Read Tarifit 1 Timutawus 1 Bible Online

1 Timutawus 1 - Tarifit bible

1 Timutawus 1

¹Nec ḏ Bulus ḏ arrasul n Ƹisa Lmasiḥ s lʼamar n Arebbi wenni iy ḏaneɣ isenajmen ḏ Ƹisa Lmasiḥ netta ḏ lʼamal nneɣ.

²Tariɣ ṯabrat-a i Timutawus wenni iy iǧan am memmi ḏ ṣṣaḥ ḏi lʼiman. Akiḏec yiȓi arḍa ḏ arraḥmeṯ ḏ ȓehna zi Arebbi Babaṯneɣ ḏ Ƹisa Lmasiḥ Siḏiṯneɣ.

³Nec wami ruḥeɣ ɣar lʼiqlim n Masidunya weṣṣiɣ-cek aḏ teqqimeḏ ḏi ṯendint n Ufasus bac aḏ tenhiḏ can iryazen aḏasen ṯiniḏ war seȓmaḏem ca ṯimesȓayin ig itxalafen ḏi lʼiman.

⁴Aḏasen ṯiniḏ war ḏeffarem ca ṯiḥuja niɣ ḏ ṯacejjarṯ nni war iqeṭṭin ca x ȓejḏuḏ nwem. Ṯimesȓayin-a am ṯina ɣir tsejjaƹent-aneɣ bac a nweddar ḏi lʼafkar ixwan, war ḏaneɣ ṯsiwwiḍent ca ɣar min itxeṭṭeṭ Arebbi minzi min ḏaneɣ isawwaḍen ɣar Arebbi netta ḏ lʼiman.

⁵Min iƹna lɣaraḍ n ȓuṣiyeṯ-a? Lɣaraḍ nnes ḏ ijjen n ȓemḥibbeṯ iy d itasen zeg wuȓawen iṣfan ḏ yijjen n ḍḍamir ḏ aṣebḥan ḏ yijjen n lʼiman bȓa nnifaq.

⁶Ȓebƹaḍ ffɣen zi ṯmesȓayin-a uḏfen ḏeg wawaȓen iy ixwan.

⁷Rezzun aḏ dewȓen ḏ imseȓmaḏen n ccariƹa, walakin war fehhmen ca min qqaren uȓa ḏ minxef tʼakkaden aṭṭas.

⁸Ccariƹa-ya meȓa isteƹmel-it bnaḏem nican, neccin nessen-it ḏ ṯaṣebḥant.

⁹Nessen Ccariƹa-ya ƹaweḏ war d ṯexȓiq ca i yinni isemṣȓaḥen ak Arebbi. Lla, ṯexȓeq-d i yinni iǧan ḏ iƹeffanen ḏ yinni iy ḏi ṯeǧa ṯɣennant ḏ yinni war iḏeffiren ca Arebbi ḏ yinni iƹeṣṣan ḏ yinni war iṣfin ca ḏ yinni war ɣar iǧi bu ddin ḏ yinni ineqqen babaṯsen ḏ yemmaṯsen ḏ yinni ineqqen iwḏan

¹⁰ḏ yinni iteggen lfasad ḏ iryazen ifessḏen ak wayawya ḏ yinni itacaren iwḏan ḥima aṯen arren ḏ isemɣan ḏ yinni iqqaren ixarriqen ḏ yinni icehhḏen ẓẓur niɣ ḏ yinni iteggen can n ṯmesȓayin nneɣni iǧan ḍed i ttaƹlim n lʼiman iǧan nican.

¹¹Ttaƹlim-a iǧan nican aṯ naf ḏi Lʼinjil n Arebbi lƹaḍim ig itwarbarken. Lʼinjil-a ikellef-ayi-d xas nec am yijjen n lʼamana.

¹²Tcekkareɣ Siḏiṯneɣ Ƹisa Lmasiḥ wenni iy ḏayi yucin jjheḏ nnes yufa ḏayi ttiqeṯ isiḏef-ayi ɣar ȓxeḏmeṯ nnes.

¹³Nec qbeȓ tuɣa qqareɣ awaȓen war iḥȓin x Arebbi tƹeddabeɣ ȓmuminin, nec ḏ ijjen bnaḏem iḍeǧmen. Waxxa tuɣa xeḏmeɣ manayenni iseḍhar-ayi-d Arebbi arraḥmeṯ nnes liʼanna xeḏmeɣ manayenni s ȓeqfaȓeṯ inu bȓa ma aḏ ssneɣ min iǧan nican, uȓ inu war ḏayes bu lʼiman.

¹⁴Arḍa n Siḏiṯneɣ infeyyeḍ-d xafi s waṭṭas ḏ waṭṭas, akiḏes ijjen n lʼiman ḏ ijjen n ȓemḥibbeṯ ig iǧan ḏi Ƹisa Lmasiḥ.

¹⁵Aqa ijjen n wawaȓ ḏayes ttiqeṯ u labud aḏ itwaqbeȓ marra, iƹni Ƹisa Lmasiḥ yusa-d ɣar ddunect-a bac aḏ isenjem yinni iƹeṣṣan, zzaysen nec ig iǧan ḏ lƹaṣi ḏ ameqqran xasen marra.

¹⁶Wami nec ḏ lƹaṣi ḏ ameqqran xasen marra iseḍhar-ayi-d Arebbi arraḥmeṯ nnes bac Ƹisa Lmasiḥ azzayi d ismeḍhar marra ṣṣbar nnes aḏ yiȓi manaya ḏ ijjen n lmiṯal i yinni iy zzayes ɣa yamnen aɣarsen ṯiȓi ṯuḏarṯ n ȓebda.

¹⁷Azeǧiḏ nneɣ aɣares ṯiȓi lƹaḍama i ȓebda n ȓebdaṯ, wenni ƹemmarṣ aḏ ifna ƹemmarṣ aḏ immeṯ wenni war ṯ itwiȓi ḥadd wenni iǧan ḏ Arebbi waḥḏes. Amin.

¹⁸A wulidi Timutawus, aḏac uceɣ lmasʼuliya-ya ṯanitan ƹlaḥsab awaȓen nni iy xac nnan lʼanbiya zi qbeȓ bac xmi xasen ɣa ṯƹeqȓeḏ ataf aḏ tmenɣeḏ mliḥ amenɣi-ya aṣebḥan,

¹⁹ataf aɣarec yiȓi lʼiman nnec ḏ yijjen ḍḍamir ḏ aṣebḥan. Maci am ȓebƹaḍiṯ semḥen ḏi manaya uca lʼiman nsen iɣareq am yij uɣarrabu ḏi ȓebḥar.

²⁰Zzaysen Ḥimmit ḏ Iskander, jjiɣ-ṯen nec i Cciṭan ḥima aḏ twarebban war qqaren ca awaȓen nni war iḥȓin x Arebbi.