Read Tarifit Ayṯ-Galaṭya 2 Bible Online

Ayṯ-Galaṭya 2 - Tarifit bible

Ayṯ-Galaṭya 2

¹Wami ṯeƹḏu ijjen arbeƹṭacar sna, gaƹƹḏeɣ ƹaweḏ ɣar ṯendint n Lquds ak Barnaba, uwiɣ akiḏi uȓa ḏ umaṯneɣ Titus.

²Ƹlaḥsab min zi ḏayi iweṣṣa Arebbi ḏeg yijjen n lwaḥi iy gaƹƹḏeɣ ḏinni sexbareɣ-ṯen x Lʼinjil iy zi tbeccareɣ jar ȓegnus. Walakin ggiɣ manayenni ɣir i yinni iǧan ḏ imeqqranen n jmaƹeṯ ḥima aḏ ssneɣ min xeḏmeɣ ḏ min tuɣa xeddmeɣ war iǧi ca ḏ ȓbaṭeȓ.

³Titus iǧan ḏ amƹacar inu, waxxa netta ḏ ayunani war xas zeyyaren ca ḥima aḏ igg ṭṭahareṯ.

⁴Rezzun xas x manayenni can n wawmaṯen zaƹma tbuṣaren waha, uḏfen-d jaraneɣ s ṯnufra ḥima aḏ jesssen x lḥurriya iy ɣarneɣ ḏi Lmasiḥ bac aḏaneɣ arren am isemɣan i ccariƹa nsen.

⁵Walakin neccin nugi aḏasen negg array uȓa ḏ ijjen n dqiqeṯ ḥima aḏ teqqim akiḏwem lḥaqiqa n Lʼinjil.

⁶Amma yinni tɣir-awem ḏ imeqqranen xawem, niṯni war arnin uȓa ḏ ijjen n wawaȓ zi min beccareɣ nec. Qqareɣ manaya, min ma ƹnan yina ɣari kif-kif, iƹni Arebbi war itegg bu s wuḏemawen jaraneɣ.

⁷Walakin min ufin? Ufin ikellef-ayi Arebbi bac aḏ beccareɣ i iyunaniyen mammec ikellef Buṭrus bac aḏ ibeccar i Ayṯ-Israʼil.

⁸Minzi Arebbi ig isxeddamen ttebcir n Buṭrus am arrasul i Ayṯ-Israʼil, ḏ netta ig isxeddamen ƹaweḏ ttebcir inu am arrasul i yinni iǧan ḏ iyunaniyen.

⁹Yaƹqub ḏ Buṭrus ḏ Yuḥanna itwaḥsabben ḏ imeqqranen ḏi jmaƹeṯ nni, fehmen arḍa iy ḏayi yuca Arebbi seǧmen xaneɣ nec ḏ Barnaba s ufus afusi nsen amƹacar. Qebȓen-aneɣ neccin a nraḥ a nbeccar i yinni iǧan ḏ iyunaniyen, niṯni aḏ beccaren i yinni iǧan zi Ayṯ-Israʼil.

¹⁰Ɣir ttaren zzayneɣ a nfekkar ḏeg ipubriṯen nsen. Manayenni rezzuɣ-ṯ nniṯ s wuȓ inu aṯ ggeɣ.

¹¹Fa wami d yusa Buṭrus ɣar ṯendint n Wanṭakya wajheɣ-ṯ aɣembub ḏeg uɣembub liʼanna igga ijjen n lɣaleṭ.

¹²Min iƹna lɣaleṭ nni? Aqa qbeȓ ma aḏ d yas ijjen n ȓḥizeb iƹni can yiwḏan zi Yaƹqub tuɣa Buṭrus itett ak ȓmuminin iǧan ḏ iyunaniyen. Walakin wami d yusa ȓḥizeb nni, ibḏa Buṭrus itbeƹƹaḏ x iyunaniyen nni ineƹzeȓ xasen. Mayemmi? Liʼanna iggweḏ zi ȓḥizeb nni iƹni n ṭṭahareṯ.

¹³Ȓexddenni ḏfaren-ṯ ḏi nnifaq nnes israʼiliyen nneɣni iy yumnen. Uȓa ḏ Barnaba s yixef nnes sbeƹƹḏen-ṯ zeg ubriḏ nican ḏi nnifaq-a nsen.

¹⁴Wami ṯen ẓriɣ war gguren ca nican ƹlaḥsab lḥaqiqa iy iǧan ḏi Lʼinjil, nniɣ-as i Buṭrus zzaṯsen marra: Cek ḏ aʼisraʼili walakin tƹiceḏ amecnaw iyunaniyen, iƹni maci amecnaw aʼisraʼili. Mammec ɣa ṯeggeḏ aḏ tzeyyareḏ x iyunaniyen bac aḏ ƹicen amecnaw israʼiliyen?

¹⁵Neccin ḏ israʼiliyen zeg wami d nexȓeq, neccin war neǧi ca zi ȓegnus iƹeṣṣan zaƹma.

¹⁶Innama, nessen belli bnaḏem war itwasemṣȓaḥ ca ak Arebbi iƹni meȓa iṭaƹ i Ccariƹa n Musa; Lla, manaya illa s lʼiman zi Ƹisa Lmasiḥ. X manaya uȓa ḏ neccin numen zi Ƹisa Lmasiḥ bac a nemṣȓaḥ ak Arebbi s lʼiman nni iy zi numen, maci s ṭṭaƹa n Ccariƹa n Musa. Liʼanna uȓa ḏ ijjen n bnaḏem war itwamsemṣȓaḥ ca ak Arebbi s ṭṭaƹa n ccariƹa nni.

¹⁷Fa neccin nrezzu a nemṣȓaḥ ak Arebbi s lʼiman zi Lmasiḥ. Meȓa s manaya menbaƹd nufa ixef nneɣ am ȓegnus iƹeṣṣan zaƹma, ma ataf Lmasiḥ itcejjaƹ-aneɣ ɣar ȓmuƹṣiyeṯ? Lla, ƹemmarṣ!

¹⁸Lƹaks, nec aḏ iȓiɣ ḏ lƹaṣi meȓa bniɣ ƹaweḏ nniḍam nni aqḏim n ccariƹa iy heḏmeɣ.

¹⁹Ƹlaḥsab Ccariƹa n Musa nettaṯ s yixef nnes, nec mmuṯeɣ zaƹma i ȓeḥkam n Ccariƹa-ya xafi bac aḏ ddareɣ i Arebbi waha.

²⁰Twaṣellbeɣ ak Lmasiḥ. Ssa aȓ ṯsawent maci ḏ nec iy ɣa iddaren; Lla, ḏ Lmasiḥ iy ɣa iddaren ḏayi. Ṯuḏarṯ-a iy ddareɣ ȓexxu ḏi ddat inu, aqa ddareɣ-t s lʼiman inu zi Mmis n Arebbi iy ḏayi iḥibben iṣeddeq xafi ixef nnes.

²¹Nec ugiɣ aḏ sbeṭṭȓeɣ arḍa n Arebbi. Cuf, maƹlik bnaḏem imeṣȓaḥ ak Arebbi s Ccariƹa n Musa, ataf immuṯ Lmasiḥ x ȓbaṭeȓ waha.