Read Tarifit Ayṯ-Ufasus 4 Bible Online

Ayṯ-Ufasus 4 - Tarifit bible

Ayṯ-Ufasus 4

¹Iḏen fa nec ig iǧan ḏ ameḥbus x ssabab n Siḏiṯneɣ akenniw nhiɣ bac aḏ tuyurem nican ƹlaḥsab awaȓ nni iy ḏawem d iȓaɣan zeg ujenna.

²Iȓim bȓa ttakebbur qaƹ. Iȓim s yijjen n ttawaḍuƹ. Ṣbarem ak wayawya s ttasiƹ n ȓxaḍar ḏ ȓemḥibbeṯ.

³Ggeṯ marra lmejhud nwem bac aḏ tiȓim ḏ ijjen ḏi Arruḥ iqeddsen wami ṯeṭṭfem fus ḏeg ufus s ȓehna.

⁴Jmaƹeṯ ḏ icten, Arruḥ iqeddsen ḏ ijjen. Amenni Arebbi wami ḏawem d iȓaɣa, iȓaɣa-yawem-d ɣar lʼamal ḏ ijjen.

⁵Siḏiṯneɣ ḏ ijjen, lʼiman ḏ ijjen, ṭṭahareṯ s waman ḏ icten.

⁶Arebbi Babaṯneɣ n marra ḏ ijjen. Aqaṯ x marra, iƹeddu-d x marra, aqaṯ ḏi marra.

⁷Cuf, kuȓ ijjen zzayneɣ ṯemmuc-as yijjen n lbaraka ƹlaḥsab mammec t iwzen Lmasiḥ ḏ lhadiya.

⁸X manaya iqqar Lkitab: <Wami igaƹƹeḏ ɣar umcan nni iy yuƹȓan, yuwi akiḏes xarebbi ḏ imeḥbas yuca-asen lhadiyaṯ i iryazen.>

⁹(Min ixes aḏ yini belli netta igaƹƹeḏ? Iƹni ixes aḏ yini belli netta ihwa-d ƹaweḏ ɣar imucan iy yuǧɣen ḏi ṯmurṯ.

¹⁰Wah, wenni iy d ihwan ḏ wenni s yixef nnes ig igaƹƹḏen qaƹ ḏeg ujenna n ijennaṯen bac aḏ iccar marra ṯimesȓayin.)

¹¹Ḏ netta ig ixḍaren arrusul ḏ lʼanbiya ḏ yinni ig itbeccaren s Lʼinjil ḏ ȓfuqaha ḏ imseȓmaḏen.

¹²Niṯni aḏ swejḏen i ṣṣaliḥin aḏ xeḏmen ccɣeȓ n Arebbi bac jmaƹeṯ n Lmasiḥ aḏ tejheḏ.

¹³Aȓ ɣa niȓi marra ḏ ijjen ḏi lʼiman u ḏi ṯusna x Mmis n Arebbi. Aȓ ɣa niȓi marra ƹaweḏ nemɣar iƹni ḏ iryazen am ȓaƹbar nni ikmaȓ n ȓqedd n Lmasiḥ.

¹⁴Amenni war netɣimi ca ḏ iḥenjiren tawint-aneɣ ȓemwaj tarrant-aneɣ. Niɣ ḏ arriḥ itṣuḍ xaneɣ ikessi-yaneɣ ssa ḏ ssa s kuȓ arriḥ zaƹma n useȓmeḏ u s ṯeḥraymiṯ ḏ ixarwiḍen n iryazen ḏ min tciṭṭinen.

¹⁵Lla, innama neccin xmi nessawaȓ ȓḥaqq s ȓemḥibbeṯ labud a nemɣar s kuȓ abriḏ a niȓi am netta ḏ azeǧif nni itrayyan xaneɣ iƹni Lmasiḥ.

¹⁶Zzayes zi Lmasiḥ ddat ṯekmaȓ n jmaƹeṯ ṯmun aqat ḏ icten s qaƹ ȓemfaseȓ nni iy ḏayes. U kuȓ ṭṭarf nnes meȓa ixeddem nican ataf aḏ isemɣer ddat-a u s yixef nnes aḏ tebna s ȓemḥibbeṯ.

