏem wenni ɣar iǧa Arruḥ n Arebbi. Itmeyyaz marra ṯimesȓayin, netta war ḏayes itmeyyiz ḥadd.

¹⁶Liʼanna mamc iqqar Lkitab: <Wig issnen ȓaƹqeȓ n Siḏi Arebbi ḥima aṯ isefhem?> U neccin ɣarneɣ ȓaƹqeȓ n Lmasiḥ.