Read Tarifit 2 Ayṯ-Salunik 3 Bible Online

2 Ayṯ-Salunik 3 - Tarifit bible

2 Ayṯ-Salunik 3

¹Amma ṯimesȓayin nneɣni ay ayṯma, ttareṯ xaneɣ i Arebbi bac awaȓ n Siḏiṯneɣ aḏ itentacar aḏ itwasemɣar mammec iy iweqƹen jarawem.

²Ttareṯ ƹaweḏ a nefȓeṯ zeg yiwḏan war iḥȓin ḏ iƹeffanen minzi lʼiman war iǧi ca ḏi marra iwḏan.

³Walakin Siḏiṯneɣ ḏayes ttiqeṯ, akenniw isejheḏ akenniw iḥḍa zi ccarr.

⁴Neccin qa metʼakkedin ḏi Siḏi Arebbi aqa minzi kenniw nweṣṣa qa teggem-ṯ, aṯ teggem ƹaḏ.

⁵Aḏ issiweḍ Siḏiṯneɣ uȓawen nwem ɣar ȓemḥibbeṯ n Arebbi, ƹaweḏ ɣar ṣṣbar n Lmasiḥ.

⁶Fa ay ayṯma, netweṣṣa-kenniw ƹlaḥsab isem n Siḏiṯneɣ Ƹisa Lmasiḥ aḏ tbeƹƹḏem zi mkuȓ ȓmumen itbaƹen farq-ccɣeȓ, netta war iḏeffar ca ttaƹlim iy ṯqebȓem zzayneɣ.

⁷Kenniw s yixef nwem ṯessnem u labud aḏ tebƹem abriḏ nni iy negga jarawem. Neccin war netbiƹ ca farq-ccɣeȓ wami tuɣaneɣ akiḏwem.

⁸War necci bu uɣrum ak ḥadd baṭeȓ. Lla, nxeddem ǧiȓeṯ ḏ nhar, neccaṯ tamara nrebbeȓ bac war netbessiȓ x ḥadd zzaywem.

⁹Negga manayenni maci war ɣarneɣ bu ȓḥaqq aḏaneɣ ṯƹawnem; Lla, nseḍhar-awem-d abriḏ iy ɣa ṯeḏfarem.

¹⁰Waxxa wami tuɣaneɣ akiḏwem nuca-awem ȓuṣiyeṯ-a ṯanita: Wenni itagin aḏ ixḏem war itett ca.

¹¹Liʼanna netsȓa belli ḏinni ȓebƹaḍ zzaywem tbaƹen farq-ccɣeȓ. War xeddmen ca ccɣuȓaṯ nsen, niṯni taḏfen ḏi ccɣuȓaṯ n midden waha.

¹²Iwḏan-a netweṣṣa-ṯen neqqar-asen s yisem n Siḏiṯneɣ Ƹisa Lmasiḥ aḏ xeḏmen s lmaƹqul aḏ ccen aɣrum iy iǧan nsen.

¹³Amma kenniw ay ayṯma, ggeṯ ȓxir bȓa ma aḏ taḥȓem.

¹⁴Wenni war itṭiƹin ca i wawaȓ nneɣ ḏi ṯebrat-a ggem-ṯ ḏi ȓbaȓ nwem, war kiḏes ggurem ca bac aḏ iseḏḥa.

¹⁵Walakin war ṯ twaȓam ca am ȓaƹḏu nwem; Lla, nham-ṯ am yijjen zeg wuwmaṯwem.

¹⁶Siḏiṯneɣ n ȓehna aḏawem yuc ijjen ȓehna ḏi aya ȓweqṯ u s marra ṯimesȓayin. Aḏ yiȓi Siḏi Arebbi akiḏwem marra.

¹⁷Sȓam-a wanita uriɣ-ṯ nec s ufus inu Bulus, ḏ ṯanita ḏ lƹalama inu iǧan ḏi marra ṯibraṯin inu. Ammu iy tariɣ nec.

¹⁸Arḍa n Siḏiṯneɣ Ƹisa Lmasiḥ akiḏwem yiȓi marra.