Read Tarifit 2 Ayṯ-Kurinṯ 2 Bible Online

2 Ayṯ-Kurinṯ 2 - Tarifit bible

2 Ayṯ-Kurinṯ 2

¹Cuf, ggiɣ ḏi ȓbaȓ inu war teggeɣ bu ca n zziyara nneɣni bac war kenniw sxeyyiqeɣ ca.

²Liʼanna meȓa sxeyyaqeɣ-kenniw nec, wi ɣa iqqimen bac aḏayi isfareḥ illa kenniw iy sxeyyaqeɣ nec?

³Tuɣa uriɣ ṯabrat nni bac war ḏayi tesxeyyaqem ca, rezzuɣ axmi d ɣa aseɣ ɣarwem u labud aḏayi tesfarḥem. Meȓa farḥeɣ aḏ iȓiɣ nec metʼakked aḏ tfarḥem uȓa ḏ kenniw.

⁴Liʼanna uriɣ-awem-t-id s yijjen n uziyyar ḏ yijjen n uxiyyeq zeg wuȓ inu ḏ waṭṭas n imeṭṭawen. War iǧi bu nniɣ-awem-t ḥima akenniw sxeyyqeɣ; Lla, ḥima aḏ tessnem mecḥaȓ ṯemɣar ȓemḥibbeṯ inu ɣarwem.

⁵Fa meȓa ijjen tuɣa isxeyyaq-ikenniw, war iǧi bu ḏ nec ig isxeyyeq lla. Imken isxeyyeq-ikenniw marra niɣ ȓebƹaḍ zzaywem (war xseɣ ca aḏ semɣareɣ lqaḍiya-ya).

⁶Bnaḏem-a, lƹiqab nni iy ḏas ṯeggim teqȓiban marra iḏwem, baraka xas.

⁷Ȓexxu aḏas ṯsemḥem ƹawnem-ṯ bac war iɣerreq ca s uxeyyeq aṭṭas.

⁸S manaya tettareɣ zzaywem aḏas ṯesbeyynem ƹaweḏ ȓemḥibbeṯ nwem.

⁹Uriɣ-awem-d manayenni bac akenniw jarrbeɣ aḏ ssneɣ ma tṭaƹam ḏi marra ma lla.

¹⁰Wenni umi ɣa ṯsemḥem uȓa ḏ nec aḏas semḥeɣ. Meȓa ḏinni can ȓḥajeṯ aḏas semḥeɣ, qa semḥeɣ-as-t. Semḥeɣ-as ƹlaḥsab kenniw, icheḏ xas Lmasiḥ.

¹¹Manaya ḥima Cciṭan war ḏaneɣ ixeddeƹ ca, aqa war nɣeffeȓ ca x min itciṭin netta.

¹²Fa wami d uwḍeɣ ɣar ṯendint n Traws bac aḏ beccareɣ s Lʼinjil n Lmasiḥ, ufiɣ ṯnurzem-ayi-d ijjen n ṯewwarṯ n Siḏiṯneɣ.

¹³Walakin uȓ inu war iǧi ca mertaḥ wami war ufiɣ ca ḏinni uma Titus, mṣafaḍeɣ xasen uyureɣ ɣar Masidunya.

¹⁴Walakin a neḥmeḏ Arebbi. Netta ȓebda isuggur-aneɣ ḏeg ubriḏ n arbaḥ s Lmasiḥ u zzayneɣ neccin itentacar ȓefwaḥ n ṯusna x Lmasiḥ.

¹⁵Liʼanna neccin ḏ ijjen n ȓefwaḥ n Lmasiḥ ɣar Arebbi jar n yinni inejjmen ḏ yinni ifennan.

¹⁶Neccin am ccum n ȓmewṯ ɣar yinni ifennan, ḏ ccum n ṯuḏarṯ ɣar yinni inejjmen. Iwa war ḏinni ḥadd iy ɣa izemmaren i ȓxeḏmeṯ-a!

¹⁷Aqa neccin maci am xarebbi n yiwḏan iteggen ttijara ḏeg wawaȓ n Arebbi, neccin ḏi Lmasiḥ nessawaȓ s wuȓ iṣfa zi Arebbi u zzaṯ i Arebbi.