Read Tarifit 1 Ayṯ-Salunik 4 Bible Online

1 Ayṯ-Salunik 4 - Tarifit bible

1 Ayṯ-Salunik 4

¹Fa ay ayṯma ƹlaḥsab ṯimesȓayin nneɣni, kenniw qa ṯqebȓem zzayneɣ mamc iy ɣa ṯƹicem bac axawem yarḍa Arebbi; amenni ƹaweḏ iy tƹicem. Ȓexxu ḏi Ƹisa Lmasiḥ netḥeccam-ikenniw netweṣṣa-kenniw bac aḏ teggem ƹaḏ ktar.

²Cuf, ṯessnem ṯimesȓayin nni iy zi kenniw nweṣṣa s ssulṭa n Ƹisa Lmasiḥ.

³Aqa ȓxaḍar n Arebbi itxeṣṣa-kenniw aḏ tiȓim ṯeṣfam aḏ tbeƹƹḏem zi lfasad.

⁴Itxeṣṣa aḏ tessnem mamc ɣa ṯḥekmem x ddat nwem ƹlaḥsab min iǧan muqeddes ḏayes aweqqar.

⁵Maci aḏ tƹicem ḏi ccehweṯ n ddat nwem mammec teggen ȓegnus war issinen ca Arebbi.

⁶Ƹlaḥsab manaya itxeṣṣa labud uȓa ḏ ijjen war iḍeǧem umas war ṯ itɣecci ca liʼanna ḏ Siḏiṯneɣ ig itxeǧasen x marra ṯimesȓayin-a mammec ḏawem ṯ nenna qbeȓ neƹȓem-awem xas.

⁷Minzi Arebbi war ḏaneɣ d iȓaɣi ca bac a nƹic ḏi min ixenzen; Lla, iȓaɣa-yaneɣ-d a nƹic ḏi min iṣfan.

⁸Falihaḏa wenni itagin aḏ iḏfar ȓuṣiyeṯ-a ṯanitan ataf maci itagi i bnaḏem, itagi i Arebbi wenni iy ḏawem d iticcen Arruḥ nnes iqeddsen.

⁹Ȓexxu ƹlaḥsab ȓemḥibbeṯ jarawem war nteḥḏiji ca ƹaḏ aḏawem nari, mayemmi? Minzi iseȓmeḏ-ikenniw Arebbi s yixef nnes aḏ texsem ayawya.

¹⁰Wah, ḏ ṣṣaḥ texsem marra ayṯmaṯwem iy kiḏwem itƹicen ḏi lʼiqlim n Masidunya. Walakin netweṣṣa-kenniw ay ayṯma aḏ tarnim ƹaḏ ktar.

¹¹Netweṣṣa ƹaweḏ aḏ tḥawȓem bac aḏ tƹicem ḏi ȓhudneṯ, aḏ taḏfem ḏi ccɣuȓaṯ nwem waha, aḏ txeḏmem s ifassen nwem. Amenni iy kenniw netweṣṣa qbeȓ.

¹²Ḥima aḏ tuyurem s lmaƹqul ak yinni ɣar barra nwem war yuminen ca, war teḥḏijim walu zi ḥadd.

¹³Fa ay ayṯma, war nexs ca aḏ tqefȓem i yixef nwem ƹlaḥsab yinni iṭṭṣen ḏeg imeḍȓan bac war txeyyiqem ca am yinni nneɣni war ḏi iǧi bu lʼamal.

¹⁴Cuf, neccin ntamen belli Ƹisa immuṯ ikkar-d, ntamen ƹaweḏ belli Arebbi ƹaḏ aḏ iysi yinni iṭṭṣen ḏeg imeḍȓan iy yumnen zi Lmasih aḏ iȓin ak Ƹisa.

¹⁵Ƹlaḥsab awaȓ n Siḏiṯneɣ neqqar-awem qa neccin iƹni yinni ƹaḏ iddaren iƹni yinni ƹaḏ iqqimen ḏi ddunect-a xmi d ɣa yas Siḏiṯneɣ qa neccin war netgaƹƹiḏ ca ḏ imezwura x yinni iṭṭṣen ḏeg imeḍȓan.

¹⁶Liʼanna Siḏiṯneɣ aqa aḏ d ihwa s yixef nnes zeg ujenna s yijjen n ṯɣuyyeṯ ṯemɣar ḏ yijjen n ṯmijja n lmalak nni ameqqran ḏ zzammar nni itṣuḍen n Arebbi, ȓexddenni imettinen tuɣa yumnen zi Lmasiḥ aḏ d kkaren ḏ imezwura.

¹⁷Ssenni neccin iƹni yinni ƹaḏ iddaren iƹni yinni ƹaḏ aqaneɣ ḏi ddunect-a ataf akiḏsen netwarfeƹ ɣar ujenna ḏeg iseynuṯen[1] bac a nmeȓqa ak Siḏiṯneɣ ḏi lhawa. Wa amenni akiḏes niȓi i ȓebda.

¹⁸Iḏen, cejjƹeṯ ayawya s wawaȓen-a.