Read Tarifit 2 Ayṯ-Salunik 2 Bible Online

2 Ayṯ-Salunik 2 - Tarifit bible

2 Ayṯ-Salunik 2

¹Amma Yum nni xmi d ɣa imeḍhar Siḏiṯneɣ Ƹisa Lmasiḥ neccin aɣares ngaƹƹeḏ. Ay ayṯma, neqqar-awem

²war tenxȓiƹem ca ḏeɣya ḏi ȓaƹqeȓ nwem, war txeyyaqem ca ƹlaḥsab ca n arruḥ n lwaḥi niɣ ḏ ca n wawaȓ niɣ ḏ ca n ṯebrat zzayneɣ zaƹma iqqaren qa Yum n Siḏiṯneɣ aqa yuweḍ-d.

³Lla, war tejjam ḥadd akenniw icmeṯ s walu. Ataf war izemmar Yum nni aḏ d yas qbeȓ ma aḏ semḥen aṭṭas aṭṭas n yiwḏan ḏ amezwaru ḏi Arebbi aḏ d imeḍhar lmesxuṭ mmis n ȓefna.

⁴Netta itƹarraḍ i Arebbi isemɣar ixef nnes x marra minxef iǧa isem n Arebbi ḏ min ƹebbḏen yiwḏan ḥetta aḏ iqqim ḏi Ṯemziḏa ṯameqqrant n Arebbi aḏ iƹeyyeḍ aḏ yini qa nec ḏ Arebbi.

⁵Ma war ṯeƹqiȓem ca? Iwa wami tuɣayi akiḏwem qbeȓ qqareɣ-awem ṯimesȓayin-a.

⁶Kenniw ṯessnem min ṯ iteṭṭfen ƹaḏ bac war d itmeḍhar ca aȓ d ɣa yaweḍ ȓweqt nnes nican.

⁷Cuf, ijjen n jjheḏ inuffaren n ssayyiʼaṯ ixeddem ȓexxu, walakin ḏinni ijjen nneɣni ƹaḏ iteṭṭef-iṯ ḥetta wanita nneɣni aḏ itwakkes zi ȓwesṭ.

⁸Ṯumma aḏ d imeḍhar lmesxuṭ, axas iṣuḍ Siḏiṯneɣ Ƹisa s uqemmum nnes aṯ ineɣ, aṯ isbeṭṭeȓ s lƹaḍama nnes iy zi d ɣa iƹqeb Ƹisa.

⁹Lmesxuṭ-a wanita aḏ d imeḍhar ḏi ddunect-a ƹlaḥsab ȓexḏayem n Cciṭan s marra ṯizemmar ḏ lburhanaṯ ḏ ȓaƹjayeb isxarriqen

¹⁰ḏ marra ibriḏen n ccarr iy zi twacemmaṯen yinni ifennan. Niṯni aḏ fnan minzi war qbiȓen ca aḏ texsen lḥaqiqa bac aṯen isenjem Arebbi.

¹¹X manaya aḏ issekk Arebbi aṯen istexiyyal bac aḏ amnen s uxarriq-a.

¹²Ḥima aḏ twaḥasben marra yinni war yuminen ca s lḥaqiqa arḍan s ccarr.

¹³Fa ay ayṯma iy xef iƹizz Siḏiṯneɣ, labud a ncekkar Arebbi xawem minzi ixḍar-ikenniw ḏ imezwura nni iƹni ḏ yinni iy twasnejmen s ȓxeḏmeṯ nni issiṣfan n Arruḥ iqeddsen ḏ yijjen ttiqeṯ nwem ḏi lḥaqiqa.

¹⁴Aqa iȓaɣa-d xawem ƹlaḥsab i manaya s Lʼinjil iy netbeccar bac aḏ tcarcem ḏi lƹaḍama n Siḏiṯneɣ Ƹisa Lmasiḥ.

¹⁵Iḏen ay ayṯma, beddem nican, ṭṭfem ḏi ttaƹalim nni iy kenniw nseȓmeḏ waxxa s wawaȓ nneɣ waxxa s ṯebrat nneɣ.

¹⁶Siḏiṯneɣ Ƹisa s yixef nnes u ƹaweḏ Arebbi Babaṯneɣ wenni iy ḏaneɣ yucin s arḍa nnes ijjen n ucejjaƹ war ifennin ca ƹemmarṣ ḏ ijjen n lʼamal iṣbaḥ, ataf akenniw icejjeƹ s wuȓawen nwem aṯen isejheḏ ƹlaḥsab ḏi kuȓ ȓxeḏmeṯ ḏ kuȓ awaȓ aṣebḥan.