Read Tarifit 1 Ayṯ-Kurinṯ 7 Bible Online

1 Ayṯ-Kurinṯ 7 - Tarifit bible

1 Ayṯ-Kurinṯ 7

¹Fa ȓexxu a nessiweȓ x ṯmesȓayin iy xef ṯurim kenniw. Maṯalan, mliḥ aryaz meȓa war itḥiḏi ca ṯamɣarṯ.

²Walakin ḥsen meȓa kuȓ ijjen aɣares ṯiȓi ṯemɣarṯ nnes, kuȓ icten aɣares yiȓi uryaz nnes ḥima war itiȓi ca lfasad.

³U labud aryaz aḏ yuc ȓḥaqq n ȓemȓac i ṯemɣarṯ nnes. Ammu ƹaweḏ u labud ṯamɣarṯ aḏ tucc ȓḥaqq n ȓemȓac i uryaz nnes.

⁴Ȓaheqqac ṯamɣarṯ war trayi ca x ddat nnes waḥḏes, itraya xas uȓa ḏ aryaz nnes. Ammu ƹaweḏ aryaz war itrayi ca x ddat nnes waḥḏes, traya xas uȓa ḏ ṯamɣarṯ nnes.

⁵Itxeṣṣa war ṯqeṭṭƹem ca x wayawya illa meȓa ṯtafqem ak wayawya ijjen n lmudda waha ḥima aḏ tucem ȓweqṯ nni i ṯẓaǧiṯ nwem. Menbaƹd aḏ tmunem ḥima war kenniw itɣarri ca Cciṭan ȓaḥeqqac ataf war ṯzemmarem ca aḏ tḥekmem mliḥ x ccehweṯ nwem.

⁶Walakin manaya maci ḏ ijjen n ȓuṣiyeṯ, qqareɣ-awem-t am yijjen n ttesriḥ.

⁷Rezzuɣ marra iryazen aḏ iȓin am nec. Walakin kuȓ ijjen ɣares ṯizemmar iy ḏas yuca Arebbi, ijjen ɣares ṯin, ijjen ɣares ṯa.

⁸Fa ȓexxu aḏ ssiwȓeɣ x yinni war imȓicen ca ḏ ṯajjaȓin. Iƹni mliḥ meȓa qqimen am nec.

⁹Walakin meȓa war zemmaren ca aḏ ḥekmen x ccehweṯ nsen u labud aḏ meȓcen. Ȓaḥeqqac meȓa meȓcen ḥsen zi meȓa qqimen ḥerrqen ḏi ccehweṯ nsen.

¹⁰Fa yinni imeȓcen, iweṣṣa xasen Siḏiṯneɣ maci ḏ nec: Memnuƹ ṯamɣarṯ aḏ tesmeḥ ḏeg uryaz.

¹¹Meȓa ṯamɣarṯ ṯesmeḥ ḏeg uryaz nnes itxeṣṣa-yas war tmeǧec ca ƹaweḏ, niɣ aḏ tmeṣȓaḥ ak uryaz nnes. Memnuƹ ƹaweḏ aryaz aḏ iǧef i ṯemɣarṯ nnes.

¹²Fa yinni nneɣni, qqareɣ-asen nec (iƹni war t iqqar ca Siḏiṯneɣ, ɣir nec): Meȓa can umaṯneɣ ɣares ṯamɣarṯ maci ḏ ȓmumna ṯeqbeȓ akiḏes ṯƹic, memnuƹ aḏas iǧef.

¹³Ƹaweḏ ṯamɣarṯ, meȓa ɣares aryaz maci ḏ ȓmumen iqbeȓ akiḏes iƹic, memnuƹ aḏas ṯeǧef.

¹⁴Cuf, aryaz maci ḏ ȓmumen aqaṯ swadday i lƹinaya n Arebbi s ṯemɣarṯ nnes. Ṯamɣarṯ maci ḏ ȓmumna aqat swadday i lƹinaya n Arebbi s uryaz nnes. Meȓa maci amenni, ṯarwa nwem aḏ iȓin s barra n lƹinaya n Arebbi. Walakin ȓexxu aqaṯen swadday i lƹinaya nnes.

