Read Tarifit Ayṯ-Ufasus 2 Bible Online

Ayṯ-Ufasus 2 - Tarifit bible

Ayṯ-Ufasus 2

¹Fa kenniw tuɣa ṯemmuṯem s wuȓawen nwem ƹlaḥsab ȓmuƹṣiyaṯ ḏ ddnub nwem.

²Ḏaysent iy tuɣa tƹicem xmi ṯeggurem ḏeg ubriḏ n ddunect-a ṯḏeffarem arrayes n ȓeḥkam iy iǧan jar ujenna ḏ ṯmurṯ iƹni Cciṭan iy iǧan netta ḏ arruḥ nni ig ixeddmen ḏeg yinni iy iƹeṣṣan Arebbi.

³Neccin marra tuɣa netƹic am niṯni ḏeg yijjen n ȓweqṯ wami tuɣa netseƹƹaf ccehawaṯ n array aƹeffan n nnefs nneɣ nḏeffar min irezzu ḏ min itfekkar. Tuɣaneɣ am marra iwḏan iƹni neccin zeg yinni iy ɣa iƹaqeb Siḏi Arebbi.

⁴Walakin Arebbi s ȓemḥibbeṯ nnes iy igga i neccin ḏ arraḥmeṯ nnes ṯameqqrant aṭṭas, min ḏaneɣ igga netta?

⁵Iseddar-aneɣ-d ak Lmasiḥ waxxa neccin s wuȓawen nneɣ nemmuṯ ƹlaḥsab ȓmuƹṣiyaṯ nneɣ. Iwa s arḍa n Siḏi Arebbi iy zi nenjem.

⁶Ṯumma isekkar-aneɣ-d ak Lmasiḥ isɣim-aneɣ ḏeg imucan n ujenna s Ƹisa Lmasiḥ.

⁷Mayemmi? Ḥima Siḏi Arebbi ḏi zmanaṯ iy d ɣa yasen aḏ d ismeḍhar agȓa nnes iƹni arḍa nnes mecḥaȓ ig iǧa ḏ ameqqran bȓa ȓeqyas iy ḏaneɣ d isbeyyen ḏi Ƹisa Lmasiḥ.

⁸Aqa s arḍa n Siḏi Arebbi iy zi ṯnejmem wami ṯumnem. Manaya war zzaywem d itekk ca zi kenniw; Lla, manaya itekk-d zi lhadiya n Arebbi.

⁹Manaya maci ƹlaḥsab lḥasanaṯ nwem lla, bac uȓa ḏ ijjen war iteftaxar ca zeg yixef nnes.

¹⁰Liʼanna neccin ḏ ȓxeḏmeṯ n Siḏi Arebbi, ixȓeq-aneɣ-d ḏi Ƹisa Lmasiḥ bac a negg ȓexḏayem ṯiṣebḥanin. Niṯenti isewjeḏ-aneɣ-ṯent-id Arebbi zi qbeȓ bac aṯent nexḏem.

¹¹Iwa ƹeqȓeṯ belli kenniw tuɣa ṯeǧam zeg yinni itwasemman ḏ lkuffar zaƹma, war ṯeggim ca ṭṭahareṯ. Amenni iy qqaren yinni iteggen ṭṭahareṯ (iƹni ɣir min teggen ḏi ddat s ifassen n bnaḏem waha).

¹²Ƹeqȓeṯ belli ḏi ȓweqṯ nni tbeƹƹaḏem x Lmasiḥ tenƹezaȓem zi ljinsiya n ccaƹb n Arebbi. Aqa kenniw ḏ ibarraniyen ƹlaḥsab ṯimesȓayin nni iy zi d iwƹeḏ Arebbi ḏi ȓƹuhuḏ nnes. Kenniw tuɣa ṯeǧam bȓa lʼamal bȓa Arebbi ḏi ddunect-a.

¹³Walakin wami ṯumnem zi Ƹisa Lmasiḥ, kenniw iy tuɣa ṯuggwjem aṭṭas zi Arebbi qbeȓ, ṣafi ȓexxu isqarreb-ikenniw-d ɣares s iḏammen n Lmasiḥ.

¹⁴Cuf, Lmasiḥ netta s yixef nnes ḏ ȓehna nneɣ. Ḏ netta ig ismunen Ayṯ-Israʼil ḏ ȓegnus nneɣni igga ṯnayen n ccuƹub-a ḏeg yijjen n ccaƹb. S ddat n Lmasiḥ ihḏem ȓḥiḍ nni iy tuɣa ḏaneɣ iferrqen s lƹadawa jaraneɣ.

¹⁵S ddat nnes isbeṭṭeȓ ccariƹa nni s ȓuṣiyaṯ nnes ḏ lqawanin nnes bac aḏ igg ḏeg yixef nnes ijjen n ccaƹb waḥḏes ḏ jḏiḏ ḏeg umcan n ṯnayen n ccuƹub nni. Amenni igga ȓehna.

¹⁶Amenni isemṣȓaḥ ṯnayen n ccuƹub-a ak Arebbi yarri-ṯen ḏ ijjen n ccaƹb s ṣṣalib, inɣa zzayes lƹadawa jarasen.

¹⁷Aqa yusa-d Ƹisa itbeccar netta s Lʼinjil yuwi-awem-d ȓehna i kenniw tuɣa iǧan ṯbeƹƹḏem x Arebbi u ḏ yinni iy d yuḏsen ɣar Arebbi.

¹⁸Liʼanna s Lmasiḥ am neccin am kenniw nzemmar a nqarreb ɣar Arebbi Babaṯneɣ s yijjen n Arruḥ iqeddsen.

¹⁹Iḏen, ȓexxu kenniw war ṯeqqimem ca ḏ ibarraniyen niɣ ḏ imezḏaɣ. Lla, ȓexxu kenniw ḏ imƹacaren ak ṣṣaliḥin iƹni yuca-awem Arebbi ljinsiya akiḏsen ṯḏewȓem ḏ ȓeḥbab n ṯeddarṯ n Arebbi.

²⁰Ṯaddarṯ-a nettaṯ ṯebna x dsas n yizra iy iǧan ḏ arrusul ḏ lʼanbiya. U Lmasiḥ s yixef nnes aqaṯ ḏ azru nni iy iǧan ḏeg umcan aṣebḥan ḏi ṯɣemmarṯ n dsas nnes.

²¹Ḏayes ḏi netta iy imun marra ȓebni n ṯeddarṯ-a tgaƹƹaḏ ḏ icten bac aḏ tiȓi ḏ ijjen n ṯemziḏa ḏ ṯamqeddest i Arebbi.

²²Ḏayes ƹaweḏ ḏi Lmasiḥ ibenna-kenniw ijjen ak unneɣni bac aḏ tiȓim ḏ ijjen n ṯzeddiɣṯ ḏayes iy ɣa izḏeɣ Arebbi s Arruḥ nnes.