Read Tarifit Ayṯ-Ufasus 5 Bible Online

Ayṯ-Ufasus 5 - Tarifit bible

Ayṯ-Ufasus 5

¹Falihaḏa ggem mamc itegg Arebbi minzi kenniw ḏ ṯarwa nnes imƹizzen.

²Ƹicem ḏi ȓemḥibbeṯ mamc igga Lmasiḥ wami ḏaneɣ iḥibb iṣeddeq xaneɣ ixef nnes am yijjen n ṣṣeḏqeṯ ṯufuḥ ḏ ijjen n dbiḥeṯ i Arebbi.

³Wa labud war itiȓi walu jarawem zi lfasad niɣ ḏ min isexnizen niɣ ḏ ṭṭmaƹ ȓaḥeqqac manaya maci maƹqul i ṣṣaliḥin.

⁴U labud ƹaweḏ war itiȓi ca jarawem awaȓ aƹeffan niɣ ḏ wawaȓ ixwan niɣ ḏ nnukta ḏ ṯaƹeffant; Lla, itxeṣṣa aḏ yiȓi ccuker i Arebbi.

⁵Liʼanna wenni iteggen lfasad niɣ ḏ min isexnizen niɣ ḏ min iseḍmaƹen, iƹni netta ḏ wenni iƹebbḏen lʼaṣnam, aqa tessnem bȓa ccekk belli marra yinni iteggen manaya war ɣarsen bu lwareṯ ḏi ȓmulk n Lmasiḥ niɣ ḏi Arebbi.

⁶War tejjaṯ can ḥadd akenniw icmeṯ s wawaȓen nnes ixwan. Liʼanna x ssabab n ṯmesȓayin-a iy d ihewwa uɣḍab n Arebbi x yinni iy ṯ iƹeṣṣan.

⁷Iḏen war temƹacareṯ ca akiḏsen.

⁸Cuf, ḏeg yijjen n ȓweqṯ kenniw tuɣa ḏ ṯaǧest, ȓexxu kenniw ṯḏewȓem ḏ ijjen n nnur ḏi Siḏi Arebbi. Iwa ƹiceṯ am ṯarwa n nnur.

⁹Aqa nnur itarew-d min iǧan ḏ aṣebḥan ḏ min iǧan nican ḏ min iǧan ḏ lḥaqiqa.

¹⁰Meyyzeṯ ƹaweḏ min ḏas iteƹjiben i Siḏi Arebbi.

¹¹War carrcem ca ḏi ȓexḏayem n ṯaǧest war tarwent ca, feḍḥem-ṯent.

¹²Yinni war itṭiƹin ca. Meȓa nessiweȓ xasen ijjen n wawaȓ waha x min teggen s ṯnufra ataf a nseḏḥa.

¹³Walakin min d infeḍḥen s nnur aḏ d imeḍhar

¹⁴minzi ḏ nnur iy d ismeḍharen marra. X manaya iqqar Lkitab: <Faq cek a wenni iteṭṭṣen kkar-d zi ȓmewṯ, axak iceƹceƹ Lmasiḥ s nnur nnes.>

¹⁵Iḏen fa, rajƹaṯ ixef nwem xzareṯ mammec iy ɣa ṯƹicem. Maci aḏ tƹicem am yinni iy ḏi ṯeǧa ȓeqfaȓeṯ; Lla, ƹicem am yinni iy ḏi ṯeǧa ȓefhameṯ.

¹⁶Staɣellam ȓweqṯ nwem mliḥ liʼanna nhuraṯ-a ḏ iƹeffanen.

¹⁷Iwa war tiȓim ca bȓa ȓaƹqeȓ; Lla, fehmeṯ min ixes Siḏi Arebbi.

¹⁸War skareṯ ca s ccreb ig itawin ɣar lmadella n ssekra; Lla, ccarem s Arruḥ iqeddsen.

¹⁹Siwȓem ag wayawya s wawaȓen n Zzabur ḏ lʼamdaḥ ḏ yizȓan ruḥiya. Ɣennjem, ggem lmusiqa i Siḏi Arebbi ḏeg wuȓawen nwem.

²⁰Cekkarem ȓebda Arebbi Babaṯneɣ x marra ṯimesȓayin ḏeg yisem n Siḏiṯneɣ Ƹisa Lmasiḥ.

²¹Ṯaƹem i wayawya ƹlaḥsab ȓuweqqar nwem i Lmasiḥ.

²²A ṯimɣarin, ṭaƹent i iryazen nkent mammec iy ṯṭaƹant i Siḏiṯneɣ.

²³Ȓaḥeqqac aryaz itrayya x ṯemɣarṯ nnes mamc ƹaweḏ itrayya Lmasiḥ x jmaƹeṯ n ȓmuminin. Jmaƹeṯ-a isenjem-it Lmasiḥ u ḏ nettaṯ ig iǧan ḏ ddat nnes.

²⁴U mammec ṯṭaƹa jmaƹeṯ n ȓmuminin i Lmasiḥ, amenni iy ɣa ṭaƹent ṯemɣarin i iryazen nsent ḏi marra.

²⁵Ay iryazen, ḥibbem ṯimɣarin nwem mammec iḥibb Lmasiḥ jmaƹeṯ n ȓmuminin iṣeddeq xas ixef nnes ḥima at issiṣfa. Yarri-t ḏ ṯamenqawiṯ wami t isireḏ s waman ḏ wawaȓ nnes.

²⁷Ḥima Lmasiḥ aḏ iqeddem jmaƹeṯ n ȓmuminin i yixef nnes tceƹciƹ ḏ ṯamqeddest war twessix war tecniq war ḏayes itiȓi bu ca n ȓƹib nneɣni.

²⁸Amenni kif-kif labud iryazen aḏ ḥibben ṯimɣarin nsen mamc tḥibban ddat nsen. Wenni itḥibban ṯamɣarṯ nnes ḏ ixef nnes iy itḥibba.

²⁹Cuf, ƹemmarṣ war iǧi ḥadd itƹiffa ddat nnes; Lla, itḏebbar-d xas itḥawaȓ xas. Amenni iy itegg Lmasiḥ ag jmaƹeṯ n ȓmuminin.

³⁰Liʼanna neccin ḏ ṭrufaṯ n ddat nnes.

³¹Lkitab iqqar: <X manaya aryaz aḏ ismeḥ ḏi babas ḏ yemmas aḏ imun ak ṯemɣarṯ nnes, ṯnayen iḏsen aḏ ḏewȓen ḏ ijjen.>

³²Ḏeg wawaȓ-a mixef nessawaȓ ḏayes ijjen n ȓmaƹna inuffaren yuǧeɣ aṭṭas. Qqareɣ nec belli ȓmaƹna-ya issawaȓ x Lmasiḥ ak jmaƹeṯ n ȓmuminin.

³³Innama, labud kuȓ ijjen zzaywem aḏ iḥibb ṯamɣarṯ nnes am mammec itḥibba ixef nnes. Ṯamɣarṯ u labud aḏ tweqqar aryaz nnes.