Read Tarifit Ayṯ-Galaṭya 3 Bible Online

Ayṯ-Galaṭya 3 - Tarifit bible

Ayṯ-Galaṭya 3

¹A Ayṯ-Galaṭya, ma ṯbuhȓiyem niɣ? Wi ḏawem iggin ssḥur? Ncerreḥ-awem mliḥ zzaṯ i ṯittawin nwem mammec immuṯ Lmasiḥ x ṣṣalib.

²Akenniw sseqsiɣ x yijjen n ṯmesȓayṯ waha. Ma ihwa-d xawem Arruḥ iqeddsen wami ṯṭaƹem i Ccariƹa n Musa? Lla, ihwa-d wami ṯesȓim i Lʼinjil ṯumnem zzayes.

³Ma ṯbuhȓiyem mliḥ niɣ? Kenniw ṯebḏam mliḥ s ṯzemmar n Arruḥ iqeddsen. Ma ṯrezzum ȓexxu aḏ tkemmȓem s ṯzemmar nwem n bnaḏem?!

⁴Marra min tƹeddbem, ma iruḥ ḏ ȓbaṭeȓ niɣ? Lla, imken maci ḏ ṣṣaḥ!

⁵Iḏen, mammec ḏawem d iticc Arebbi Arruḥ iqeddsen itegg jarawem lmuƹjizaṯ? Wac xmi tṭaƹam i Ccariƹa n Musa? Lla, xmi tesȓam Lʼinjil tamnem zzayes.

⁶Iqqar Lkitab x Brahim: <Uca yumen Brahim zi Arebbi, ikkar Arebbi isemṣȓaḥ-iṯ akiḏes s lʼiman nni.>

⁷Falihaḏa, fehmeṯ kenniw belli yinni yumnen niṯni ḏ ṯarwa n Brahim.

⁸Zi qbeȓ ixbar-d Arebbi ḏi Lkitab aḏ ismeṣȓaḥ akiḏes s lʼiman yinni war iǧin ca zi Ayṯ-Israʼil. Ƹlaḥsab manayenni ibeccar zi qbeȓ Brahim s Lʼinjil inna-as qa aḏ twabarken marra ȓegnus x ssabab nnec.

⁹X manayenni yinni yumnen aḏ twabarken ak Brahim iƹni wenni umi qqaren aryaz n lʼiman.

¹⁰Cuf, marra yinni itƹewwaȓen x ṭṭaƹa n Ccariƹa n Musa twanaƹƹȓen. Mayemmi? Ȓaḥeqqac Lkitab iqqar: <Twanaƹƹȓen marra yinni war ixeddmen ca zi marra ṯimesȓayin iy yurin ḏi ccariƹa war zzaysent teggen ca!>

¹¹Maƹruf belli uȓa ḏ ijjen war izemmar aḏ imeṣȓaḥ ak Arebbi s Ccariƹa n Musa ȓaḥeqqac Lkitab iqqar: <Wenni iǧan nican aḏ iƹic s lʼiman.>

¹²Walakin abriḏ n Ccariƹa n Musa war iǧi ca am ubriḏ n lʼiman ȓaḥeqqac ccariƹa tweṣṣa: <Kuȓ ijjen ixeddmen s ȓuṣiyaṯ-a ḏ lqawanin-a itxeṣṣa azzaysen iƹic.>

¹³Lmasiḥ ifekk-aneɣ zi nnaƹȓeṯ nni iǧan ḏi ccariƹa wami yarra ixef nnes ḏ ijjen n nnaƹȓeṯ ƹlaḥsab neccin. Ȓaḥeqqac Lkitab iqqar: <Menƹuȓ kuȓ ijjen iy ṯ ɣa sgaƹƹḏen x ṯeḥnact.>

¹⁴S Ƹisa Lmasiḥ ṯehwa-d lbaraka nni iy zi tuɣa ṯ iwƹeḏ Arebbi i Brahim ṯuweḍ ɣar ȓegnus, ḥima s lʼiman aḏaneɣ immuc Arruh iqeddsen iy zi ḏaneɣ iwƹeḏ.

¹⁵Ay ayṯma, aḏawem uceɣ ijjen n lmiṯal zi lƹadaṯ nneɣ. Lwaṣiya,[1] nettaṯ meȓa ṯura ṯeḍbeƹ, war izemmar ḥadd at isbeṭṭeȓ niɣ aḏayes yarni can n ȓḥajeṯ.

