Read Tarifit Ayṯ-Filippas 2 Bible Online

Ayṯ-Filippas 2 - Tarifit bible

Ayṯ-Filippas 2

¹Meȓa kenniw twacejjƹem s Lmasiḥ niɣ ṯethillam ḏi ȓemḥibbeṯ nnes niɣ ṯcarrcem ak Arruḥ nnes, niɣ ṯufim ḏayes arraḥmeṯ ḏ lḥanana,

²ataf itxeṣṣa aḏ tkemmȓem i ȓefraḥeṯ inu aɣarwem yiȓi array ḏ ijjen ḏ ȓemḥibbeṯ ḏ icten, kenniw aḏ tiȓim ḏ ijjen aɣarwem ṯiȓi ijjen n lfikra.

³War teggem walu zi lʼananiya niɣ zi ttakebbur. Bȓa ttakebbur weqqarem inneɣni ḥsen zeg yixef nwem.

⁴Itxeṣṣa kuȓ ijjen zzaywem war ixezzar ca min ṯ ithiman waha. Itxeṣṣa-ṯ ƹaweḏ aḏ ixzar min ithiman i yinneɣni.

⁵Array nwem itxeṣṣa aḏ yiȓi am array n Ƹisa Lmasiḥ.

⁶Netta aqaṯ ḏ ṣṣifeṯ n Arebbi, walakin wami imqudda ak Arebbi war inwi ca aḏ iṭṭef ḏi manayenni.

⁷Lla, netta yarra ixef nnes ḏ walu iṭṭef ijjen n ṣṣifeṯ am yismeɣ, iƹni ixȓeq-d am ṣṣifeṯ n bnaḏem.

⁸Wami d imeḍhar am ṣṣifeṯ n yijjen n bnaḏem, isehwa-d ixef nnes iṭaƹ ḥetta wami immuṯ ijjen n ȓmewṯ ḏi ṣṣalib.

⁹X manayenni isgaƹƹeḏ-iṯ Arebbi ɣar ujenna qaƹ, igga-as isem nni iy iǧan ḏeg ujenna x yisemawen marra.

¹⁰Bac x yisem nni n Ƹisa aḏ rekƹen marra x ifadden nsen, yinni iǧan ḏeg ujenna ḏ yinni iǧan ḏi ṯmurṯ ḏ yinni iǧan swadday n ṯmurṯ.

¹¹Aḏ iƹtaref kuȓ yiȓes aḏ yini x Ƹisa Lmasiḥ qa netta ḏ Siḏiṯneɣ azzayes isemɣar Arebbi Babaṯneɣ.

¹²Iḏen ay imƹizzen inu, mamc tuɣa ṯetṭaƹam ȓebda zi qbeȓ wami tuɣayi akiḏwem, amenni ƹaweḏ iy ɣa ḏayi ṯṭaƹem wami xawem ɣabeɣ. Iƹni aḏ teqqimem teggem lmejhud bac aḏ tkemmȓem mliḥ ḏeg usenjem nwem s yijjen n ṯiggwḏi ḏ yijjen n tarjiji.

¹³Minzi ḏ Arebbi ig isxeddamen array nwem ḏ ȓexḏayem nwem bac aḏ teggem lɣaraḍ nnes ḏ aṣebḥan.

¹⁴Ggeṯ marra ṯimesȓayin bȓa ma aḏ tceṯcam bȓa ma aḏ tmenɣem.

¹⁵Ammu aḏ tiȓim beriʼin bȓa ȓƹib ḏi ȓwesṭ n yiwḏan n ȓweqṯ-a iƹewwjen ixarewḍen. Ḏaysen iy ṯreqqem am yiṯran ḏi ddunect-a xmi ḏasen tqeddamem awaȓ n ṯuḏarṯ. Amenni aḏ ftaxareɣ ḏi Nhar nni n Lmasiḥ nec war uzziȓeɣ ca war xḏimeɣ ca ḏi ȓxawi waha.

¹⁷Nec farrḥeɣ akiḏwem s yijjen n ȓefraḥeṯ maƹlic meȓa ferrɣen-ayi-d waha am yijjen n ṣṣeḏqeṯ n iḏammen x dbiḥeṯ nwem iy tqeddamem kenniw s lʼiman nwem.

¹⁸Amenni ƹaweḏ uȓa ḏ kenniw itxeṣṣa akiḏi ṯfarḥem s yijjen n ȓefraḥeṯ.

¹⁹Tmenniɣ s Ƹisa Lmasiḥ aḏawem d ssekkeɣ Timutawus ḏeɣya bac xmi ḏayi d ɣa yarr ȓexbar xawem aḏayi isfareḥ.

²⁰War ɣari ḏa ḥadd am netta thima-ṯ lḥala nwem.

²¹Marra rezzun min ḏasen ithiman i yixef nsen waha, maci min ithiman i Ƹisa Lmasiḥ.

²²Amma Timutawus netta ṯessnem-ṯ meltazem s yixef nnes, ixeddem akiḏi ḏi Lʼinjil am yijjen n uḥarmuc ixeddem ak babas.

²³X manaya, tmenniɣ aḏawem ṯiḏ ssekkeɣ walakin trajiɣ aḏ ẓȓeɣ mamc ɣa ƹḏunt lmacakil inu.

²⁴U nec aqayi mteyyqen ḏi Siḏiṯneɣ aɣarwem d aseɣ ḏeɣya uȓa ḏ nec.

²⁵Cuf, twaȓiɣ labud aḏawem d arreɣ uma Parfulitus wenni iy kiḏi itemƹacaren am ca n umjaheḏ. Netta ḏ amsexxar nwem wenni iy ḏayi d ṯessekkem bac aḏayi ithilla.

²⁶Itweḥḥac-ikenniw aṭṭas marra iḏwem, iysi xawem amnus ƹaweḏ wami d ṯarrim ȓexbar tuɣa ihȓec.

²⁷Wah, tuɣa ihȓec ḏ ṣṣaḥ. Tuɣa ƹȓayen immuṯ walakin Arebbi irḥem-iṯ. War iǧi ca netta waha, irḥem-ayi uȓa ḏ nec bac war xafi itmarni ȓhemm x ȓhemm.

²⁸X manayenni aḏawem ṯiḏ ssekkeɣ ȓexxu ḏ abriḏ bac aḏ tfarḥem xmi ṯ ɣa ṯeẓrem u ƹaweḏ war ḏayi itiȓi bu umnus.

²⁹Reḥḥbem-ṯ s Siḏiṯneɣ s yijjen n ȓefraḥeṯ ḏ ṯameqqrant, weqqareṯ iryazen am netta.

³⁰Mayemmi? Tuɣa ƹȓayen immuṯ ƹlaḥsab ȓxeḏmeṯ n Lmasiḥ minzi iɣamar s ṯuḏarṯ nnes wami irzu aḏ ixḏem min war ṯzemmarem ca aḏ txeḏmem kenniw zi lwajib nwem ɣari.