Read Tarifit Ayṯ-Kulus 3 Bible Online

Ayṯ-Kulus 3 - Tarifit bible

Ayṯ-Kulus 3

¹Iḏen fa wami twasnekkarem kenniw ak Lmasiḥ u labud aḏ terzum s wuȓawen nwem ṯimesȓayin nni iǧan ḏeg ujenna mani iqqim Lmasiḥ ɣar ufusi n Arebbi.

²Rezzuṯ s wuȓawen nwem ṯimesȓayin nni iǧan ḏeg ujenna, maci ṯinni ḏi ṯmurṯ.

³Minzi zaƹma kenniw ṯemmuṯem, ṯuḏarṯ nwem aqa ṯnuffar ak Lmasiḥ ḏi Arebbi.

⁴Xmi d ɣa imeḍhar Lmasiḥ iƹni wenni iǧan ḏ ṯuḏarṯ nwem, ȓexddenni akiḏes tmeḍharem uȓa ḏ kenniw ḏi lƹaḍama.

⁵X manaya nɣeṯ min iǧan ḏaywem ḏi ṭṭabiƹa nwem n ddunect-a iƹni lfasad ḏ min ixenzen ḏ ccehweṯ ḏ ȓxaḍar aƹeffan ḏ ṭṭmaƹ ig iǧan netta am lƹibada n lʼaṣnam.

⁶Ƹlaḥsab ṯimesȓayin-a iy d ɣa yasen Nhar n uɣḍab n Arebbi.

⁷Tuɣa qbeȓ ṯuyurem x ibriḏen-a ṯƹicem ḏaysen.

⁸Walakin ȓexxu ṯimesȓayin nni itxeṣṣa axawem ṯent ṯesbeƹƹḏem qaƹ iƹni aƹeṣṣab ḏ uɣḍab ḏ ccarr ḏ ȓbaṭeȓ ḏ wawaȓen iƹeffanen iy ṯeqqarem s uqemmum nwem.

⁹War sxerriqem ca x wayawya ȓaḥeqqac ṯbeddȓem ṭṭabiƹa nni nwem tuɣa ɣarwem qbeȓ ḏayes ixarwiḍen waha.

¹⁰Ȓexxu kenniw ṯeggim ijjen n ṭṭabiƹa nneɣni ḏ jḏiḏ ƹaḏ tḏewwaȓ-d ḏ jḏiḏ, ȓmaƹrifa nnes am ṣṣifeṯ n Lxaliq nnes.

¹¹War itɣimi bu uyunani niɣ ḏ aʼisraʼili, niɣ ḏ wenni iṭehharen niɣ ḏ wenni war iṭehhiren ca, niɣ ḏ abarbari niɣ ḏ aweḥciw,[8] niɣ ḏ ismeɣ niɣ ḏ wenni iǧan ḥurr. Lla, Lmasiḥ netta ḏ marra, aqaṯ ḏi marra.

¹²Iḏen kenniw ḏ ccaƹb muqeddes ixḍar-ikenniw Arebbi ṯƹizzem xas. Labud aḏaywem ṯiȓi lḥanana ḏ ȓxir ḏ ttawaḍuƹ ḏ ṣṣbar u marra bȓa ttakebbur.

¹³Ṣbareṯ ak wayawya. Meȓa can yijjen zzaywem ɣares can lmuckil iy zzayes ɣa iceṯca x unneɣni, itxeṣṣa ijjen aḏ ismeḥ i unneɣni. Mammec ḏawem iɣfar Arebbi i kenniw, amenni iy ɣa ṯsemḥem i yiwḏan.

¹⁴Ktar marra zi ṯmesȓayin-a ṯina itxeṣṣa aḏ tesxeḏmem ȓemḥibbeṯ jarawem minzi ȓemḥibbeṯ-a tas-d am yijjen n usɣun ig ismunen marra ṯimesȓayin-a ḏeg yicten.

¹⁵Jjem ȓehna n Lmasiḥ aḏ iḥkem ḏeg wuȓawen nwem minzi kenniw ḏ ijjen n jmaƹeṯ iȓaɣa-yawem-d aȓ ȓehna-ya. Kenniw ƹaweḏ cekkarem Arebbi.

¹⁶Jjem awaȓen n Lmasiḥ aḏaywem zeḏɣen s marra lbaraka nsen. S marra ȓefhameṯ itxeṣṣa ijjen aḏ isefhem unneɣni, ijjen aḏ inha unneɣni. Ɣennjem s wawaȓen n Zzabur ḏ lʼamdaḥ ḏ yizȓan ruḥiya akiḏes ṯeggem ijjen n ccuker ḏeg wuȓawen nwem i Arebbi.

¹⁷Marra min teggem s wawaȓen niɣ s lḥasanaṯ, itxeṣṣa aḏ teggem manaya marra ƹlaḥsab isem n Siḏiṯneɣ Ƹisa azzayes tcekkarem Arebbi Babaṯneɣ.

¹⁸A ṯimɣarin, ṭaƹent i iryazen nkent minzi manaya ig iǧan ḏ lmaƹqul zi Arebbi.

¹⁹Ay iryazen, ḥibbem ṯimɣarin nwem war iǧi aḏkisent twaqsḥem.

²⁰Ay iḥenjiren, ṭaƹem i lwalidin nwem ḏi marra ṯimesȓayin minzi manaya itƹejib-as i Siḏi Arebbi.

²¹Ay ibabaṯen, war tqehharem ca ṯarwa nwem bac war tefciȓen ca.

²²Ay isemɣan, ṭaƹeṯ i ayṯbab nwem n ddunect-a ḏi marra ṯimesȓayin. Ṭaƹem-asen maci ɣir xmi ḏawem tbeddan ɣar uzeǧif waha ḥima aḏasen ṯƹejbem; Lla, ṭaƹem-asen s ȓxaḍar nwem akiḏwem ṯiȓi ijjen n ṯiggwḏi ḏi Siḏiṯneɣ.

²³Marra min teggem, teggem-ṯ s ȓxaḍar nwem mammec ḏas ṯxeddmem i Siḏiṯneɣ maci i iryazen.

²⁴Kenniw ṯessnem ljaʼiza nwem aḏ tiȓi ḏ ijjen n lwareṯ zi Siḏiṯneɣ. Netta umi ṯxeddmem netta ḏ Siḏiṯneɣ Lmasiḥ.

²⁵Cuf, wenni iḍeǧmen ataf aḏ icc aƹmuḏ x min iḍeǧem. Arebbi war itegg bu s wuḏemawen jar yiwḏan.