¹⁵Innama, wenni niɣ ṯenni war yuminen ca meȓa ismeḥ, ṣafi aḏ ismeḥ. Iƹni ȓmumen-a ḏ ȓmumna-ya ɣarsen lḥurriya s ḍḍuruf-a liʼanna iȓaɣa-yawem-d Arebbi aḏ tƹicem ḏi ȓehna.

¹⁶Cuf a ṯamɣarṯ, manis ṯessneḏ cem zaƹma bac aḏ tesnejmeḏ aryaz nnem? Y cek ay aryaz, manis ṯessneḏ cek zaƹma bac aḏ tesnejmeḏ ṯamɣarṯ nnec?

¹⁷Kuȓ ijjen aḏ iƹic ṯuḏarṯ nnes mamc ḏas t yuca Siḏiṯneɣ, mamc ḏas d iȓaɣa Arebbi. Ammu iy tweṣṣiɣ nec marra ṯijumaƹ n ȓmuminin.

¹⁸Can ijjen, meȓa iȓaɣa-yas-d Arebbi u netta tuɣa ggin-as ṭṭahareṯ,[5] maci aḏ iraḥ aḏ ikkes ṭṭahareṯ nni. Can ijjen, meȓa iȓaɣa-yas-d Arebbi tuɣa war ḏas ggin ca ṭṭahareṯ, maci aḏ irzu aḏ igg ṭṭahareṯ.

¹⁹Meȓa itṭehhar niɣ war itṭehhir ca, manayenni itwaḥsab ḏ walu. Meȓa itegg s ȓuṣiyaṯ n Arebbi ḏ manayenni ig itwaḥsaben.

²⁰Kuȓ ijjen aḏ iqqim ḏi lḥala iy ḏi tuɣa iǧa zi qbeȓ ma ḏas d iȓaɣa Arebbi.

²¹Cek ma ḏ ismeɣ wami ḏac d iȓaɣa? Iwa bȓa ma ac icqa manaya. Walakin meȓa ɣarek lfurṣa aḏ trebḥeḏ lḥurriya nnec, egg-it.

²²Liʼanna wenni tuɣa iǧan ḏ ismeɣ wami ḏas d iȓaɣa Siḏiṯneɣ, netta ȓexxu ɣares ijjen n lḥurriya zi Siḏiṯneɣ. Amenni ƹaweḏ wenni tuɣa iǧan ɣares lḥurriya, netta ȓexxu iḏweȓ ḏ ismeɣ n Siḏiṯneɣ.

²³Ṣafi, isɣi-kenniw s yijjen n ttaman, war tarram ca ixef nwem ḏ isemɣan n bnaḏem.

²⁴Ay ayṯma, aḏ iqqim kuȓ ijjen ḏi lḥala nni iy ḏi ḏas d iȓaɣa Arebbi.

²⁵Fa ȓexxu aḏ ssiwȓeɣ x ṯḥarmucin war imȓicen ca. War ɣari bu ȓuṣiyeṯ zi Siḏiṯneɣ; Lla qqareɣ manaya s array inu. Teyyqem ḏayi ƹlaḥsab arraḥmeṯ n Siḏiṯneɣ.

²⁶Ƹlaḥsab ȓweqṯ-a iqesḥen, iƹni mliḥ meȓa iqqim bnaḏem mamc iǧa.

²⁷Cek, ma ɣarek ṯamɣarṯ? War rezzu ca aḏ tsemḥeḏ ḏi manaya. Cek, ma war ɣarek bu ṯemɣarṯ? War rezzu ca x ṯemɣarṯ.

