Read Tarifit Ayṯ-Galaṭya 6 Bible Online

Ayṯ-Galaṭya 6 - Tarifit bible

Ayṯ-Galaṭya 6

¹Ay ayṯma, meȓa ṯufim can yijjen zzaywem ṯseḥṣer-iṯ ȓmuƹṣiyeṯ, labud meȓa ṯjehḏem kenniw s Arruḥ iqeddsen aṯiḏ tarrem ɣar ubriḏ s yijjen n wuȓ iṣebbaren. U ḥḍa ixef nnec uȓa ḏ cek bac war ṯetwaɣarriḏ ca.

²Arbuṯ dqeȓ ag wayawya, s manaya aḏ teggem ȓuṣiyeṯ nni n Lmasiḥ.

³Cuf, meȓa can n bnaḏem itfekkar aḏ iftaxar s yixef nnes walakin netta war ḏayes walu, ataf ixeddeƹ ixef nnes.

⁴Lla, labud mkuȓ ijjen aḏ irajeƹ nniṯ ȓexḏayem nnes, ṯumma ataf aḏ iftaxar nican u bȓa ma aḏ icabbeh ixef nnes ḏeg umƹacar nnes.

⁵Ȓaḥeqqac mkuȓ ijjen aḏ yarbu ȓeḥmeȓ nnes.

⁶Fa wenni umi seȓmaḏen awaȓ n Arebbi, itxeṣṣa aḏ icarec netta ak wenni iseȓmaḏen zi marra min iǧan ḏ aṣebḥan.

⁷War xeddƹeṯ ca ixef nwem, Arebbi war ṯ icemmeṯ uȓa ḏ ijjen. Iƹni min ma izreƹ bnaḏem, ḏ manayenni iy ɣa imjar.

⁸Wenni iy ɣa izerƹen min ṯexs ṭṭabiƹa ṯaƹeffant nnes azzayes imjar min ifennan. Wenni iy ɣa izerƹen min ixes Arruḥ iqeddsen azzayes imjar ṯuḏarṯ n ȓebda.

⁹Iwa itxeṣṣa war ntiḥeȓ ca ḏi ȓexḏayem n ȓxir. Mayemmi? Ȓaḥeqqac aȓ ȓweqṯ nni nican n umjar a nemjar iƹni meȓa war nefciȓ ca.

¹⁰Iḏen meȓmi ma nufa lfurṣa, labud a negg ȓxir ḏi marra iwḏan xaṣṣatan ak ayṯmaṯneɣ ḏi lʼiman.

¹¹Aqa twaȓam ȓḥuruf-a mecḥaȓ ḏ imeqqranen niṯni, u nec tariɣ-ṯen nniṯ s ufus inu!

¹²Yinni irezzun aḏ ftaxaren zi ddat, iƹni min war iǧin ca zi Arruḥ iqeddsen, niṯni tbessaȓen xawem bac aḏ teggem ṭṭahareṯ n Musa. Mayemmi? Ɣir rezzun niṯni war tƹeddiben ca x ssabab n ṣṣalib n Lmasiḥ.

¹³Cuf, yinni iteggen ṭṭahareṯ niṯni s yixef nsen war tṭiƹin ca i ccariƹa nsen. Rezzun kenniw aḏ teggem ṭṭahareṯ bac aḏ ftaxaren belli ṯeggim lƹada nsen ḏi ddat nwem.

¹⁴Walakin nec ƹemmarṣ aḏ ftaxareɣ illa zi ṣṣalib n Siḏiṯneɣ Ƹisa Lmasiḥ. Zi ṣṣalib nnes iy zi ṯetwaṣelleb ddunect i nec, u zzayes ƹaweḏ nec iy zi twaṣellbeɣ i ddunect.

¹⁵Liʼanna bnaḏem meȓa igga ṭṭahareṯ niɣ war t iggi ca, manaya war ineffeƹ ca; Lla, ineffeƹ meȓa bnaḏem ixȓeq-d qaƹ ḏ jḏiḏ.

¹⁶Marra yinni igguren x min tweṣṣiɣ nec ḏi ȓuṣiyeṯ-a ataf aɣarsen yiȓi ȓehna ḏ arraḥmeṯ ak ccaƹb n Arebbi.

¹⁷Ssa aȓ ṯsawent itxeṣṣa war ḏayi itegg ḥadd tamara ȓaḥeqqac ddat inu ḏayes lʼaṯar n Ƹisa.

¹⁸Ay ayṯma, aḏ yiȓi ak arruḥ nwem arḍa n Siḏiṯneɣ Ƹisa Lmasiḥ. Amin.