¹⁷Aqa min ḏawem qqareɣ ḏ uziyyar-a iy xawem tzeyyareɣ ḏi Siḏiṯneɣ, iƹni u labud war ṯeggurem ca mammec gguren ȓegnus s ȓaƹquȓ nsen ixwan.

¹⁸Niṯni ṯṭemmeṣ-iṯen ȓefhameṯ zaƹma iy ḏaysen. Niṯni ggwjen zi ṯuḏarṯ n Arebbi ƹlaḥsab ȓeqfaȓeṯ nni iy ḏaysen s ṯɣennant n wuȓawen nsen.

¹⁹Fellsen qaƹ ḏeffaren ccehweṯ nsen u ṣafi, ḏaysen ijjen n zƹameṯ aḏ sxeḏmen i kuȓ nnuƹ n min isexnizen.

²⁰Walakin kenniw lla, maci amenni iy ṯȓemḏem x Lmasiḥ.

²¹Wah, ṯȓemḏem x Ƹisa lḥaqiqa iy iǧan ḏayes iƹni meȓa ṯesȓam xas nican.

²²Iwa tuɣa ṯȓemḏem aḏ tsemḥem ḏi ṭṭabiƹa nni nwem tuɣa ɣarwem qbeȓ. Liʼanna ṭṭabiƹa nni nwem ṯarecca ƹlaḥsab ccehweṯ nnes istwaɣarren.

²³Tuɣa ṯȓemḏem aḏ tiȓim ḏ jḏiḏ zi ȓefhameṯ n ȓaƹquȓaṯ nwem

²⁴aḏ teggem ijjen n ṭṭabiƹa ṯenneɣni iƹni ḏ jḏiḏ, ijjen n ṭṭabiƹa iy d ɣa itwaxeȓqen amecnaw wenni n Arebbi ḏayes ȓḥaqq ḏayes min iṣfan.

²⁵Iḏen labud kuȓ ijjen zzaywem aḏ ibeƹƹeḏ zeg ixerriqen aḏ issiweȓ s ȓḥaqq ak wajjar nnes liʼanna neccin marra ḏ ijjen n jmaƹeṯ iy neǧa.

²⁶Ƹeṣṣbeṯ bȓa ma aḏ teggem ȓmuƹṣiyeṯ. War tejjaṯ ca ṯfuct axawem ṯeɣȓi kenniw ƹaḏ tƹeṣṣibem.

²⁷Iƹni war tejjaṯ ca abriḏ i Cciṭan aḏ yaḏef ḏeg wuȓawen nwem.

²⁸Wenni ig itacaren labud aḏ ibeƹƹeḏ zi ṯukkarḏa nni, aḏ ixḏem ijjen n ȓxeḏmeṯ ḏ ṯaṣebḥant s ifassen nnes bac aḏ iƹawen zzayes wenni iteḥḏajen.

²⁹War tejjaṯ ca aḏ d iffeɣ zeg uqemmum nwem can wawaȓ ḏ aƹeffan. Lla, aḏ d iffeɣ zzayes ɣiȓ awaȓ aṣebḥan wenni itcejjaƹen ḏ wenni itḥellalen bac azzayes snefƹen yinni ḏas itesȓan.

³⁰War sxeyyaqem ca Arruḥ iqeddsen n Arebbi iƹni wenni iy zi ṯetwaḍebƹem i Nhar nni iy ɣa ṯnejjmem.

³¹Marra lƹuqda ḏ uɣḍab ḏ uƹeṣṣeb ḏ sḏaƹ ḏ ȓbaṭeȓ sbeƹƹḏem-ṯen xawem marra, u kkseṯ ƹaweḏ kuȓ nnuƹ n ȓeqbaḥeṯ.

³²Teggeṯ ȓxir ak wayawya, tḥinnam x wayawya. Semmḥem i wayawya mammec ḏawem iɣfar Arebbi ḏi Lmasiḥ.