Read Tarifit Ayṯ-Ufasus 6 Bible Online

Ayṯ-Ufasus 6 - Tarifit bible

Ayṯ-Ufasus 6

¹Ay iḥenjiren ṭaƹem i lwalidin nwem ḏi Siḏiṯneɣ, aqa manaya nican ig iǧa.

²Lkitab iqqar: <Weqqar babac ḏ yemmac.> War ḏinni bu can ȓuṣiyeṯ nneɣni qbeȓ i ṯanita yuca-d akiḏes Arebbi ijjen n lwaƹd.

³Iƹni inna: <Ḥima aɣarek ṯiȓi marra mliḥ, ḥima aḏ iȓin wussan nnec ḏi ddunect-a ḏ izeyraren.>

⁴Ay ibabaṯen, war seɣḍabem ca iḥenjiren nwem, rebbam-ṯen x ttarbiyeṯ ḏ useȓmeḏ n Siḏiṯneɣ.

⁵Ay isemɣan, ṭaƹem i ayṯbab nwem ḏi ddunect-a, weqqarem-ṯen ggwḏem-ṯen s yijjen n wuȓ iṣfa amecnaw mammec ṯṭaƹam i Lmasiḥ.

⁶Ṭaƹem-asen maci ɣir xmi ḏawem tbeddan ɣar uzeǧif waha aḏasen ṯƹejbem; Lla, aḏ tiȓim am isemɣan n Lmasiḥ aḏ teggem s ȓxaḍar nwem min ixes Arebbi.

⁷Xeḏmem s yijjen n ȓxaḍar nwem axmi ṯxeddmem i Siḏiṯneɣ maci i iryazen.

⁸Itxeṣṣa kenniw aḏ tessnem marra ȓxir iy ɣa ṯeggem akenniw ijaza xas Siḏiṯneɣ waxxa kenniw ḏ isemɣan niɣ ḏ ayṯbab nsen.

⁹U kenniw ay ayṯbab n isemɣan aḏasen ṯeggem kif-kif, maci aṯen tsiggwḏem. Aqa ṯessnem belli Bab nwem ḏ Bab nsen netta ḏ ijjen aqaṯ ḏeg ujenna, war itegg bu s wuḏemawen.

¹⁰Aqa awaȓ inu aneggaru: Jehḏeṯ s Siḏi Arebbi u s lquwwa nnes ṯameqqrant.

¹¹Ggem xawem marra ȓesnaḥ n Arebbi bac aḏ tesbeddem min xawem itciṭṭin Ibȓis.

¹²Liʼanna neccin war netmenɣi ca ḍed i yiwḏan n uysum ḏ iḏammen. Lla, netmenɣa ḍed n ṯzemmar n ṯaǧest-a ṯanita n zman-a ḏ yinni ig iḥekkmen ḏ yinni ig ijehḏen ḏi ṯaǧest-a. Neccin netmenɣa ḍed n ccayaṭin iƹeffanen ig iǧan ḏeg imucan n ijennaṯen.

¹³S manaya ysiṯ ɣarwem marra ȓesnaḥ n Arebbi bac war trekkwiȓem[3] ca ḏi nhar n ccarr. U meȓa ṯeggim manaya marra, ataf aḏ tbeddem.

¹⁴Beddem baƹda nican, ḥezzmem aḥezzam nni n lḥaqiqa iy teggem ḏi nneṣṣ. Ggem ƹaweḏ ṯjilit nni n ȓeḥḏiḏ n ȓḥaqq.

¹⁵Qqnem ṯisiȓa i iḍaren nwem bac aḏ teswejḏem ixef nwem aḏ tbeccarem s Lʼinjil n ȓehna.

¹⁶Aḏ teysim ȓebda lʼiman nwem am yijjen n lḥimaya x ufus iy zi ɣa ṯsexsim marra fȓičaṯ nni iḥarrqen n Uƹeffan nni n Ibȓis.

¹⁷Ysiṯ ƹaweḏ lkask n usefȓeṯ, sxeḏmem akiḏes ssif nni n Arruḥ iqeddsen ig iǧan ḏ awaȓ n Arebbi.

¹⁸Marra ḍḍuruf iy ḏi ṯeǧam ttarem i Arebbi xasen s Arruḥ iqeddsen s marra lʼanwaƹ n ṯẓaǧiṯ ḏ dduƹaʼ. Sxeḏmem ȓaƹqeȓ nwem ḏi manaya, arrem-d ȓbaȓ nwem s yijjen n ṣṣbar, ttarem x marra ṣṣaliḥin.

¹⁹Ttarem xafi nec ƹaweḏ meȓmi ma rezmeɣ aqemmum inu aḏayi muccen wawaȓen iy zi ɣa beccareɣ s ȓmaƹna inuffaren n Lʼinjil.

²⁰Ƹlaḥsab Lʼinjil-a wanita iy tiȓiɣ nec ḏ ijjen n ssafir carrfeɣ s snaseȓ. Ẓẓaǧem kenniw bac azzayes beccareɣ bȓa ma aḏ ggwḏeɣ ƹlaḥsab lwajib inu.

²¹Rezzuɣ aḏ tessnem mamc ǧiɣ ḏ min teggeɣ. Ḏ uma Tuciq iƹizzen iy ḏawem ɣa yinin marra manaya. Netta ḏ ijjen n uxeddam nican ḏi Siḏiṯneɣ.

²²Tsekkiɣ-awem-ṯ-iḏ i kenniw x ssabab-a wanita bac aḏ tessnem mamc ǧiɣ nec aḏ icejjeƹ uȓawen nwem.

²³Aḏ yiȓi ȓehna i ayṯmaṯneɣ ḏ ȓemḥibbeṯ ak lʼiman zi Arebbi Babaṯneɣ ḏ Siḏiṯneɣ Ƹisa Lmasiḥ.

²⁴Aḏ yiȓi arḍa i marra yinni ig itḥibban Siḏiṯneɣ Ƹisa Lmasiḥ s yijjen n ȓemḥibbeṯ war ṯfenni ca ƹemmarṣ.