²⁸Walakin cek meȓa ṯmeȓceḏ maƹlic, war ṯeƹṣiḏ ca. Ƹaweḏ ṯaḥarmucṯ meȓa ṯemȓec maƹlic, war ṯeƹṣi ca. Walakin yinni imeȓcen aɣarsen iȓin lmacakil ḏi ddunect-a. Nec rezzuɣ axawem sbeƹƹḏeɣ manayenni.

²⁹Fa ay ayṯma, min rezzuɣ aḏ iniɣ? Ȓweqṯ aqa ṯqarreb-d. Ssa aȓ ṯsawent yinni imeȓcen aḏ ƹicen axmi war mȓicen ca,

³⁰ḏ yinni itxeyyaqen axmi war txeyyiqen ca, ḏ yinni ifarrḥen axmi war farrḥen ca, ḏ yinni issaɣen axmi manayenni war zzayes tmelliken ca,

³¹ḏ yinni ineffƹen zi ddunect-a axmi manayenni war zzayes neffƹen ca. Mayemmi? Minzi ṭṭabiƹa n ddunect-a war tdumi ca.

³²Fa rezzuɣ aḏ tiȓim bȓa amnus. Wenni war imȓicen ca ɣares ijjen n lmuhima i ccɣeȓ n Siḏiṯneɣ, mammec ɣa igg axas yarḍa Siḏiṯneɣ.

³³Walakin aryaz imeȓcen ɣares ijjen n lmuhima i ccɣeȓ n ddunect-a, mammec ɣa igg axas ṯarḍa ṯemɣarṯ nnes. Netta lmuhimaṯ nnes farrqent x ṯnayen. Ṯamɣarṯ war imȓicen ca ḏ ṯenni ig iǧan ḏ ṯaƹzriṯ ɣarsent ijjen n lmuhima i ccɣeȓ n Siḏiṯneɣ, mammec ɣa ggent aḏ ƹebḏent Siḏiṯneɣ s ddat nsent ḏ wuȓ nsent. Ṯamɣarṯ imeȓcen ɣares ijjen n lmuhima i ccɣeȓ n ddunect-a, mammec ɣa ṯegg axas yarḍa uryaz nnes.

³⁵Manaya qqareɣ-ṯ bac akenniw nefƹeɣ, maci akenniw sḥesȓeɣ. Lla, rezzuɣ kenniw aḏ tƹicem s lmaƹqul aḏ tƹebbḏem Siḏiṯneɣ maci s can n lmuhima nneɣni.

³⁶Fa wenni ixeḍben, meȓa war izemmar ca aḏ iṣbar x ṯḥenjirṯ nni iƹni war iḥekkem ca mliḥ x ccehawaṯ nnes, ṣafi itxeṣṣa-as aḏ igg lwajib nnes iƹni aḏ imȓec akiḏes. Maƹlic netta war iƹeṣṣi ca.

³⁷Amma wenni iƹewwȓen mliḥ ḏeg wuȓ nnes aḏ ifsex ak ṯenni ig ixḍeb. Meȓa iƹemmeḏ x manaya ḏeg wuȓ nnes war ḏinni ḥetta ḏ ca n ȓḥajeṯ axas ṯzeyyar iƹni iḥekkem x ccehweṯ nnes, maƹlic igga mliḥ.

³⁸X manaya wenni imeȓcen ak ṯenni ig ixḍeb, maƹlic igga mliḥ. U wenni war kiḏes imȓicen ca, igga ḥsen ƹaḏ.

³⁹Ṯamɣarṯ imeȓcen nettaṯ ṯeqqen ɣar uryaz nnes meȓa iddar. Walakin meȓa immuṯ, nettaṯ ɣares ȓḥaqq aḏ temȓec ak wenni ṯxes nettaṯ meȓa netta ḏ ȓmumen zi Siḏiṯneɣ.

⁴⁰Walakin mammec twaȓiɣ nec, aḏ tfareḥ ktar meȓa ṯeqqim mammec ṯeǧa. Wah, tfekkareɣ belli uȓa ḏ nec akiḏi Arruḥ n Arebbi ḏi manaya.