Read Tarifit 2 Ayṯ-Kurinṯ 1 Bible Online

2 Ayṯ-Kurinṯ 1 - Tarifit bible

2 Ayṯ-Kurinṯ 1

¹Ṯabrat-a zzayi nec Bulus ig iǧan ḏ arrasul n Ƹisa Lmasiḥ s ȓxaḍar n Arebbi, akiḏi umaṯneɣ Timutawus. Tariɣ i jmaƹeṯ n ȓmuminin n Arebbi yinni iǧan ḏi ṯendint n Kurinṯ ḏ marra ȓmuminin ṣṣaliḥin ƹaweḏ ig iǧan ḏi lʼiqlim n Uxaya amen-ṯekmaȓ.

²Akiḏwem yiȓi arḍa ḏ ȓehna zi Arebbi Babaṯneɣ ḏ Ƹisa Lmasiḥ Siḏiṯneɣ.

³Aḏ itwabarek Arebbi Babas n Siḏiṯneɣ Ƹisa Lmasiḥ. Netta ƹaweḏ ḏ Babas n arraḥmeṯ ḏ netta ḏ Arebbi ig itƹawan marra iwḏan.

⁴Itƹawan-aneɣ ḏi marra tamara nneɣ ḥima neccin s umƹawan-a iy zi ḏaneɣ itƹawan Arebbi nzemmar a nƹawen yinni iǧan ḏi kuȓ tamara.

⁵Liʼanna mammec aƹeddeb n Lmasiḥ itenfeyyaḍ-d itaḏaf ḏi ṯuḏarṯ nneɣ amenni ƹaweḏ s Lmasiḥ itenfeyyaḍ-d umƹawan nneɣ.

⁶Meȓa netwazeyyar neccin aqa manayenni bac kenniw aḏ twaƹawnem bac aḏ twasnejjmem. Meȓa netwaƹawen neccin aqa manayenni bac ƹaweḏ aḏ twaƹawnem kenniw. Aqa amƹawan-a itarew-d ḏaywem ijjen n ṣṣbar xmi tƹeddabem s min netƹeddab neccin.

⁷Lʼamal nneɣ ƹlaḥsab kenniw ijheḏ. Aqa nessen mammec ṯcarrcem ḏi tamara nneɣ, amenni ƹaweḏ nessen aḏ tcarrcem ḏeg umƹawan nneɣ.

⁸Ay ayṯma, nexs aḏ tessnem tamara iy xaneɣ ikkin ḏi lʼiqlim n Asya. Tuɣa netwazeyyar aṭṭas neccin, azeyyar nni tuɣaṯ ktar zi jjheḏ nneɣ war nzemmar azzayes neṣbar ḥetta wami nefqeḏ lʼamal bac a neddar.

⁹Wah, nḥessa ḏeg yixef nneɣ belli netwaḥkam s ȓmewṯ. Iwqeƹ manayenni bac war netƹewwiȓ ca x yixef nneɣ, a nƹewweȓ x Arebbi wenni iy d isnekkaren yinni immuṯen.

¹⁰Isenjem-aneɣ-d zeg yijjen n ȓmewṯ ḏ ṯaƹeffant u netta ƹaḏ aqa isenjam-aneɣ. Ntegg ḏayes lʼamal nneɣ belli ƹaḏ aḏaneɣ isenjem wami kenniw ḏaneɣ tƹawanem s ṯẓaǧiṯ nwem. Ṯumma aṭṭas n yiwḏan aḏ sgaƹƹḏen ṣṣut nsen ɣar Arebbi aṯ cekkaren x lbaraka nni iy ḏaneɣ ɣa yuc xmi iy ɣa ṯestajeb aṭṭas n ṯẓaǧiṯ nsen xaneɣ.

¹²Aqa neccin nteftaxar zi ḍḍamir nneɣ iƹni icehheḏ belli nuyur mliḥ ḏi ddunect-a xaṣṣatan akiḏwem s yijjen n nniyyeṯ ḏ wuȓ iṣfan zi Arebbi. War iǧi bu s yijjen n ȓefhameṯ n ddunect-a; Lla, s yijjen n arḍa n Arebbi.

¹³Cuf, kuȓ ṯamesȓayṯ iy ḏawem d ntari ḏi ṯebrat-a ṯzemmarem at tɣarem aḏas ṯfehmem. U waxxa war ḏaneɣ tefhimem ca ȓexxu ḏi marra ṯimesȓayin, nec tmenniɣ aḏaneɣ ṯfehmem mliḥ bac azzayneɣ teftaxarem ḏi Nhar nni n Siḏiṯneɣ Ƹisa mammec azzaywem nteftaxar neccin.

¹⁵U s lʼiftixar-a tuɣa rezzuɣ ḏ amezwaru aɣarwem d ggeɣ ijjen n zziyara ḥima aḏawem dubliɣ lbaraka.

¹⁶Iƹni tuɣa rezzuɣ axawem d kkeɣ xmi ɣa raḥeɣ ɣar lʼiqlim n Masidunya, menbaƹd aɣarwem d ƹeqbeɣ zi Masidunya bac aḏayi ṯƹawnem aḏ safareɣ ɣar ṯmurṯ n Yahuḏiya.

¹⁷Wami tuɣa nec txeṭṭaṭeɣ aḏ ggeɣ manayenni, ma ḏewwȓeɣ ḏeg wawaȓ waha? Niɣ ma txeṭṭaṭeɣ am yijjen n bnaḏem n ddunect-a waha, iƹni aḏ iniɣ wah-wah niɣ lla-lla ḏi nnefs n ȓweqṯ?

¹⁸Am Arebbi ḏayes ttiqeṯ netta, neccin ƹaweḏ qa awaȓ nneɣ i kenniw war iǧi bu ḏ wah akeḏ lla.

¹⁹Liʼanna Mmis n Arebbi iƹni Ƹisa Lmasiḥ netbeccar-iṯ jarawem nec uȓa ḏ Silas uȓa ḏ Timutawus. Lmasiḥ war iǧi bu ḏ wah akeḏ lla, netta iǧa ȓebda ḏ <Wah> u ṣafi.

²⁰Liʼanna netta ḏayes iy iqqar Arebbi <Wah> i marra ṯimesȓayin iy iƹaheḏ Arebbi. S manaya zi Ƹisa neqqar <Amin> i lƹaḍama n Arebbi.

²¹Arebbi netta iy ḏaneɣ isbedden mliḥ akiḏwem ḏi Lmasiḥ. Ixḍar-aneɣ iḍbeƹ-aneɣ s ṭṭabaƹ nnes yuca-aneɣ Arruḥ nnes iggi-ṯ ḏeg wuȓawen nneɣ am ijjen n ttesbiq.

²³Iwa tettareɣ i Arebbi aḏ yiȓi netta ḏ ccaheḏ inu qa nec tuɣa rezzuɣ axawem ḥinneɣ wami ugiɣ aɣarwem d aseɣ ɣar Kurinṯ.

²⁴Lʼianna war iǧi bu netḥekkem x lʼiman nwem; Lla, nxeddem akiḏwem bac aḏ tfarḥem. Aqa s lʼiman nwem iy ṯbeddam nican.