Read Tarifit 1 Ayṯ-Kurinṯ 6 Bible Online

1 Ayṯ-Kurinṯ 6 - Tarifit bible

1 Ayṯ-Kurinṯ 6

¹Can yijjen zzaywem ɣares ccikaya ḍeḏ i yijjen nneɣni. Ma ḏ ṣṣaḥ war itseḏḥi ca netta, itbedda ḏi lmaḥkama ɣar zzaṯ n yinni war yuminen ca maci ɣar zzaṯ n ṣṣaliḥin?

²Ma war ṯessinem ca belli niṯni ṣṣaliḥin iy ɣa iḥekmen x ddunect-a? Y kenniw meȓa ṯḥekmem x ddunect-a, mayemmi war ṯzemmarem ca aḏ tḥellem ccikayaṯ ṯimezyanin?

³Ma war ṯessinem ca belli a neḥkem x lmalaʼikaṯ? Iwa u labud a neḥkem x ṯmesȓayin n ṯuḏarṯ-a!

⁴Iḏen, wami jarawem ccikayaṯ am ṯina, mayemmi ṯent ṯsersem zzaṯ i yinni war ɣar ṯeǧi ca lqima ak jmaƹeṯ n ȓmuminin?

⁵Qqareɣ-awem manaya ḥima aḏ tseḏḥim. Ma ḏ ṣṣaḥ war ḏinni ḥadd jarawem ḏayes ȓefhameṯ ḥima aḏ iḥell ccikayaṯ-a jar ȓmuminin?

⁶Walakin maci mliḥ awmaṯen temcarraƹen ak wayawya zzaṯ i yinni war yuminen ca.

⁷Xmi kenniw temcarraƹem ak wayawya, ataf ṣafi ṯexsarem. Iwa ḥsen i kenniw meȓa twaḍeȓmem niɣ twaɣeccem.

⁸Lla, walakin kenniw ṯḍeǧmem teggem ȓɣecc, teggem manaya i ayṯmaṯwem.

⁹Ma war ṯessinem ca belli yinni war yuminen ca war zemmaren aḏ warṯen ȓmulk n Arebbi? War xeddƹem ca ixef nwem. Yinni iteggen lfasad, ḏ yinni iƹebbḏen lʼaṣnam, ḏ yinni izennan, ḏ iḥenjiren ifessḏen ak iryazen, ḏ iryazen ifessḏen ak iryazen,

¹⁰ḏ iceffaren, ḏ iḍemmaƹen, ḏ yinni isessen aṭṭas n ccreb, ḏ yinni iqqaren ȓbaṭeȓ, ḏ iɣeccacen war twaraṯen ca ȓmulk n Arebbi.

¹¹Ammu iy tuɣa teggen ȓebƹaḍ zzaywem, walakin ȓexxu twasirḏem, twassiṣfam, twasemṣȓaḥem ak Arebbi s yisem n Siḏiṯneɣ Ƹisa Lmasiḥ u s Arruḥ n Arebbi nneɣ.

¹²Nec ɣari marra ṯimesȓayin ḥeǧȓent, walakin war neffƹent ca marra ṯimesȓayin nni. Ɣari marra ṯimesȓayin ḥeǧȓent, walakin itxeṣṣa war xafi trayi uȓa ḏ ijjen n ṯmesȓayṯ.

¹³Aḏ yini ijjen: "Iwa lmakla n uƹeddis, aƹeddis n lmakla." Walakin Arebbi aṯen ihḏem s ṯnayen iḏsen. Ddat maci n lfasad, ddat nettaṯ n Siḏiṯneɣ. U Siḏiṯneɣ itḏebbar i ddat.

¹⁴Arebbi s jjheḏ nnes isekkar-d Siḏiṯneɣ zi ȓmewṯ, aḏaneɣ d isekkar zi ȓmewṯ uȓa ḏ neccin.

¹⁵Ma war ṯessinem ca belli ddat nwem nettaṯ ḏ ṭṭrufaṯ n ddat n Lmasiḥ? Iwa ṭṭrufaṯ-a, ma aṯent ysiɣ aṯent smuneɣ ak lfasdaṯ? Lla, ƹemmarṣ!

¹⁶Ma war ṯessinem wenni itmunen ak lfasda aḏ iḏweȓ ḏ ijjen n ddat akiḏes? Wah, liʼanna iqqar Lkitab: <Niṯni s ṯnayen iḏsen aḏ ḏewȓen ḏ ijjen.>

¹⁷Walakin wenni imunen ak Siḏiṯneɣ aḏ iḏweȓ ḏ ijjen n arruḥ akiḏes.

¹⁸Arewȓeṯ zi lfasad. Kuȓ ȓmuƹṣiyeṯ nneɣni ig itegg bnaḏem aḏ tiȓi ɣar barra n ddat nnes. Wenni iteggen lfasad iƹeṣṣa ddat nnes nniṯ.

¹⁹Niɣ ma war ṯessinem ddat nwem nettaṯ ḏ ṯamziḏa n Arruḥ iqeddsen ig izeddɣen ḏaywem? Iwa ɣarwem Arruḥ-a zi Arebbi. Kenniw war trayim ca x yixef nwem

²⁰minzi twasɣem kenniw s yijjen n ttaman. Falihaḏa, semɣareṯ Arebbi s ddat nwem.