Read Tarifit 2 Ayṯ-Kurinṯ 4 Bible Online

2 Ayṯ-Kurinṯ 4 - Tarifit bible

2 Ayṯ-Kurinṯ 4

¹S manaya, war ntefciȓ ca minzi ɣarneɣ ȓƹaheḏ-a wanita s arraḥmeṯ n Arebbi.

²Neccin netbeƹƹaḏ x ṯmesȓayin n ȓefḍiḥeṯ ig itwaxeddmen s ṯnufra. War nesxeddim ca ṯaḥraymiṯ, war netḥerrif ca awaȓ n Arebbi. Neccin zzaṯ i Arebbi nseȓmaḏ lḥaqiqa bȓa ma at nesnuffar. Ammu ɣarsen marra iwḏan ḏi ḍḍamir nsen belli ḏayneɣ ttiqeṯ.

³Lʼinjil nneɣ meȓa iɣemmes s yijjen n ltam,[3] iɣemmes ɣir i yinni ifennan.

⁴Yinni war yuminen ca ȓaƹquȓaṯ nsen isṭemmeṣ-iṯen Ibȓis wenni iǧan am arebbi n ddunect-a zaƹma. Niṯni war zemmaren aḏ ẓren nnur n Lʼinjil iƹni lƹaḍama n Lmasiḥ, netta iǧan ḏ ṣṣifeṯ n Arebbi.

⁵War netbeccir ca s yixef nneɣ, netbeccar s Ƹisa Lmasiḥ iƹni netta ḏ Siḏiṯneɣ. U neccin ḏ ixeddamen nwem ƹlaḥsab Ƹisa.

⁶Ḏ Arebbi ig innan: "Nnur aḏ iceƹceƹ zi ṯaǧest." Ḏ Arebbi-ya ig iceƹcƹen ḏeg wuȓawen nneɣ bac a nessen lƹaḍama n Arebbi ig itceƹciƹen ḏeg wuḏem n Ƹisa Lmasiḥ.

⁷Fa ȓkenz-a wanita aqaṯ ɣarneɣ ḏeg iɣerrafen n ucaȓ iƹni ḏi ddat nneɣ, bac aḏ d imeḍhar belli jjheḏ-a ameqqran aṭṭas itas-d zi Arebbi maci zzayneɣ.

⁸Neccin netwazeyyar zi mkuȓ jjiheṯ, walakin war netwaḥesseȓ ca. War nessin ca mani ɣa narr s uzeǧif, walakin war ntefciȓ ca.

⁹Netwaƹeddab, walakin war neqqim ca waḥeḏneɣ. Netwaɣḍeȓ, walakin war nerriz ca.

¹⁰Ȓebda narebbu ḏi ddat nneɣ ȓmewṯ n Ƹisa bac aḏ d tmeḍhar uȓa ḏ ṯuḏarṯ n Ƹisa ḏi ddat nneɣ.

¹¹Liʼanna neccin ig iddaren netwasellam ȓebda ɣar ȓmewṯ ƹlaḥsab Ƹisa ḥima ṯuḏarṯ n Ƹisa aḏ d tmeḍhar ḏi ddat nneɣ itmettan.

¹²X manaya xmi neccin netwajah ȓmewṯ, kenniw tiȓi ḏaywem ṯuḏarṯ.

¹³Iqqar yijjen ḏi Lkitab: "Umneɣ, s manaya ssiwȓeɣ." Nnefs lʼiman-a iǧan ḏayneɣ, zzayes iy ntamen zzayes iy nessawaȓ.

¹⁴Nessen wenni iy d isekkaren Siḏiṯneɣ Ƹisa netta ƹaweḏ aḏaneɣ d isekkar ak Ƹisa aḏaneɣ iseḥḍar akiḏwem zzaṯ nnes.

¹⁵Cuf, manaya iwqeƹ marra bac akenniw infeƹ. Xmi itentacar arḍa ɣar yiwḏan aṭṭas s waṭṭas iƹni arḍa-ya aḏ d isfeyyeḍ ccuker i lƹaḍama n Arebbi.

¹⁶X manaya neccin war ntefciȓ ca. Waxxa ṭṭabiƹa n ddat nneɣ ɣar barra traḥ, ṭṭabiƹa nneɣ ɣar ḏaxeȓ tejhiḏ nhar x nhar.

¹⁷Cuf, ȓemḥayen nneɣ fsusent traḥent tasent-id ḏeɣya, sewjaḏent-aneɣ ɣar yijjen n lƹaḍama ḏ ṯameqqrant bȓa ȓeqyas.

¹⁸War nesrusi ca ṯiṭṭawin nneɣ ḏi min netwaȓa, nsrusa-ṯent ḏi min war netwiȓi ca. Liʼanna min netwaȓa ḏeɣya itraḥ, min war netwiȓi ca ḏ wenni ig itduman i ȓebda.