Read Tarifit 2 Ayṯ-Kurinṯ 3 Bible Online

2 Ayṯ-Kurinṯ 3 - Tarifit bible

2 Ayṯ-Kurinṯ 3

¹Neccin, ma nebḏa a ncekkar ixef nneɣ ƹaweḏ zaƹma bac aḏawem nqeddem ixef nneɣ? Ma neccin am ca n iṯarrasen ɣa iḥḏajen ṯibraṯin bac axaneɣ cehhḏent, iƹni ṯibraṯin nni aḏ d asent zzaywem niɣ aɣarwem d asent?

²Lla, kenniw s yixef nwem ḏ ṯabrat nneɣ iƹni ṯcehhḏem xaneɣ. Ṯabrat-a ṯura g wuȓawen nneɣ, ssnen-teṯ qqaren-teṯ marra iwḏan.

³Ṯbanem-d belli kenniw am yijjen n ṯebrat zi Lmasiḥ, nessiweḍ-it neccin. War ṯuri ca s smex,[1] ṯura s Arruḥ n Arebbi iddaren. War ṯenqic ca ḏi ṯeȓwiḥin n uzru, ṯenqec ḏi ṯeȓwiḥin n wuȓ n bnaḏem.

⁴Manaya neqqar-iṯ s ttiqeṯ iy ɣarneɣ ḏi Arebbi s Lmasiḥ.

⁵Iƹni marra manaya war ḏas nzemmar ca neccin s yixef nneɣ. War netḥessib ca belli ṯizemmar-a tasent-id zzayneɣ; Lla, tasent-id zi Arebbi.

⁶Ḏ netta iy ḏaneɣ yucin ṯizemmar-a bac a niȓi ḏ ixeddamen n yijjen n Ȓƹaheḏ ḏ jḏiḏ. Ȓƹaheḏ-a maci s ccariƹa; Lla, ȓƹaheḏ-a s Arruḥ n Arebbi. Liʼanna ccariƹa ṯneqq, Arruḥ n Arebbi netta iseddar.

⁷Fa ccariƹa nni n ȓmewṯ, ṯira nnes neqcent ḏi ṯeȓwiḥin n uzru. ccariƹa nni ṯusa-d s yijjen n lƹaḍama ḏ ṯameqqrant, ataf Ayṯ-Israʼil war zemmaren aḏ qqimen xezzaren ḏeg uɣembub n Musa s lƹaḍama nni iy ḏayes itceƹciƹen waxxa tiȓi traḥ-as lƹaḍama nni.

⁸Ȓexxu ȓƹaheḏ ruḥiya, lƹaḍama nnes ktar aṭṭas zi ccariƹa nni!

⁹Meȓa ɣares lƹaḍama ɣar ccariƹa nni iy tuɣa d itawin lḥisab ḏ lƹiqab, ataf ȓƹaheḏ-a iy d itawin ṣṣulḥ mecḥaȓ ṯemɣar lƹaḍama nnes ktar zi ṯenni nneɣni.

¹⁰Ḏ ṣṣaḥ ccariƹa nni iy tuɣa ɣar ṯeǧa lƹaḍama, ȓexxu war ɣares ṯeqqim ca lƹaḍama iƹni ak lƹaḍama-ya ṯameqqrant aṭṭas iy ɣares ɣar ȓƹaheḏ nni ruḥiya.

¹¹Cuf, min itwatekksen iƹni ccariƹa nni, meȓa ṯusa-d s yijjen n lƹaḍama, wa labud lƹaḍama-ya n ȓƹaheḏ itduman aḏ tiȓi ktar aṭṭas zi ṯen nneɣni!

¹²Iḏen, meȓa ɣarneɣ ijjen n lʼamal am wanita ataf ɣarneɣ ijjen n zƹameṯ.

¹³War neǧi ca am Musa iɣemmes i uɣembub nnes s yijjen n ltam[2] bac war tɣimin ca Ayṯ-Israʼil txezzaren ḏayes xmi ataf itraḥ-as uceƹceƹ nni.

¹⁴Niṯni ȓaƹquȓaṯ nsen twaqesḥen war fehhmen ca. Aȓ nhara xmi ɣa ɣaren ḏi Ȓƹaheḏ nni aqḏim tafen ltam nni ƹaḏ ḏayes. Ltam nni war itwakkes ca, ɣir s Lmasiḥ iy ɣa itwakkes.

¹⁵Wah, aȓ nhara xmi ɣa ɣaren Ayṯ-Israʼil ḏi Lkitab n Musa ataf uȓawen nsen ɣemmsen s yijjen n ltam.

¹⁶Walakin xmi ɣa yamen can yijjen zi Siḏiṯneɣ, aḏas itwakkes ltam nni.

¹⁷Cuf, Siḏiṯneɣ netta ḏ Arruḥ, mani ma iǧa Arruḥ n Siḏiṯneɣ ḏinni lḥurriya ruḥiya.

¹⁸Ȓexxu neccin aɣembub nneɣ war iɣmis s walu. Netwaȓa lƹaḍama n Siḏiṯneɣ, netwabeddaȓ bac a niȓi ḏ ijjen n ṣṣifeṯ nnes s yijjen n lƹaḍama itmarnin. Manaya itas-d zi Siḏiṯneɣ ig iǧan ḏ Arruḥ.