Read Tarifit 1 Ayṯ-Kurinṯ 3 Bible Online

1 Ayṯ-Kurinṯ 3 - Tarifit bible

1 Ayṯ-Kurinṯ 3

¹Ay ayṯma, nec tuɣa war zemmareɣ ca akiḏwem ssiwȓeɣ am yiwḏan iteggen array i Arruḥ n Arebbi. Lla, ssiwȓeɣ akiḏwem am yiwḏan ig iteggen array i nnefs nsen, am iseyman waha iy d ixeȓqen ḏi Lmasiḥ.

²Uciɣ-awem aḏ tḥeȓwem aɣi[2] waha maci lmakla ḏ ṣṣaḥ, lmakla ḏ ṣṣaḥ tuɣa war ḏas ṯzemmarem ca. Aqa ƹaḏ ȓexxu war ḏas ṯzemmarem ca,

³kenniw ƹaḏ teggem array i ṭṭabiƹa ṯaƹeffant nwem. Meȓa itiȓi ȓeḥseḏ jarawem ḏ umenɣi, ataf teggem array i ṭṭabiƹa ṯaƹeffant nwem ataf tƹicem am yiwḏan n ddunect-a waha, niɣ lla?

⁴Cuf, meȓa ijjen iqqar nec ḏeffareɣ Bulus ijjen iqqar nec ḏeffareɣ Apullus, ataf kenniw tƹicem am yiwḏan n ddunect-a, niɣ lla?

⁵Iwa min iƹna Apullus? Min iƹna Bulus? Neccin ḏ ixeddamen waha, ṯumnem x ufus nneɣ mammec ḏaneɣ d yuca Siḏi Arebbi a nexḏem.

⁶Nec ẓẓuɣ, Apullus isessew, u ḏ Arebbi iy kenniw iseɣmayen.

⁷Wenni iteẓẓun ḏ wenni isessawen niṯni war ǧin ḏ walu. Wenni iǧan netta ḏ Arebbi iƹni netta iseɣmayen.

⁸Fa wenni iteẓẓun ḏ wenni isessawen ȓxeḏmeṯ nsen ḏ ijjen, kuȓ ijjen aṯ ijaza ƹlaḥsab ȓxeḏmeṯ nnes.

⁹Liʼanna neccin ncarrec ak Arebbi ḏi ȓxeḏmeṯ-a. Kenniw ḏ amarjeƹ nnes ḏ ȓebni nnes.

¹⁰Nec ƹlaḥsab arḍa iy ḏayi yuca Arebbi ggiɣ ijjen n dsas am yijjen n lemƹallem ifsus netta. Yusa-d ijjen nneɣni ibenna x dsas-a. Walakin u labud kuȓ ijjen aḏ yarr ȓbaȓ mammec ɣa ibna x dsas-a.

¹¹War ḏinni ḥadd izemmar aḏ igg ijjen n dsas nneɣni x wenni ḏinni itwaggen, u ḏsas-a wanita ḏ Ƹisa Lmasiḥ.

¹²Ijjen, meȓa ibna x dsas-a s ddheb niɣ s nnuqarṯ niɣ s ṯizra ṯiṣebḥanin niɣ s ukeccuḍ niɣ s arbiƹ niɣ s urum, ataf ȓxeḏmeṯ nnes aḏ d tban, iƹni Yum Lḥisab ḏ Lƹiqab iy d ɣa ismeḍhar manaya. U ƹaweḏ manaya aṯid ṯesmeḍhar ijjen n ṯmessi u ṯimessi-ya aḏ tṣaḥḥeḥ man nnuƹ n ȓxeḏmet iy igga mkuȓ ijjen.

¹⁴Wenni ibnan x dsas-a ȓxeḏmeṯ nnes nican war t tett ca ṯmessi, ataf aṯ ijaza.

¹⁵Wenni umi ɣar ṯeḥreq ȓxeḏmeṯ nnes, ataf aḏ ixsar ljaʼiza nni. Netta s yixef nnes aḏ injem walakin am wenni yallah d yarewȓen zi ṯmessi.

¹⁶Ma war ṯessinem ca belli ḏ kenniw iy iǧan ḏ ṯamziḏa n Arebbi, izeddeɣ ḏaywem Arruḥ n Arebbi?

¹⁷Wenni ɣa iheḏmen ṯamziḏa-ya n Arebbi, aṯ ihḏem Arebbi. Liʼanna ṯamziḏa-ya n Arebbi nettaṯ muqeddes u ḏ kenniw ig iǧan ḏ ṯamziḏa nni.

¹⁸Itxeṣṣa war ḏinni itiȓi ḥadd ixeddeƹ ixef nnes. Meȓa ḏinni can yijjen jarawem iḥesseb ixef nnes ḏ amiɣis ḏi zman-a, itxeṣṣa aḏ iḏweȓ ḏ abuhaȓi zaƹma bac aḏ yiȓi ḏ amiɣis.

¹⁹Cuf, ȓefhameṯ n ddunect-a nettaṯ ḏ ṯubbuhȓiya waha ɣar Arebbi. Liʼanna iqqar Lkitab: <Netta iṭṭef imiɣisen ḏeg ixarwiḍen nsen.>

²⁰Iqqar ƹaweḏ: <Siḏi Arebbi issen lʼafkar n imiɣisen war neffƹent ca.>

²¹Iwa ṣafi, maci aḏ teftaxarem s iryazen. Cuf, kuȓci nwem: waxxa ḏ Bulus niɣ ḏ Apullus niɣ ḏ Buṭrus, niɣ ḏ ddunect-a niɣ ḏ ṯuḏarṯ niɣ ḏ ȓmewṯ, niɣ ḏ min iǧan ȓexxu niɣ ḏ min ɣa yiȓin menbaƹd, iƹni kuȓci nwem.

²³Kenniw n Lmasiḥ, u Lmasiḥ netta n Arebbi.