Read Tarifit 1 Ayṯ-Kurinṯ 9 Bible Online

1 Ayṯ-Kurinṯ 9 - Tarifit bible

1 Ayṯ-Kurinṯ 9

¹Ɣari lḥurriya iƹni nec maci ḏ ismeɣ. Nec ḏ arrasul, ẓriɣ Siḏiṯneɣ Ƹisa. Yac ḏ kenniw iy iǧan ḏ nnatija n ȓxeḏmeṯ inu ḏi Siḏiṯneɣ, niɣ lla?

²Meȓa war ǧiɣ ḏ arrasul i can yiwḏan nneɣni, ataf i kenniw iy ɣa ǧiɣ ḏ arrasul. Liʼanna kenniw ḏ ddalil igga-ayi nec Siḏiṯneɣ ḏ arrasul.

³Ḏ wa ḏ ddifaƹ inu ɣar yinni ḏayi iteggen lʼistijwab.

⁴Iƹni, neccin ma war ɣarneɣ bu ȓḥaqq a necc a nsew?

⁵Neccin ma war ɣarneɣ bu ȓḥaqq a nawi akiḏneɣ ṯimɣarin ȓmuminaṯ mammec ggin arrusul nneɣni ḏ ayṯmas n Siḏiṯneɣ ḏ Buṭrus?

⁶Ma nec ḏ Barnaba waheḏneɣ iy war ɣar iǧi ȓḥaqq ḏi ccarḍ, ma itxeṣṣa-yaneɣ i neccin a nexḏem ḏi can ȓḥajeṯ nneɣni bac a nƹic?

⁷Cuf, ma iǧa ca ḥadd aḏ yaḏef ḏi ȓƹaskar aḏ ixḏem bȓa ma aḏ itxaȓes? Lla! Ma iǧa ca ḥadd aḏ iẓẓu ṯzayarṯ uḍiȓ bȓa ma aḏ icc ṯizewrin nnes? Lla! Ma iǧa ca ḥadd aḏ yarwes ṯḥimerṯ bȓa ma aḏ isew aɣi nnes? Lla!

⁸Ma qqareɣ manaya ƹlaḥsab array n bnaḏem waha? Lla, ƹlaḥsab array n ccariƹa iqqar kif-kif.

⁹Iƹni iqqar Lkitab n Musa: War ḏas tegg bu ṯacmant i ufunas nni itṣarwaṯen. Ma i iyenduzen waha umi iticc Arebbi lhimma?

¹⁰Niɣ iqqar-it marra ƹlaḥsab neccin? Wah, iqqar-it ƹlaḥsab neccin. Liʼanna wenni icerrzen ḏ wenni iṣarwaṯen u labud aḏ rezzun aḏ ccen zi ṯfeǧaḥṯ nni.

¹¹Meȓa tuɣa nezreƹ jarawem ṯimesȓayin n ujenna, ma ḏ aṭṭas xaneɣ meȓa nemjar zzaywem ṯimesȓayin n ṯmurṯ?

¹²Meȓa iwḏan nneɣni ɣarsen ȓḥaqq nni n ccarḍ aḏasen ṯucem, yak neccin ɣarneɣ ȓḥaqq-a ktar niɣ lla? Walakin neccin nugi a nkessi ȓḥaqq-a wanita. Nṣebbar aṭṭas i ṯmesȓayin bac war netbellaƹ ca ṯawwarṯ i Lʼinjil.

¹³Ma war ṯessinem ca yinni ixeddmen ḏi ṯemziḏa kessin-d lmakla nsen zzayes, ḏ yinni ixeddmen ḏi ȓmeḏbaḥ kessin-d ȓḥaqq nsen zi min itwaɣarrṣen ḏi ȓmeḏbaḥ?

¹⁴Amenni uȓa ḏ yinni itbeccaren s Lʼinjil, yumar xasen Siḏiṯneɣ aḏ kessin ccarḍ nsen zi Lʼinjil.

