Read Tarifit 1 Ayṯ-Salunik 2 Bible Online

1 Ayṯ-Salunik 2 - Tarifit bible

1 Ayṯ-Salunik 2

¹Ay ayṯma, kenniw s yixef nwem ṯessnem nnfaƹ nni iy d nuwi wami d nusa ɣarwem.

²Ḏi ṯendint n Filippi ṯessnem belli tƹeddan xaneɣ ḏinni tbuṣaren xaneɣ. Walakin neccin nzaƹem akiḏwem, tuɣa itƹawan-aneɣ Arebbi bac a nbeccar jarawem s Lʼinjil waxxa can yiwḏan tƹarraḍen-aneɣ.

³Awaȓ nneɣ iy zi netweṣṣa war d itis ca zeg uɣḏar niɣ zi min ixenzen niɣ zi ṯeḥraymiṯ.

⁴Lla, iḍbeƹ-aneɣ Arebbi ikellef-aneɣ x wawaȓen-a iǧan ḏi Lʼinjil. Zi manaya nessawaȓ bac axaneɣ yarḍa Arebbi maci axaneɣ arḍan yiwḏan minzi ḏ netta ig iǧan ḏ wenni itmeyyazen min ɣarneɣ ḏeg wuȓawen nneɣ.

⁵Cuf, qa ṯessnem ƹemmarṣ ma nseȓha ḥadd s wawaȓen niɣ ƹemmarṣ ma neḍmeƹ ḥadd ƹlaḥsab ca n ssabab. Icehheḏ xaneɣ Arebbi!

⁶War nexs ca iryazen aḏaneɣ cehharen: lla kenniw, lla can iryazen nneɣni. Neccin tuɣa nzemmar axawem nzeyyar s ssulṭa nneɣ am arrusul.

⁷Walakin lla, neccin nxeddem akiḏwem s ttawaḍuƹ am ṯemɣarṯ ak ṯarwa nnes.

⁸Ammu iy nethella ḏaywem netxes-ikenniw. Nfareḥ wami ncarec akiḏwem Lʼinjil ḏ ṯuḏarṯ nneɣ minzi ṯƹizzem xaneɣ aṭṭas.

⁹Ay ayṯma, aqa ṯƹeqȓem x ȓxeḏmeṯ nneɣ qa neccin nuwṯa xas tamara. Wami kenniw netbeccar s Lʼinjil n Arebbi, qa nxeddem ǧiȓeṯ ḏ nhar bac war netbessiȓ ca x can ḥadd zzaywem.

¹⁰Netƹic akiḏwem kenniw iy yumnen s yijjen n ṣṣfa ḏ yijjen n ubriḏ nican bȓa ȓƹib. Kenniw ḏ ȓechuḏ x manaya uȓa ḏ Arebbi.

¹¹Ntegg akiḏwem am yijjen n uryaz ak ṯarwa nnes. Netweṣṣa-kenniw netcejjaƹ-ikenniw netzeyyar xawem

¹²bac aḏ tuyurem s yijjen n ṯicri iy ḏas iticcen lqima i Arebbi ig isḏaheǧ netta iƹni wenni iy ḏawem d itȓaɣan ɣar ȓmulk nnes ḏ lƹaḍama nnes.

¹³Neccin netcekkar Arebbi xawem bȓa ma a nbedd wami ṯqebȓem awaȓ nnes iy ḏawem d nessiweḍ. Ṯqebȓem-ṯ maci am wawaȓ n yiwḏan, ṯqebȓem-ṯ am wawaȓ n Arebbi nican. Ixeddem wawaȓ-a ƹaweḏ ḏaywem kenniw iy yumnen.

¹⁴Ay ayṯma, ṯḏewȓem am ṯjumaƹ nni n ȓmuminin n Arebbi ḏi Ƹisa Lmasiḥ ṯinni iy iǧan ḏi ṯmurṯ n Yahuḏiya. Liʼanna iwḏan n ṯmurṯ nwem tbuṣaren xawem am Ayṯ-Yahuḏiya tbuṣaren x ṯjumaƹ n ȓmuminin iy ḏinni.

¹⁵Niṯni nɣin Siḏiṯneɣ Ƹisa ḏ lʼanbiya, uȓa ḏ neccin sufɣen-aneɣ ssenni. War xasen yarḍi ca Arebbi niṯni tƹarraḍen i marra iwḏan, ȓaḥeqqac war ḏaneɣ tejjin ca a nessiweȓ ak ȓegnus bac aḏ nejmen. Amenni ȓmuƹṣiyaṯ nsen arennint tƹemmarent, lƹiqab n Arebbi iwḍa xasen qaƹ.

¹⁷Ay ayṯma, tuɣa nɣab xawem cway n ȓweqṯ, walakin ḏeg wuȓawen nneɣ war xawem nɣib ca. Ḏi ȓweqṯ nni netḥawaȓ aṭṭas bac a d nas minzi ḏayneɣ mezȓi akenniw nẓer.

¹⁸Mecḥaȓ n ṯwaȓaṯin nexs aɣarwem d nas, nec s yixef inu ƹaweḏ, walakin itqaṭeƹ-aneɣ-d Cciṭan ḏeg ubriḏ.

¹⁹Liʼanna ḏ kenniw iy iǧan ḏ lʼamal nneɣ ḏ ȓefraḥeṯ nneɣ ḏ ttaj nneɣ n ccan zzaṯ i Siḏiṯneɣ Ƹisa xmi d ɣa yas.

²⁰Wah, ḏ kenniw iy iǧan ḏ ccan nneɣ ḏ ȓefraḥeṯ nneɣ.