¹⁶Amenni ƹaweḏ ȓƹaheḏ nni iƹni lwuƹud iy ḏas yuca Arebbi i Brahim ḏ wayyaw nnes. Lkitab war iqqar ca <ayyawen nnes>, iƹni aṭṭas iḏsen. Lla, iqqar <ayyaw nnes>, iƹni ijjen n bnaḏem u netta ḏ Lmasiḥ.

¹⁷Fa nec, min rezzuɣ aḏ iniɣ? Iƹni Ccariƹa n Musa ṯusa-d arbeƹmiyya u ṯȓaṯin sna menbaƹd i ȓƹaheḏ-a ak Brahim. Ccariƹa nni war ṯzemmar ca aḏ tesbeṭṭeȓ ȓƹaheḏ-a ak Brahim ig igga Arebbi. Iƹni min iwƹeḏ Arebbi i Brahim war ṯ tarri ca ccariƹa nni ḏ ȓbaṭeȓ.

¹⁸Cuf, lwareṯ maƹlik iticc-iṯ Arebbi ak Ccariƹa n Musa, ataf war ṯ iticc ca ak ȓƹaheḏ nnes i Brahim. Walakin lla, lwareṯ nni iwƹed-iṯ Arebbi i Brahim s yijjen n ȓƹaheḏ.

¹⁹Iwa, mayemmi teǧa Ccariƹa n Musa baƹḏa? Ccariƹa ṯemmuc nettaṯ bac aḏ issen bnaḏem ȓmuƹṣiyaṯ. Tuɣa ṯṣeǧaḥ qbeȓ ma aḏ d yas wayyaw n Brahim iy zi ṯ iwƹeḏ Arebbi. Ccariƹa nni uwint-it lmalaʼikaṯ, ṯumma ijjen n lwasiṭ iƹni Musa issiweḍ-it-id.

²⁰Netta ḏ lwasiṭ waha, iƹni war ixeddem ca waḥḏes. Walakin Arebbi netta ig iǧan waḥḏes.

²¹Iḏen Ccariƹa n Musa, ma tƹarraḍ lwuƹud n Arebbi? Lla walu! Cuf, maƹlik ṯemmuc can ccariƹa iticcen ṯuḏarṯ i bnaḏem, ataf aḏaneɣ ṯarr nican ak Arebbi ccariƹa nni.

²²Walakin lla, Lkitab iqqar belli marra min iǧan netta amecnaw ameḥbus n ȓmuƹṣiyeṯ. Mayemmi? Bac min iwƹeḏ aḏ immuc s lʼiman zi Ƹisa Lmasiḥ i yinni iy ɣa yamnen.

²³Fa qbeȓ ma aḏ d yas lʼiman-a, tuɣa Ccariƹa n Musa ṯcarref-aneɣ iƹni neccin tuɣa neǧa amecnaw imeḥbas nnes ḥetta aȓ wami iy d imeḍhar lʼiman-a iy tuɣa d itasen.

²⁴S manayenni Ccariƹa n Musa tuɣa trebba-yaneɣ ḥetta aȓ wami d yusa Lmasiḥ u ssenni iy ɣa nmeṣȓaḥ ak Arebbi s lʼiman.

²⁵Ȓexxu wami ṣafi imeḍhar-d lʼiman, war ṯeqqim ca Ccariƹa n Musa trebba-yaneɣ.

²⁶Ḏi Ƹisa Lmasiḥ aqa kenniw marra iḏwem ḏ ṯarwa n Arebbi s lʼiman.

²⁷Liʼanna kenniw ig itwaṭehharen s waman bac aḏ tiȓim ḏi Lmasiḥ, aqa ṯmunem kenniw ḏ ijjen akiḏes.

²⁸War ḏinni lla aʼisraʼili niɣ ḏ ayunani. War ḏinni lla ismeɣ niɣ ḏ wenni iǧan ḥurr. War ḏinni lla aryaz lla ṯamɣarṯ. Aqa kenniw marra iḏwem ṯmunem ḏ ijjen ḏi Ƹisa Lmasiḥ.

²⁹Meȓa kenniw zi Lmasiḥ ataf kenniw ḏ ṯarwa n Brahim ɣarwem lwareṯ nni ƹlaḥsab minzi ṯ iwƹeḏ Siḏi Arebbi.