¹⁵Walakin nec war ksiɣ ca uȓa ḏ ijjen zi ȓḥuquq nni. Ƹaweḏ nec war tariɣ ca ṯabrat-a ȓexxu ḥima ataf kenniw aḏayi ṯucem ȓḥuquq nni; Lla, nec ḥsen meȓa mmuṯeɣ qbeȓ ma aḏayi ikkes ḥadd manaya minzi ɣa ftaxreɣ.

¹⁶Walakin meȓa tbeccareɣ, war zemmareɣ aḏ ftaxreɣ liʼanna itxeṣṣa-ayi u labud aḏ beccareɣ. Ya tamara xafi nec maƹlik war tbeccareɣ ca!

¹⁷Meȓa tbeccareɣ s ȓxaḍar inu, ataf aḏayi ijaza Arebbi. Meȓa war iǧi bu s ȓxaḍar inu, iƹni ataf teggeɣ ijjen n lmesʼuliya bezzez xafi waha.

¹⁸Iḏen, min iƹna ccarḍ inu? Ccarḍ inu ḏ wa: Xmi tbeccareɣ s Lʼinjil tqeddameɣ-ṯ baṭeȓ iƹni maci ƹlaḥsab ȓḥaqq n ccarḍ-a iy ɣari ḏi Lʼinjil.

¹⁹Waxxa nec war ɣari bu bab inu, walakin arriɣ ixef inu ḏ ismeɣ zaƹma i marra bac aḏ rebḥeɣ aṭṭas n zziyada n yiwḏan.

²⁰Nec arriɣ ixef inu am yijjen ḏ aʼisraʼili ɣar Ayṯ-Israʼil bac ataf aṯen rebḥeɣ. Arriɣ ixef inu am yijjen minxef ṯḥekkem Ccariƹa n Musa ɣar yinni minxef ṯḥekkem Ccariƹa n Musa bac ataf aṯen rebḥeɣ (waxxa nec war xafi ṯḥekkem ca ccariƹa nni).

²¹Arriɣ ixef inu am yijjen war ɣares ṯeǧi ca Ccariƹa n Musa ɣar yinni war ɣarsen ṯeǧi ca Ccariƹa n Musa bac ataf aṯen rebḥeɣ (waxxa nec war ǧiɣ ca bȓa ccariƹa n Arebbi, ṯḥekkem xafi ccariƹa n Lmasiḥ).

²²Arriɣ ixef inu am yijjen iḍƹef ɣar yinni iḍeƹfen bac ataf aṯen rebḥeɣ. Arriɣ ixef inu ḏ marra i marra iwḏan bac aḏ ggeɣ marra lʼimkaniyaṯ aḏ snejmeɣ ca zzaysen.

²³Nec teggeɣ marra manaya ƹlaḥsab Lʼinjil ḥima aḏ carceɣ ḏi lbarakaṯ nnes.

²⁴Ma war ṯessinem ca ṯazȓa nni iteggen ḏi lmelƹab? Marra tazzȓen walakin ijjen waha iy ɣa irebḥen ljaʼiza. Ammeni uȓa ḏ kenniw itxeṣṣa aḏ tazȓem bac at ṯrebḥem.

²⁵Marra yinni itemƹanaḏen ḏi lmelƹab ḥekkmen x ddat nsen ḏi marra ṯimesȓayin-a. Teggen manaya bac aḏ d awin ijjen n ttaj war ḏasen itdumi ca. Walakin neccin ntegg manaya bac a d nawi ijjen n ttaj itduman i ȓebda.

²⁶X manaya war tizzȓeɣ ca bȓa lʼitijah, war cciṯeɣ ca s ȓbuks am wenni iccaṯen ḏi lhawa waha.

²⁷Lla, tzeyyareɣ x ddat inu tarriɣ-t ḏ ṯismeɣṯ inu. Maci aḏ beccareɣ awaȓ i yiwḏan u ɣar uneggaru aḏ iȓiɣ ak yinni iy ṯen isufuɣen bȓa ljaʼiza.