Read Tarifit 1 Ayṯ-Salunik 3 Bible Online

1 Ayṯ-Salunik 3 - Tarifit bible

1 Ayṯ-Salunik 3

¹Iḏen, wami nugi a neṣbar ƹaḏ ktar, tuɣa nfekkar ḥsen a neqqim ḏi ṯendint n Utina waḥeḏneɣ, Timutawus aṯiḏ nessekk ɣarwem bac akenniw isejheḏ akenniw icejjeƹ ḏi lʼiman nwem. Netta ḏ umaṯneɣ ixeddem akiḏneɣ ḏi ȓxeḏmeṯ n Lʼinjil n Lmasiḥ.

³Nessekk-iṯ ḥima uȓa ḏ ijjen war iterjiji ca s ȓemḥayen-a nwem; Aqa ṯessnem belli manaya iy xaneɣ yurin.

⁴Wah, wami tuɣaneɣ akiḏwem qbeȓ neqqar-awem qa ȓemḥayen axaneɣ kkent. Ḏ manaya ig iweqƹen qa ṯessnem kenniw.

⁵X manaya, wami ugiɣ aḏ ṣbareɣ ƹaḏ ktar, ssekkeɣ-d ɣarwem Timutawus bac aḏ ssneɣ lʼiman nwem. Ggwḏeɣ wenni itɣarran tuɣa iɣarr-ikenniw s ibriḏen nnes uca min tuɣa nexḏem jarawem imken iḏweȓ axmi war neggi walu.

⁶Ȓexxu iḏweȓ-d ɣarneɣ zzaywem Timutawus, yuwi-yaneɣ-d ijjen n ȓexbar ḏ aṣebḥan x lʼiman nwem ḏ ȓemḥibbeṯ nwem. Inna-aneɣ aqa txemmamem ḏayneɣ mliḥ, ḏaywem ƹaweḏ mezȓi aḏaneɣ ṯeẓrem uȓa ḏ neccin ḏayneɣ mezȓi akenniw nẓer.

⁷X manaya ay ayṯma, neccin netwacejjeƹ s lʼiman nwem waxxa aqaneɣ ḏanita ḏi ȓemḥayen ḏ yij uziyyar.

⁸Ȓexxu aqa netƹic mliḥ wami tbeddam nican ḏeg ubriḏ n Siḏiṯneɣ.

⁹Mammec iy ɣa negg a ncekkar Arebbi xawem?! Mecḥaȓ n ȓefraḥeṯ iy ɣarneɣ zzaṯ i Arebbi ƹlaḥsab kenniw!

¹⁰Ǧiȓeṯ ḏ nhar ntettar-as i Arebbi s wuȓawen nneɣ bac akenniw nẓer ƹaweḏ, aḏawem narni min ineqqṣen ḏi lʼiman nwem.

¹¹Aḏaneɣ irzem Arebbi Babaṯneɣ abriḏ ɣarwem netta s yixef nnes ak Siḏiṯneɣ Ƹisa.

¹²Aḏ yarni Siḏiṯneɣ ȓemḥibbeṯ nwem ak wayawya at isfeyyeḍ s waṭṭas ak marra iwḏan am neccin nexs-ikenniw.

¹³Aḏawem isejheḏ uȓawen nwem bac aḏ tiȓim bȓa ȓƹib aḏ tiȓim muqeddsin zzaṯ i Arebbi Babaṯneɣ xmi d ɣa yas Siḏiṯneɣ Ƹisa ak marra ṣṣaliḥin nnes.