Read Tarifit 2 Ayṯ-Kurinṯ 6 Bible Online

2 Ayṯ-Kurinṯ 6 - Tarifit bible

2 Ayṯ-Kurinṯ 6

¹Fa neccin ig ixeddmen ak Arebbi ntettar i kenniw neqqar-awem: Maci aḏ tqebbȓem arḍa n Arebbi war zzayes ṯxeddmem ca.

²Aqa netta iqqar: <Wami iy xafi ṯarḍa ȓweqṯ sȓiɣ-ac, nhar nni n ufekki ƹawneɣ-c.> Haqac, ȓexxu ḏ ȓweqṯ ig yarḍan x Arebbi. Haqac, ȓexxu ḏ nhar ig isenjamen.

³War nesrusi walu ḏeg ubriḏ i ḥadd bac aṯ neɣḍeȓ ḥima war tifen bu ȓƹib ḏi ȓxeḏmeṯ nneɣ.

⁴Innama, neccin netqeddam-awem ixef nneɣ s marra minzi neccin ḏ ixeddamen n Arebbi: Iƹni nṣebbar aṭṭas; tekkent xaneɣ ȓemḥayen ḏ tamara ḏ uziyyar;

⁵neccin tmarraṯen-aneɣ, tḥebbasen-aneɣ, teggen-aneɣ ȓfawḍa; neccin neccaṯ tamara, neqqim ḏi ǧiyaȓi bȓa iḍeṣ, neǧuz.

⁶Netqeddam-awem ixef nneɣ s ṣṣfa iy ɣarneɣ ḏ ȓefhameṯ ḏ ttasiƹ n ȓxaḍar ḏ ȓxir ḏ Arruḥ iqeddsen ḏ ijjen n ȓemḥibbeṯ bȓa nnifaq;

⁷s wawaȓ n lḥaqiqa ḏ jjheḏ n Arebbi ḏ ȓesnaḥ n ȓḥaqq ig iǧan ḏeg ufusi ḏ uẓermaḍ.

⁸Netqeddam-awem ixef nneɣ liʼanna iwḏan tweqqaren-aneɣ sbehdaȓen-aneɣ; qqaren ḏayneɣ ȓbaṭeȓ semɣaren-aneɣ; tarran-aneɣ ḏ iɣeccacen walakin neccin war ḏayneɣ bu ixarriqen;

⁹nekkaren-aneɣ walakin neccin netwassen mliḥ; netmetta walakin neccin nteddar; tƹaqaben-aneɣ walakin neccin war ḏaneɣ neqqen ca;

¹⁰neccin netwazeyyar walakin ȓebda nfarreḥ; neccin ḏ ipubriṯen nserbaḥ aṭṭas n yiwḏan; war ɣarneɣ walu walakin ɣarneɣ kuȓci.

¹¹Ay Ayṯ-Kurinṯ, nessiweȓ akiḏwem s marra ṣṣaraḥa, uȓawen nneɣ nnurzmen aṭṭas i kenniw.

¹²Ȓemḥibbeṯ nneɣ war xawem t nteɣliq ca neccin, ḏ kenniw iy xaneɣ t iteɣlaqen.

¹³Ssawaȓeɣ akiḏwem am ṯarwa inu. Iwa jjeṯ waxxa ḏ uȓawen nwem aḏ nnurzmen aṭṭas am neccin.

¹⁴War teggeṯ xawem ṯzayȓut[4] ak yinni war yuminen ca, war tiȓiṯ ca ḏ ṯiyuya[5] akiḏsen. Ma ḏinni ca n ȓḥajeṯ ig icarrec ȓḥaqq ak ȓbaṭeȓ? Lla. Min icarrec nnur ak ṯaǧest? Walu.

¹⁵Ma ḏinni ca n ȓḥajeṯ kif-kif jar Lmasiḥ ḏ Ibȓis? Lla. Ma ḏinni ca n ȓḥajeṯ ṯcarrec jar ȓmumen ḏ wenni war yuminen ca? Walu.

¹⁶Min ṯcarrec ṯemziḏa ṯameqqrant n Arebbi ak lʼaṣnam? Walu. Cuf, neccin iy iǧan ḏ ṯamziḏa n Arebbi iddaren. Amenni iqqar Arebbi: <Nec aḏ zeḏɣeɣ akiḏsen aḏ uyureɣ jarasen, aḏ iȓiɣ ḏ Arebbi nsen, niṯni aḏ iȓin ḏ ccaƹb inu.

¹⁷X manaya iqqar Siḏi Arebbi: Ffɣem-d zi ȓwesṭ nsen ƹezȓeṯ ixef nwem, war tḥaḏaṯ ca min iǧan ḥaram. Uca nec akenniw qebȓeɣ,

¹⁸aḏ iȓiɣ ḏ babaṯwem, kenniw aḏ tiȓim ḏ ṯarwa inu ḏ yissi inu. Amenni iqqar Arebbi izemmaren i kuȓci.>