Read Tarifit Ayṯ-Filippas 4 Bible Online

Ayṯ-Filippas 4 - Tarifit bible

Ayṯ-Filippas 4

¹Iḏen ay ayṯma iy xafi iƹizzen iy tweḥḥaceɣ ig iǧan ḏ ȓefȓaḥeṯ inu ḏ ttaj inu, amenni labud itxeṣṣa aḏ teqqimem ṯbeddem ḏi Siḏiṯneɣ ay imƹizzen inu.

²Tettareɣ i suyṯmaṯneɣ Ṯudya ḏ Ṯinticya bac aḏ yiȓi array nsent ḏ ijjen ak Siḏiṯneɣ.

³Wah, tettareɣ uȓa ḏ cek ay amƹacar inu n ṣṣaḥ, ƹawen ṯimɣarin-a iy kiḏi ixeddmen fus ḏeg ufus ḏi Lʼinjil, akiḏsent ƹaweḏ Krimu ḏ imƹacaren inu nneɣni. Isemawen nsen marra aqaṯen ḏi Lkitab n Ṯuḏarṯ.

⁴Farrḥeṯ ȓebda s Siḏiṯneɣ! Aḏawem iniɣ awaȓ-a ƹaweḏ, farrḥeṯ!

⁵Itxeṣṣa aḏ d imeḍhar ṣṣbar nwem i marra iwḏan, aqa Siḏiṯneɣ yuḏes-d.

⁶War kessim bu umnus x walu. S ṯẓaǧiṯ nwem ḏ dduƹaʼ nwem akiḏsen ccuker nwem aḏ tqeddmem marra ṯimesȓayin s ṭṭalabaṯ nwem i Arebbi.

⁷Ṯumma ȓehna n Arebbi ig itejhiḏen x marra ȓefhameṯ ḏi ddunect-a ḏ wenni iy ɣa iḥḍan uȓawen nwem ḏ ȓaƹquȓaṯ nwem ḏi Ƹisa Lmasiḥ.

⁸Ɣar uneggaru ay ayṯma, min iǧan ḏ lḥaqiqa ḏ mindi iǧa ȓewqqar ḏ min iǧan iseggḏen ḏ min iǧan iṣfan ḏ min iǧan ḏ aṣebḥan ḏ min xaneɣ iƹizzen ḏ ayyi ṯamesȓayṯ ḏ ṯaṣebḥant aṭṭas aḏas nuc lqima itxeṣṣa kenniw aḏ tfekkarem ḏi ṯmesȓayin-a.

⁹Min ṯȓemḏem ḏ min ṯqebȓem zzayi ḏ min ṯesȓim ḏ min ṯeẓrim xafi itxeṣṣa u labud aḏ tesxeḏmem ṯimesȓayin-a. Ṯumma akiḏwem yiȓi Arebbi n ȓehna.

¹⁰Fa, mecḥaȓ farḥeɣ s Siḏiṯneɣ wami aȓ uneggaru ƹaweḏ tuɣa ṯzemmarem aḏayi ṯfeqḏem. Wah, tuɣa tfekkarem ḏayi qbeȓ walakin war ṯufim ca lfurṣa bac aḏayi ṯƹawnem.

¹¹Awaȓ-a inu war iqqar ca rezzuɣ can ȓḥajeṯ; Lla, nec ȓemḏeɣ aḏ qenƹeɣ mammec ma ǧant ḍḍuruf inu.

¹²Ssneɣ aḏ ƹiceɣ ḏeg uzeyyar, ssneɣ ƹaweḏ aḏ ƹiceɣ ḏi ȓxir. Nec mamc ma ǧant ḍḍuruf inu ȓemḏeɣ ssir aḏ wajheɣ ȓxir niɣ ḏ jjuƹ, waxxa ɣari aṭṭas niɣ cwayt waha.

¹³Qaƹ ṯimesȓayin zemmareɣ-asent s wenni iy ḏayi iticcen jjheḏ.

¹⁴Walakin mliḥ wami ṯcarcem akiḏi ḏi lmacakil inu.

¹⁵A Ayṯ-Filippi, wami ffɣeɣ nec zi lʼiqlim n Masidunya ṯessnem qa ḏ kenniw waha zi marra ṯijumaƹ n ȓmuminin iy kiḏi icarcen ḏi lmuƹawana. Manayenni iwqeƹ wami yallah bḏiɣ tbeccareɣ s Lʼinjil ḏi jwayeh nni.

¹⁶Waxxa wami tuɣayi ḏi ṯendint n Salunik min ḥḏajeɣ ḏinni ṯessekkem-ayi-ṯ-id aṭṭas n ṯwaȓaṯin.

¹⁷Walakin nec war rezzuɣ ca aḏayi ṯucem ca n ȓḥajeṯ, nec rezzuɣ min ɣa yarnin ḏi lʼajar nwem ak Arebbi.

¹⁸Ṭṭfeɣ ȓmuneṯ ṯekmaȓ zzaywem u ktar ƹaḏ. Ṯḏebbarem-ayi-d mliḥ wami qebȓeɣ zeg wumaṯneɣ Parfulitus lhadiyaṯ nni iy ḏayi d ṯessekkem. Niṯenti am yijjen ṣṣeḏqeṯ ṯetfuḥ ḏ yijjen n dbiḥeṯ iy ɣa iqbeȓ Arebbi iy ḏas ɣa iƹejben.

¹⁹Aqa Arebbi inu aḏawem yuc qaƹ min ṯeḥḏajem ƹlaḥsab agȓa nnes lƹaḍim ḏi Ƹisa Lmasiḥ.

²⁰Lƹaḍama i Arebbi Babaṯneɣ i ȓebda n ȓebdaṯ. Amin.

²¹Siwḍem sȓam i marra ṣṣaliḥin s Ƹisa Lmasiḥ. Awmaṯen iy iǧan akiḏi sawwaḍen-awem-d sȓam.

²²Marra ṣṣaliḥiin sawwaḍen-awem-d sȓam xaṣṣatan yinni iǧan ḏi ṯeddarṯ n uzeǧiḏ Qayṣar.

²³Aḏ yiȓi ak arruḥ nwem arḍa n Siḏiṯneɣ Ƹisa Lmasiḥ.